Kinaadlaw nga Pagbasa
PAGBASA I
Jos 5:9a, 10-12
Pagbasa tikang han basahan ni Josue nga manaragna.
Nagsiring an Ginoo kan Josue, “Yana ginkuha ko ha iyo an makaarawod nga kahimtang hin pagkaoripon didto ha Ehipto.”
Samtang an mga Israelita nagkampo didto ha Gilgal dida han kapatagan harani han Jerico, nagsaurog hira han Paglabay dida han gab-i han ika-upat (14) nga adlaw han bulan. An pagkabuwas nga adlaw amo an ira syahan nga pagkaon hin mga abot ha Canaan: sinanlag nga trigo ug tinapay nga waray patubo. Inukoy na an mana hin kahulog tikang ha kahitas-an ug nawarayan na hini an mga Israelita. Tikang hadto an ira mga pagkaon tikang na han mga abot ha Canaan.
An Pulong han Ginoo.
SALMO RESPONSORIO
Sal 34:2-3, 4-5, 6-7
(b) Tilawi ngan kitaa an pagkamaupay han Ginoo.
1. Pasalamatan ko pirme an Ginoo,
pagdayaw ha iya di’ maundang ako.
Tungod han iya buhat ak’ dadayawon,
an ginsakit mamati, magmalipayon! (b)
2. An pagkaharangdon han aton Ginoo,
upod ha akon isangyaw na gud niyo;
pagdayaw ha iya mag-urusa kita,
aton pagbayawon adton ngaran niya.
Nag-ampo ak’ ngan ginbaton han Ginoo,
gintalwas niya han tanan kahadlok ko. (b)
3. Tan-aw ha iya ngan magmalipayon man;
di’ na mahiawod, di’ na maalohan.
Nasangpit an kabos ngan nabaton hiya,
natalwas han tanan kakurian nira. (b)
PAGBASA II
2 Cor 5:17-21
Pagbasa tikang han Ikaduha nga Surat ni San Pablo ngadto han mga taga Corinto.
Adton nakikig-usa na kan Cristo nahihimo nga bag-o nga tawo; waray na an daan, liniwanan na hin bag-o. Ginbuhat ini ngatanan han Dyos nga pinaagi kan Cristo naghimo ha aton nga mga sangkay han Dyos, diri na mga kaaway, ngan iginhatag ha aton an buruhaton hin paghimo han iba nga iya liwat kasangkayan. Amo ini an amon mensahe: nga pinaagi kan Cristo nakikigsangkay an Dyos han ngatanan nga mga tawo. An Dyos diri nagdudumot han ira mga sala, ngan gintagan kita niya han mensahe kon ginpapaunan-o niya paghimo ha ira nga iya kasangkayan. Sanglit iini kami nagyayakan para kan Cristo, sugad nga an Dyos nahangyo ha iyo pinaagi ha amon. Tungod kan Cristo nahangyo man kami ha iyo: tugoti nga himoon kamo han Dyos nga iya mga sangkay, diri na mga kaaway. Waray gud sala hi Cristo, kundi tungod ha aton, ginpaangbit hiya han Dyos han aton sala, basi nga ha aton pakigkausa ha iya, makaangbit man kita han pagkamatadong han Dyos.
An Pulong han Ginoo.
PAGBASA IIi
Lc 15:1-3, 11-32
Pagbasa tikang han santos nga Ebanghelyo sumala kan Lucas.
