Kinaadlaw nga Pagbasa
PAGBASA I
Os 14:2-10
Pagbasa tikang han basahan ni Oseas nga manaragna.
Balik ngadto han Ginoo ngan ighalad niyo ha iya ini nga pag-ampo: “Pasayloa kami han ngatanan nga amon mga sala ngan karawta an amon pag-ampo, ngan pagdadayawon ka namon sumala han amon iginsaad. Diri gud makakatalwas ha amon an Asiria ngan diri makakapanalipod ha amon an mga kabayo hin pakig-away. Diri na gud kami masiring han amon mga diyosdiyos nga amon hira Dyos. O Ginoo, ipakita an imo kalooy hadton waray na gud iba nga sadang kadangpan.”
Nasiring an Ginoo, “Pababalikon ko ngadi ha akon an akon mga tawo. Hihigugmaon ko hira hin kinasingkasing; diri na ako masisina ha ira. Para han mga tawo han Israel masusugad ako hin uran dida hin mamara nga tuna. Manmumuswak hira sugad hin mga bukad; manggagamot hira hin marig-on sugad han kakahoyan han Libano. Mabubuhi hira hin bag-o nga pagtubo, ngan magmamatahom sugad hin mga kahoy nga olibo. Magmamahamot hira sugad han mga sidro han Libano. Mag-uokoy na liwat hira ha ubos han akon pagpanalipod. Magtatanom hira ha ira mga uma, ngan magmamabungaon sugad hin urubasan. Masusugad hira kabantogan han bino han Libano.
Diri na manginginlabot hin mga diyosdiyos an mga tawo han Israel, babatonon ko an ira mga pag-ampo ngan mamangnoan ko hira. Sugad hin marampag nga kahoy pasisirongon ko hira; amo ako an burabod han ngatanan nira nga mga kaupayan.”
Masayod unta adton mga makinaadmananon han iginsurat dinhe ngan matugkad unta nira ini. Magtadong an mga paagi han Ginoo ngan nabubuhi an magtadong nga mga tawo pinaagi hin pagsunod hini, kundi mahipapakdol ngan matutumba an mga makasasala kay ginpapasibay-an ini nira.
An Pulong han Ginoo.
SALMO RESPONSORIO
Sal 81:6c-8a, 8bc-9, 10-11ab, 14 & 17
(b) Ako an Ginoo nga imo Dyos; pamatii an akon tingog.
1. Nabati ako hin diri kinikilala nga tingog nga nasiring,
“Ginkuha ko ha iyo an magbug-at nga mga pinas-an;
iginpabutang ko ha iyo an iyo mga alat.
Nagtawag kamo ha akon ngan gintalwas
ko kamo han nakada kamo ha kakurian.” (b)
2. Ginbaton ko kamo tikang han akon
taragoan dida han bagyo;
Ginpruybahan ko kamo didto
han mga sapa ha Meriba.
Pamati han akon pahimangno, akon katawhan;
O Israel, karuyag ko unta nga mamati kamo ha akon! (b)
3. Kinahanglan diri gud kamo mag-alagad
hin langyaw nga diyos,
o magsingba kan bisan hin-o gawas ha akon.
Amo ako an Ginoo nga imo Dyos
nga nagpagawas ha imo han tuna han Ehipto. (b)
4. Ungara ko gud unta nga mamati
ha akon an akon katawhan;
Ungara ko gud unta nga magsugot hira ha akon!
Pakakaonon ko ikaw han gimamaupayi nga trigo
ngan patutunghon ko ikaw
hin ihalas nga dugos. (b)
PAGBASA II
Mc 12:28-34
Pagbasa tikang han santos nga Ebanghelyo sumala kan Marcos.
Nakadto in magturutdo han Balaod nga nakabati han ira hirohimangraw. Nakita niya nga maupay an kabaton ni Jesus han mga Sadusiyo, sanglit dinmaop hiya hin pagpakiana, “Ano nga sugo an gidadakoi han ngatanan?” Ngan nagbaton hi Jesus, “Amo ini an gidadakoi han ngatanan: ‘Pamati, Israel! An Ginoo nga aton Dyos amo gud la hiya an Ginoo. Kinahanglan higugmaon mo an Ginoo nga imo Dyos ha bug-os mo nga kasingkasing, ha bug-os mo nga kalag, ha bug-os mo nga kusog.’ Ngan amo ini an sunod nga gidadakoi: ‘Kinahanglan higugmaon mo an imo igkasi-tawo sugad ha imo ngahaw.’ Waray na iba nga sugo nga malabaw hini nga duha.” Nagsiring kan Jesus an magturutdo han Balaod, “Maupay nga imo kaasoy, Magturutdo. Matuod gud, sumala han imo siring, nga an Ginoo gud la an Dyos, ngan waray na iba labot ha iya. Sanglit kinahanglan humigugma han Dyos an tawo ha bug-os niya nga kasingkasing, ha bug-os niya nga hunahuna, ngan ha bug-os niya nga kusog, ngan kinahanglan humigugma hiya han iya igkasi-tawo sugad ha iya kalugaringon. Labaw hin kamapulsanon an pagtuman hini nga duha nga mga sugo kay hin paghalad hin mga hayop ngan hin iba nga mga halad ngadto sa Dyos dida ha altar.” Nasabtan ni Jesus an kamaupay han iya baton, sanglit ginsiring ini hiya niya, “Diri ka na hirayo han Ginhadian han Dyos.” Katapos hini waray na may nagpasipara hin pagpakiana kan Jesus.
An Ebanghelyo han Ginoo.