DOWNLOAD (eMISAL Marso 2025)

PAGBASA I

Is 65:17-21

Pagbasa tikang han basahan ni Isaias nga manaragna.

Nagsiring an Ginoo, “Naghihimo ako hin bag-o nga tuna ngan bag-o nga kalangitan. Hingangalimtan hin hingpit an nag-agi nga mga hinabo. Pagmalipayon ngan pagrayhak ha kadayonan dida han akon ginbuhat. Marayhak gud an bag-o nga Jerusalem nga akon hihimoon, ngan magmamalipayon an iya mga tawo. Marayhak gud ako ngahaw tungod han Jerusalem ngan han iya mga tawo. Mawawaray na pagtangis didto, waray na pagtawag hin pakibulig. Diri na mapatay an kabataan nga minasus-an pa la, ngan hilawig an kinabuhi han ngatanan nga mga tawo. Pag-iisipon nga batan-on pa adton mga usa kagatos (100) na an panuigon. Magigin tigaman han akon pagkastigo ha ira an kamatay nga diri pa maabot hito nga panuigon. Magbabalay an mga tawo ngan pag-uokyan ini nira; diri ini gagamiton hin iba nga tawo. Magtatanom hira hin mga urubasan ngan magpupulos hira han bino—diri ini pag-iimnon hin iba.

An Pulong han Ginoo.

SALMO RESPONSORIO

Sal 30:2 & 4, 5-6, 11-12a & 13b

(b) Magdadayaw ako ha imo, Ginoo,

kay gintubos mo ako.

1. Nagdadayaw ako ha imo, Ginoo,

kay imo na man gintalwas ako,

waray mo itugot mga kaaway nakon,

nga ira na la ako pagyinubiton.

Ikakadto na ako ha Kahiladman,

kundi kamatayon ko imo ginpudngan. (b)

2. Pagkanta, pagdayaw kamo han Ginoo,

kamo, iya matinumanon nga mga tawo;

ginbuhat ha imo, ayaw hingalimti,

ngan hiya, an Baraan, pasalamati.

Diri nag-iiha an iya kasina,

ha kadayonan pagkamaupay niya;

bisan pa ha gab-i may-ada mga luha,

kundi kalipay naabot pagkaaga. (b)

3. Pamatii, Ginoo, ngan kalooyi,

intawon hi ako, Ginoo, buligi!”

Imo ginlipay hin sayaw an kabido,

nalipay ako, nakuha an kasubo.

Ginoo, hi ikaw gud la an Dyos nakon,

akon ka pasasalamatan hin dayon. (b)

PAGBASA II

Jn 4:43-54

Pagbasa tikang han santos nga Ebanghelyo sumala kan Juan.

Katapos hin duha ka adlaw didto, linakat hi Jesus ngan pinmakadto ha Galilea. Hiya ngahaw an nagsiring, “Diri tinutuod an manaragna dida han iya kalugaringon nga tuna.” Han pag-abot niya ha Galilea ginkarawat hiya han mga tawo didto, kay nagpakakita hira han ngatanan nga nabuhat niya ha panahon han Pyesta han Paglabay, han paghingadto nira ha Jerusalem ha panahon han pyesta.

Binalik hi Jesus ngadto ha Cana, ha Galilea, diin ginhimo niya nga bino an tubig. May-ada didto usa nga opisyal han bungto nga may anak nga lalake nga masakit didto ha Capernaum. Han paghibaro niya nga inabot hi Jesus ha Galilea tikang ha Judea, kinadto hiya kan Jesus ngan ginhangyo niya nga masingadto ha Capernaum hin pagtambal han iya anak nga himaratyon. Nagsiring hi Jesus ha iya, “Waray gud ha iyo matoo labot kon hikit-an niyo in dagko nga mga orosahon.” Nagbaton an opisyal, “Tana gad, upod ha akon nga diri pa napatay an akon anak.” Ginsiring hiya ni Jesus, “Kadto na, mabubuhi an imo anak.”

Tinoo an tawo han mga pulong ni Jesus ngan linakat hiya. Dida ha dalan, han tipauli hiya, ginsugat hiya han iya mga surugoon upod an sumat nga buhi an iya anak.

Ginpakianhan niya hira kon ano nga oras nahiolian an iya anak. Nagbaton hira, “Nalunasan hiya han iya hiranat kakulop han ala una.” Nahinumdom an amay nga amo gud nga takna an pagsiring ni Jesus ha iya, “Mabubuhi na an imo anak.” Sanglit, tinoo hiya ngan an bug-os niya nga panimalay. Amo ini an ikaduha nga milagro nga ginbuhat ni Jesus han pag-abot niya ha Galilea tikang ha Judea.

An Ebanghelyo han Ginoo.