PAGBASA I

Ezeq 47: 1-9, 12

Pagbasa tikang han basahan ni Ezequiel nga manaragna.

Iginbalik ako han tawo ngadto han aragian han Templo. May nag-aawas nga tubig tikang ha ilarom han aragian ngan tipakadto ha sinirangan, ngain naatubang an Templo. Nag-aawas ini tipaubos tikang ha ilarom han timogan nga bahin han Templo ngadto han timogan han altar. Iginggawas ako han tawo tikang han tinitindogan han Templo, pinaagi han amihanan nga ganghaan, ngan iginlibot ako ngadto han ganghaan nga naatubang ha sinirangan. May nag-aawas nga gutiay nga sapa didto han timogan han ganghaan. Pinaagi han iya isurukol nga kahoy, nagsukol an tawo hin lima ka gatos (500) ka metros tipailawod ngadto ha sinirangan, ngan ginpasugbo ako niya han sapa. Inabot la ha akon mukubuko an kahilarom han tubig. Niyan nagsukol liwat hiya hin lain nga lima ka gatos (500) ka metros, ngan inabot ha akon tuhod an kahilarom han tubig. Nagsukol hiya hin lima ka gatos (500) ka metros pa, ngan didto hilarom na gud an sapa, nga waray na ako pakakatugkad. Hilarom na gud ini pagtabokon labot kon paglangoyon. Nagsiring hiya ha akon, “Anak hin tawo, tigamni hin maupay ini ngatanan.”

Niyan, iginbalik ako han tawo ngadto han pangpang han salog, ngan han pag-abot ko didto, hinkit-an ko nga damo hin duro in kakahoyan dida han tagsa nga pangpang. Nagsiring hiya ha akon, “Nag-aawas ini nga tubig dida han tuna ngadto ha sinirangan, ngan nalugsong ngadto han Kahamub-an han Jordan, ngan ngadto han Dagat nga Patay. Kon naawas ini ngadto han Dagat nga Patay, liniliwanan hini hin matab-ang nga tubig an mapag-ad nga tubig hito nga dagat. Bisan ngain aawas an sapa, magkakamay-ada magkalainlain nga kamanampan ngan kaisdaan. Patatab-angon han sapa an tubig han Dagat nga Patay, ngan bisan ngain ini aawas, magdadara ini hin kinabuhi. Dida han tagsa nga pangpang han sapa maturok an magkalainlain nga mga kahoy nga mahatag hin pagkaon. Diri malalaya an ira mga dahon, ngan diri gud maukoy hin pamunga. Mamumunga ini hin bag-o nga mga bunga, kada bulan, kay tinutubigan ini han sapa nga nag-aawas tikang han Templo. Mahatag hin pagkaon an mga kahoy, ngan magagamit an mga dahon hini hin pagtambal hin mga tawo.”

An Pulong han Ginoo.

SALMO RESPONSORIO

Sal 46: 2-3, 5-6, 8-9

(b) An Ginoo han kagamhanan upod ha aton; an Dyos ni Jacob amo an aton karig-on.

1. An Dyos an at’ kusog ngan an panalipod,

kon may kasamokan andam pagbulig gud.

2Sanglit di’ mahadlok, bis' tuna mabay-og,

Bis’ an kabukiran ha dagat mahulog. (b)

2. Syudad han Dyos may lipay tikang hin salog,

ha baraan balay han Gilabawi gud.

An Dyos nagpupuyo dida hit' nga syudad,

ngan diri gud ito manta mababantad.

Ha temprano pa gud hiton kaagahon

naabot na hiya pagbulig gihapon. (b)

3. Upod ta’n Ginoo Labaw han Ngatanan.

Dyos ni Jacob amo an at’ darangpanan;

Kadi, kitaa an iya binuhatan,

mga buhat niya nga kahiburongan. (b)

PAGBASA II

Jn 5:1-16

Pagbasa tikang han santos nga Ebanghelyo sumala kan Juan.

Katapos hini, nagpyesta an mga Judiyo ngan napakadto hi Jesus ha Jerusalem. Didto ha Jerusalem, hirani han Portahan han mga karnero, may usa nga linaw nga parigoan, nga may lima nga mga balkon. Betsata an ngaran hini ha Hebreohanon. Nakada hini nga mga balkon in damo nga mga magsakit—mga buta, mga piay, ngan mga lulid. [Naghuhulat hira nga bumantad an tubig, kay may panahon nga nalugsong ha linaw in usa nga anghel han Ginoo ngan inuukay niya an tubig. An una nga makalugsong nga masakit, katapos maukay an tubig, nauupay han bisan ano nga iya sakit.] May didto usa nga tawo nga ikakatloan kagwalo (38) ka tuig na an iya kasakit. Hinkit-an hiya nga nahigda didto, ngan maaram hi Jesus nga maiha na hin duro an kasakit han tawo; sanglit ginsiring hiya, “Karuyag mo ba mag-upay?” Binaton an masakit, “Waray man nagdadara ha akon ngadto ha linaw kon inuokay na an tubig. Samtang tilugsong pa la ako, hin-uunhan na ako han iba.” Ginsiring hiya ni Jesus, “Buhat, dad-a an imo higdaan, ngan lakat.” Naupay dayon an tawo; gindara niya an iya higdaan, ngan linakat.

Nahinabo ini ha Adlaw nga Iparahuway, sanglit ginsiring han mga punoan nga Judiyo an tawo nga naupay, “Adlaw nga Iparahuway yana, ngan supak ha aton Balaod an pagdara han imo higdaan.” Binaton hiya, “Ginsiring ako han tawo nga nagtambal ha akon, ‘Dad-a an imo higdaan ngan lakat.’” Nagpakiana hira ha iya, “Hin-o ini nga tawo nga nagsugo ha imo hin pagdara han imo higdaan ngan lakat?” Kundi waray makakilala an natambal nga tawo kon hin-o an nagtambal ha iya, kay nasalipdan hi Jesus han damo nga mga tawo nga nakadto didto han iya paggawas. Katapos hini, iginkatapo hiya ni Jesus didto han Templo ngan ginsiring hiya, “Kitaa maupay ka na; bayai na an imo sala, kay bangin lugod labaw pa kamaraot an mahinabo ha imo.” Ngan linakat an tawo ngan iya ginsumatan an mga punoan nga Judiyo nga hi Jesus an nagtambal ha iya. Tungod hini nagtikang hira pagdumot kan Jesus, kay ginbuhat niya ini nga pagtambal ha Adlaw nga Iparahuway.

An Ebanghelyo han Ginoo.