Kinaadlaw nga Pagbasa
PAGBASA I
2 Hadi 5:1-15ab
Pagbasa tikang han Ikaduha nga basahan han Kahadian.
Tinahod gud ngan pinalabi han hadi han Siria hi Naaman nga kapitan han kasondalohan nga Siriahanon, kay pinaagi ha iya ginpadaog han Ginoo an kasondalohan nga Siriahanon. Gamhanan hiya nga sondalo, kundi sanlahon hiya. Ha usa han ira mga pagsulong han Israel, nabihag han mga Siriahanon in babayehay nga Israelita, nga nahimo nga surugoon han asawa ni Naaman. Usa ka takna nagsiring ha iya agaron nga babaye ini nga babayehay, “Maupay unta kon makakadto han manaragna nga nag-uokoy ha Samaria an akon agaron nga lalake! Tatambalon hiya han iya sakit.” Han pakabati hini ni Naaman, nasingadto hiya han hadi ngan ginsumatan niya han iginsiring han babayehay. Nagsiring an hadi, “Kadtoa an hadi han Israel ngan dad-a ha iya ini nga surat.” Sanglit linakat hi Naaman dara in 30,000 ka bug-os nga salapi, 6,000 ka bug-os nga bulawan, ngan napulo nga magtahom nga mga panapton. Nasiring an surat nga iya dara: “Magpapakilala kan Naaman nga akon opisyal ini nga surat. Karuyag ko nga tambalon mo hiya han iya sakit.”
Han pakabasa la han surat han hadi han Israel, ginggisi niya an iya panapton ngan nagsiring, “Naglalaom ba an hadi han Siria nga matatambal ko ini nga tawo? Naghuhunahuna ba hiya nga Dyos ako nga may gahom han kinabuhi ug kamatayon? Dayag ini nga nagbibiling la hiya hin pakiaway ha akon!”
Han pakabati ni manaragna Eliseo han nahinabo, nagpatugon hiya han hadi: “Kay ano nga naguguol ka hin duro? Pakadia ha akon an tawo ngan pakikitaon ko hiya nga may-ada manaragna ha Israel!” Sanglit nasingadto hi Naaman upod an iya mga kabayo ngan karuwahe, ngan inukoy hiya ha aragian han balay ni Eliseo. Nagsugo hin surugoon hi Eliseo nga sumatan hi Naaman nga kumadto ngan lumurop hiya ha Salog Jordan makapito, ngan mauupay an iya sakit. Kundi linakat hi Naaman nga puno hin kasina ngan nasiring ha iya ngahaw, “Kasiring ko adto nga makadi hiya ha akon, mag-aampo ngadto ha Ginoo nga iya Dyos, magpapandong han iya kamot ha bawbaw han akon sakit, ngan tatambalon ako! Labot pa, diri ba mauruupay han bisan ano nga salog ha Israel an mga salog han Abana ug Farfar ha Damasco? Didto nala unta ako malurop ngan maupay!” Sanglit tinalikod ngan linakat hiya nga puno in kasina.
Dinaop ha iya an iya mga surugoon ngan nagsiring, “Kon ginsugo ka han manaragna hin pagbuhat hin butang nga makuri, gintutuman mo ada. Yana, kay ano nga diri ka na la lumurop sumala han iya iginsiring, ngan maupay?” Sanglit linugsong ha Jordan hi Naaman ngan linurop hiya makapito sumala han iginsiring ni Eliseo, ngan naupay gud hiya. Nagmaupay ngan nagmahamis na an iya lawas sugad hin kanan bata. Binalik hiya kan Eliseo upod an ngatanan niya nga mga tawo ngan nagsiring, “Yana maaram na ako nga waray iba nga diyos kundi an Dyos la han Israel.”
An Pulong han Ginoo.
SALMO RESPONSORIO
Sal 42:2, 3; 43:3, 4
(b) Inuuhaw ako ha imo, an buhi nga Dyos, san-o ako kakadto ngan pagsisingba ha imo atubangan.
1. Sugad hin bugsok nga inuuhaw
hin mahagkot nga tubig,
inuuhaw man ako ha imo, O Dyos. (b)
2. Inuuhaw ako ha imo,
an buhi nga Dyos.
San-o ako kakadto ngan pagsisingba
ha imo atubangan? (b)
3. Pasigaha an imo kapawa
ngan an imo kamatuoran;
pagmandoan unta ako nira
ngan pabalikon ha Sion,
nga imo baraan nga pungtod,
ngan ha imo Templo, nga imo gin-uokyan. (b)
4. Niyan mapakadto ako ha imo altar, O Dyos;
ikaw an burabod han akon kalipayan.
Patotokaron ko an akon arpa
ngan magkakanta ako ha imo,
O Dyos, nga akon Dyos. (b)
PAGBASA II
Lc 4:24-30
Pagbasa tikang han santos nga Ebanghelyo sumala kan San Lucas.
Nagpadayon hi Jesus, “Susumatan ko kamo hini: Diri tinutuod in usa nga manaragna ha iya kalugaringon nga bungto. Pamati kamo: matuod nga damo hadto in mga balo ha Israel ha panahon ni Elias, han waray umuran hin tulo ka tuig ngan tunga, ngan may dako nga kagutom ha bug-os nga tuna. Kundi waray pakadto hi Elias ha bisan kanay ha ira, kundi ngadto hin usa la nga balo ha Sarepta, ha tuna han Sidon. Ngan may hadto damo nga mga sanlahon ha Israel ha panahon ni manaragna Eliseo, kundi waray bisan usa ha ira nga ginlinisan, labot kan Naaman nga taga-Siria.” Napungot an ngatanan nga mga tawo ha sinagoga han pakabati nira hini. Nagkabuhat hira, gindanas nira hi Jesus ha gawas han bungto ngan gindara hiya ha bawbaw han bukid nga gintukoran han ira bungto. An ira tuyo amo an paghulog ha iya ngadto han umpas. Kundi nagtarap hiya ha butnga han kadam-an ngan linakat.
An Ebanghelyo han Ginoo.