PAGBASA I

Jer 11: 18-20

Pagbasa tikang han Basahan ni Jeremias nga manaragna.

Ginsumatan ako han Ginoo nga an akon mga kaaway nakahunahuna hin paglingo ha akon.

Sugad la ako hin maaghop nga nati nga karnero nga ginkuha basi pag-ihawon, ngan waray ako kalibutan nga an ira magraot nga mga larang kontra ngay-an ha akon. Nagsiring hira, “Pagpudla ta an kahoy samtang linghod pa ini; pataya ta hiya basi waray na mahinumdom ha iya.”

Niyan nag-ampo ako, “O Ginoo nga Labi Kamakagarahum, matadong ka nga maghurukom; ginsasarihan mo an mga panhunahuna ngan mga pagbati han mga tawo. Igintubyan ko ha imo mga kamot an akon gintutuyo; sanglit pakitaa ako han imo pagbulos hini nga mga tawo.”

An Pulong han Ginoo.

SALMO RESPONSORIO

Sal 7:2-3, 9bc-10, 11-12

(b) Ginoo nga Dyos ha imo nasalipud ako.

1. Ginoo, akon Dyos,

ako nadangop hin panalipod;

Talwasa ako ngan bawia han mga nagbubukod,

bangin sugad hin liyon ako nira dad-on

ha dapit nga waray makakatalwas ha akon,

ngan didto ira ako paghunothunoton. (b)

2. Upaya ha akon an paghukom

kay waray sala ako.

Ikaw an Dyos nga matadong,

naghuhukom han hunahuna ug

karuyagan namon.

Han magraogdaog nga tawo

paukya an karat-an,

ngan tagi hin pahalipay an tawo nga buotan. (b)

3. An Dyos amo an nasalipod ha akon;

natalwas hiya hadton mga masinugtanon.

An Dyos matadong nga maghurukom

han ngatanan,

an magraogdaog kanunay iya pagsisirotan. (b)

PAGBASA II

Jn 7:40-53

Pagbasa tikang han santos nga Ebanghelyo sumala kan Juan.

Han pakabati han damo nga mga tawo hini nga siring ni Jesus, nabuhag hira. May-ada nasiring, “Amo na gud ini an Manaragna!” Nagsiring liwat an iba, “Amo na hiya an Mesiyas!” Kundi nagsiring pa an iba, “Diri matikang ha Galilea an Mesiyas! Nasiring an kasuratan nga magigin tulin ni David an Mesiyas, ngan matatawo ha Betlehem, an bungto nga gin-ukyan ni David.” Sanglit tungod ha iya nagkabuhag an mga tawo. Karuyag magdakop kan Jesus an pira ha ira, kundi waray gud nagpasipara hin pagkapot ha iya.

Binalik an mga gwardya ngadto han mga Parisiyo ngan mga puno han kapadian nga nagpakiana ha ira, “Kay ano nga waray man niyo dad-a hiya?” Nagbaton an mga gwardya, “Waray pa gud tawo nga naghimangraw hin sugad nga pagyakan hini nga tawo!” Nagpakiana an mga Parisiyo, “Nalimbongan ba liwat kamo niya? May-ada na ba niyo hinbaroan nga usa han mga punoan o usa nga Parisiyo nga tinoo ha iya? Diri nasabot ini nga mga tawo han Balaod ni Moises, sanglit ginpanhimaraot hira han Dyos!” Usa han mga Parisiyo amo hi Nicodemo nga nakigkita hadto kan Jesus. Nagsiring hiya ha ira, “Sumala han aton Balaod, diri kita makakaghukom hin tawo kon diri anay naton hibatian hiya ngan hikit-an kon ano an iya nabuhat.” Binaton hira, “Aw ngay-an! Taga-Galilea ka ba liwat? Usisaha an Kasuratan ngan hibabaroan mo nga waray manaragna nga natikang ha Galilea.”

An Ebanghelyo han Ginoo.