PAGBASA I

Is 43:16-21

Pagbasa tikang han Basahan ni Isaias nga manaragna.

Han maiha na nga panahon naghimo an Ginoo hin dalan nga natabok han dagat, hin aragian nga natabok han mabalod nga katubigan. Gindara niya in gamhanan nga kasondalohan ngadto ha pagkapukan, kasondalohan nga may mga karuwahe ngan kakabayohan. Nagkatutumba hira ngan diri na gud mabangon, naparong hira sugad han laga hin suga! Kundi nasiring an Ginoo, “Ayaw na panumdoma han inmagi nga mga hinabo o paghunahuna han nahinabo hin maiha na. Bantayi an bag-o nga butang nga akon pagbubuhaton. Nahinanabo na ini—yana hikikit-an na niyo ini! Maghihimo ako hin dalan nga maglalatas han kamingawan, ngan didto tatagan ko kamo hin mga sapa hin tubig. Pagpapasidunggan ako bisan han ihalas nga kamanampan; pagdadayawon ako han mga lubo ngan mga duong kon paawason ko na in mga salog didto ha kamingawan basi makahatag hin tubig ngadto han akon pinili nga mga tawo. Amo hira an mga tawo nga akon ginhimo para ha akon ngahaw, ngan magkakanta hira hin mga pagdayaw ha akon!”

An Pulong han Ginoo.

SALMO RESPONSORIO

Sal 126:1-2, 2-3, 4-5, 6.

(b) Nagbuhat ha aton an Ginoo hin dagko nga mga butang, napuno kita hin dako nga kalipay.

1. Sugad la adto hin inop,

han pagpabalika ha aton han Ginoo ngadto ha Sion!

Hin kamakusog han aton pagkatatawa,

hin kamalipayon han aton pagkaranta! (b)

2. Niyan nagsiring hiunong ha aton an iba nga mga nasod,

“Nagbuhat an Ginoo hin dagko

nga mga butang para ha ira!”

Tinuod gud nga nagbuhat hiya

hin dagko nga mga butang para ha aton;

hin kamalipayon naton hadto! (b)

3. O Ginoo, ibalik kami ha amon tuna,

sugad gud han pagpapabalik hin tubig

ngadto han magmara nga mga salog

pinaagi han imo uran.

Papagbaria hin malipayon,

adton mga nagtangis han pagpugas nira! (b)

4. Mabalik ngan magkakanta hin malipayon,

nga nagdadara han binari,

adton mga nagtangis han paggawas nira

nga gindadara an binhe! (b)

PAGBASA II

Flp 3:8-14

Pagbasa tikang han Surat ni San Pablo ngadto han mga taga Filipo.

Diri la adto nga mga butang, kundi an ngatanan pinakawaray ko na la, tungod hin labaw pa nga kaupayan, nga amo an pakakilala kan Cristo Jesus nga akon Ginoo. Tungod ha iya, ginsalikway ko an ngatanan; para ha akon gin-isip ko la ini nga mga binayaan na, basi maangkon ko hi Cristo, ngan mahingpit an akon pakig-usa ha iya. Waray na ako pagkamatadong nga pinasikad han Balaod, kundi naangkon ko na an pagkamatadong nga ihinatag pinaagi hin pagtoo kan Cristo, an pagkamatadong nga tikang sa Dyos, ngan pinasikad han pagtoo. An akon la karuyag amo nga makilala ko hi Cristo ngan hiagoman ko an gahom han iya pagkabanhaw; nga makaangbit ako han iya mga pag-antos ngan mahinugad ako ha iya dida ha iya pagkamatay, 11upod an paglaom nga babanhawon ako niya.

Diri gud ako nasiring nga naangkon ko na ini, o nga hingpit na ako. Kundi nagpapadayon ako hin paniguro basi makab-ot ko an upa tungod kay gin-angkon na ako ni Cristo Jesus. Matuod, kabugtoan ko, diri gad ako nasiring nga nadaog ko na ini; an maupay buhaton amo nga hingalimtan ko an naglabay ngan talinguhaon ko sugad han akon mahihimo, nga makab-ot ko an sarangputan nga akon inaatubang. Sanglit, nadalagan ako hin waray, pagsimang ngadto han sarangputan, basi madaog ko an upa nga amo an pagtawag han Dyos pinaagi kan Cristo Jesus ngadto han kinabuhi nga waray kataposan.

An Pulong han Ginoo.

PAGBASA III

Jn 8:1-11

Pagbasa tikang han santos nga Ebanghelyo sumala kan Juan.

Ngan nanguli an ngatanan, kundi napakadto hi Jesus ha Bukid han mga Olibo. Han pagkabuwas han temprano pa, binalik hiya ha templo. Ginalirongan hiya han mga tawo, ngan liningkod hiya ngan nagtikang hin pagtutdo ha ira. Gindara han mga magturutdo han Balaod ngan mga Parisiyo in usa nga babaye nga hindakpan nga nanlibog, ngan ginpatindog hiya ha atubangan nira ngatanan. Nagsiring hira kan Jesus, “Magturutdo, hindakpan ini nga babaye nga nanlibog. Ha aton Balaod, iginsugo ni Moises nga kinahanglan batoon tubtob han kamatay in sugad nga babaye. Yana, ano man an imo isisiring?” Iginsiring nira ini hin pagbitik ha iya, basi mahisumbong nira hi Jesus. Kundi tinamod hi Jesus ngan nagsurat ha tuna pinaagi han iya tudlo. Samtang nagpipinakiana hira, tinukdaw hi Jesus ngan nagsiring ha ira, “Umona hin pagbato ha iya an waray sala ha iyo.” Ngan tinamod na liwat hiya ngan nagsurat ha tuna. Han pakabati nira hini, nagpatag-usa hira hin pagbaya, tikang han mga magurang. Nahibilin na la hi Jesus, ngan an babaye nga nakada pa harani ha iya. Hinangad hi Jesus ngan nagpakiana ha iya, “Hain naman hira, Mana? Waray ba nahibilin hin pagsirot ha imo?” “Waray, bisan usa,” nagbaton an babaye. Nagsiring hi Jesus, “Diri liwat ako magsisirot ha imo. Hala, kadto na, kundi ayaw na pagpinakasala.”

An Ebanghelyo han Ginoo.