PAGBASA I

Kin Sol 2: 1a, 12-22

Pagbasa tikang han Basahan han Kinaadman.

Sayop an magraot nga mga tawo kon nasiring hira ha ira ngahaw, “Mga magsamok an magtadong nga mga tawo, sanglit pangita kita hin mga higayon hin pagpatay ha ira. Nalaris hira han aton ginbubuhat, ginsusumbong kita nira nga nagtatalapas kita han Balaod ni Moises ngan nasupak han mga pagturon-an han aton kaapoy-apoyan. Nagtutug-an hira nga hira an nakilala han Dyos, ngan natawag hira ha ira ngahaw nga mga anak hira han Ginoo. Diri kita nailob hin pagkita hin sugad nga mga tawo; nakontra hira han bug-os naton nga panhunahuna. Diri hira sugad han iba nga mga tawo, malain an ira mga paagi. Naghuhunahuna hira nga uraura hin kamaraot an aton pamatasan nga angay paglikyan an ngatanan nga aton ginbubuhat. Naghihinambog hira nga ira Amay an Dyos, ngan nagtotoo hira nga kon igsiring ngan pagbuhaton na an ngatanan, an mga magtadong la an magmamalipayon. Kundi kikitaon ta kon matuod ba ni! Kitaa ta kon ano an mahinanabo kon umabot na an takna han ira kamatay! Kon tinuod nga mga anak han Dyos an mga magtadong, tatalwason hira han Dyos tikang han ira mga kaaway. Sanglit sarihi ta hira. Pagraraogdaogon ta hira, ngan pagsasakiton ta hira; niyan hisasabotan ta kon tiunan-o an ira kamurayaw ngan kamatadong! Hibabaroan ta kon tubtob ngain an ira pagpailob! Pagsisirotan ta hira hin makaarawod nga kamatayon. Kon baga sidngon, ira man siring nga pananalipdan hira han Dyos.”

Amo ito an panhunahuna han magraot nga mga tawo, kundi nagsasayop hira. Ginbubuta hira han kalugaringon nira nga pagkamaraot. Waray gud hira mahibaro han mga tinago han Dyos, waray gud hira maglaom han mga balos hin usa nga baraan ngan waray ikakasuson nga kinabuhi.

An Pulong han Ginoo.

SALMO RESPONSORIO

Sal 34: 17-18, 19-20, 21 & 23

(b) Suok kaupay an Ginoo hadton magsulob-on ha kasingkasing.

1. Kontra hiya han nabuhat hin karat-an,

ngan limoton hira han ira katawhan.

An Ginoo namamati han magtadong,

kakurian nira iya kukuhaon. (b)

2. Hiraniay gad la an aton Ginoo

hadton mga nahuhulop na hin duro.

Tinatalwas niya adton nagugupong,

an nawad-an na han tanan nga paglaom.

Damo an gin-aantos nga kakurian

hadton mga mag-upay gud nga katawhan;

kundi an Ginoo may’da katalwasan,

tinatalwas hira hini gud ngatanan. (b)

3. Han Ginoo gudman hira babantayan,

Di’ gud madudugmok ira mga tul-an.

Kanan Ginoo nga mga surugoon

han Ginoo manta hira tatalwason;

diri gudman niya hira sisirotan

an naayop ha iya nga panalipdan. (b)

PAGBASA II

Jn 7:1-2, 10, 25-30

Pagbasa tikang han santos nga Ebanghelyo sumala kan Juan.

Nagsudoy hi Jesus ha Galilea. Waray hiya maruyag pagsudoy ha Judea, kay gin-iiparatay hiya didto han mga punoan nga Judiyo. Hirani na an kanan Judiyo Pyesta han mga Tabernakulo.

Pinaorhe hi Jesus han iya kabugtoan hin pagkadto ha pyesta; waray hiya magpadayag, kundi hilit la an iya pagkadto.

 Nagsiring in pira nga mga tawo ha Jerusalem, “Diri ba ini an tawo nga gin-iiparatay nira? Kitaa, nagyiyinakan hiya ha kadaygan, ngan waray na lugod nagyayakan hin pagriwa ha iya! Tungod ba ito nga maaram na gud an mga punoan nga amo na hiya an Mesiyas? Kundi kon umabot na an Mesiyas, waray mahibabaro kon diin hiya tikang. Kundi maaram kita ngatanan kon diin tikang ini nga tawo.”

Han nagtututdo hi Jesus ha Templo, nagsiring hiya ha dako nga tingog, “Tinuod ba nga nakilala kamo ha akon, ngan maaram kon diin ako tikang? Kundi waray ako kumanhi ha akon la pagbuot. An may katungod hin pagsugo amo an nagsugo ha akon, kundi diri kamo nakilala ha iya. Nakilala ako ha iya, kay tikang ako ha iya, ngan hiya an nagsugo ha akon.” Ngan gin-idarakop hiya nira, kundi waray naglabot ha iya, kay waray pa man umabot an iya takna.

An Ebanghelyo han Ginoo.