Usa ka panahon hinarani hin pamati kan Jesus in damo nga mga parasukot hin buhis ngan mga makasasala. Nagtikang pagngurutob an mga Parisiyo ngan an mga magturutdo han Balaod, “Nakarawat man ini nga tawo hin mga makasasala, ngan nakikigsaro pa ngani ha ira!” Sanglit ginsumatan hira ni Jesus hini nga pananglitan: “May hadto usa ka tawo nga may-ada duha nga anak nga lalake. Nagsiring ha iya an manghod, ‘Tatay, tagi na ako yana han akon malon han mga hiagi.’ Sanglit ginbahin han tawo an iya mga hiagi ngan ihatag ngadto han duha niya nga anak. Paghagos hin pira ka adlaw iginbaligya han manghod an iya bahin ngan binmaya han ira panimalay dara an kwarta. Kinadto hiya hin hirayo nga tuna, diin iya ginkaragan an iya kwarta hin waray pulos nga kinabuhi. Gingasto niya an ngatanan nga iya dara. Dinuroy nga inabot in dako nga gutom didto hadto nga dapit, ngan nawarayan hiya bisan ano. Sanglit kinadto hiya hin pagtrabaho didto hin usa han mga tuminungnong hadto nga tuna ngan ginsugo hiya ngadto ha uma para hin pagmangno hin kababoyan. Karuyag unta niya hin pagkaon han itinutubong han kababoyan, kundi waray man nahatag ha iya hin ano man nga pagkaon. Ha kataposan, nakapanmurubuot hiya ngan nagsiring, ‘Patakas hin pagkaon an ngatanan nga surugoon ni Tatay, ngan hahani ako dinhe nga haros mamatay na hin gutom! Mabangon ako ngan makadto han akon tatay ngan masiring, “Tatay, nakasala ako han Dyos ngan ha imo. Diri na ako takos nga isipon pa nga imo anak. Isipa na la ako nga usa han imo mga surugoon.”’ Sanglit binuhat hiya ngan linakat pag-uli ngadto han amay niya.
“Hirayo pa hiya han balay nga hikit-an hiya han iya amay. Inalpan hin dako nga kalooy an iya tatay, nga nagdalagan hin pagtapo ha iya, ngan gin-gakos ngan ginhadkan hiya. Ngan nagsiring an anak, ‘Tatay, nakasala ako han Dyos ngan ha imo, sanglit diri na ako takos isipon pa nga imo anak.’ Kundi gintawag han amay an iya mga surugoon, ngan sidngon, ‘Dali, kuhaa an gimamaupayi nga panapton ngan isul-ot ha iya, singsingi, ngan sapatosi hiya. Katapos, kuhaa ngan ihawa niyo an pinatambok nga nati nga baka, ngan pagkombite kita! Kay patay na ini nga akon anak, kundi yana buhi na hiya; nawara hiya, kundi yana hin-agian na hiya.’ Ngan nagtikang hira pagkalipay.
“Hito nga takna, nakadto ha uma an magurang nga anak. Han pag-uli na niya, han hiraniay na hiya han balay, hinbatian niya an tukar ngan sarayaw. Gintawag niya in usa han mga surugoon ngan nagpakiana ha iya, ‘Ano ini nga rugyaw?’ Nagbaton an surugoon, ‘Inoli an imo bugto ngan iginpaihaw ni imo tatay an pinatambok nga nati nga baka, kay inoli hiya nga maupay an lawas.’ Duro an kapungot han magurang nga bugto, sanglit waray hiya sumulod han balay; ginawas an amay niya ngan ginhangyo nga sumulod hiya. Ginbaton niya hi iya Tatay, ‘Hunahunaa daw! Sulod hini nga mga katuigan nagbudlay ako sugad hin oripon para ha imo, ngan waray gud ako sumupak han imo mga sugo bisan makausa. Ano in ginhatag nimo ha akon? Waray ngani bisan naman la kanding nga igpapahalipay ko han akon kasangkayan! Kundi ginkaragan hini nga imo anak an ngatanan mo nga hiagi ha maraot nga kinabuhi, ngan ha iya pag-oli, asay mo lugod gin-ihawan han pinatambok nga nati nga baka!’ Nagbaton ha iya an amay, ‘Anak ko, dayuday ko ikaw nga kaupod dinhe, ngan imo an ngatanan nga akon mga butang. Kundi kinahanglan maglipay ngan magrayhak kita, kay namatay ini nga imo bugto, kundi yana buhi na hiya; nawara, kundi yana hin-agian na hiya.’”
An Ebanghelyo han Ginoo.