PAGBASA I

Jer 20:10-13

Pagbasa tikang han Basahan ni Jeremias nga manaragna.

Hinbabatian ko nga nahuring an ngatanan, “Aada na ha ngatanan nga dapit an makaharadlok! Sanglit igsumbong ta hiya ngadto han mga punoan!” Bisan an akon suok nga kasangkayan naghuhulat han akon pagkapukan. “Bangin mabibitik ta hiya,” nasiring hira; “niyan madadakop ta hiya ngan makakabulos kita.” Kundi ugop ka ha akon, O Ginoo nga makusog ngan gamhanan, ngan diri makakadaog adton mga nagtitimaraot ha akon. Maaalohan hira ha kadayonan, kay diri hira magmamainuswagon. Diri gud hingangalimtan an ira makaarawod nga buhat. Kundi, O Ginoo nga Labi Kamakagarahum, ginsasarihan mo hin matadong an mga tawo; maaram ka han ira mga kasingkasing ug mga hunahuna. Sanglit pakitaa ako han pagbulos mo han akon mga kaaway, kay igintubyan ko ha imo mga kamot an akon gintutuyo. Pagkanta ngadto han Ginoo! Pagdayawa an Ginoo! Tinatalwas niya an mga gintatalumpigos tikang ha gahom han magraot nga mga tawo.

An Pulong han Ginoo.

SALMO RESPONSORIO

Sal 18:2-3a, 3bc-4, 5-6, 7

(b) Ha akon kasakitan, nagtawag ako han Ginoo ngan pinamatian ako niya.

1. Pagkadako han akon gugma ha imo,

kay ikaw an panalipod ko, Ginoo!

An Ginoo an naalinsakob ha akon,

makusog nga arayopan ngan madig-on. (b)

2. An Dyos an akon sinasalirongan,

kon upod ha iya waray kahadlokan.

Sukad hin taming iya ako sinasalipdan,

ngan dida ha iya waray kabarak-an.

Dayawon an Ginoo nga gintawag nakon,

kay ha mga kaaway ako tatalwason. (b)

3. Nag-aalirong ha akon an kamatayon;

balod han kapukan linmapwas ha akon.

An pagkamatay aanhi man ha akon;

han lubnganan hi ako kakarawaton. (b)

4. Ha kakurian, gintawag ko an Ginoo;

ginsangpit ko hiya nga buligan ako.

Didto ha templo iya ako ginbaton,

namati hiya han pakibulig nakon. (b)

PAGBASA II

Jn 10:31-42

Pagbasa tikang han santos nga Ebanghelyo sumala kan Juan.

Nanurot na liwat an mga Judiyo hin mga bato paglabay ha iya. Ginsiring hira ni Jesus, “Damo nga mga mag-upay an akon nabuhat ha iyo atubangan nga sugo han akon Amay; hain man hini nga mga buhat in pinasisikaran niyo hin pagbato ha akon?”

Nagbaton an mga Judiyo, “Ginbabato ka namon diri tungod hin ano man nga mag-upay nga mga buhat, kundi tungod han imo pagpasipara han Dyos! Nagpapaka-Dyos ka, nga tawo ka man la!” Nagbaton hi Jesus, “Di ba nahisurat ha iyo kalugaringon nga Balaod nga nagsiring an Dyos, ‘Mga dyos kamo’? Maaram kita nga matuod ha kadayonan an iginsisiring han kasuratan, ngan gintawag han Dyos nga mga dyos adton mga tawo nga gintaporan han iya mga pulong. Mahitungod ha akon, ginpili ako han Amay ngan ginsugo nganhi ha kalibutan. Sanglit uunanhon pakasiring niyo nga nagpapasipara ako han Dyos tungod han pagsiring ko nga amo ako an Anak han Dyos? Sanglit angay diri kamo tumoo ha akon kon diri ako nagbubuhat han mga buhat han akon Amay. Kundi kon nagbubuhat man ako, bisan kon diri kamo natoo ha akon, kinahanglan tumoo kamo bisan na man la han akon mga buhat, basi hibaroan ngan masayoran niyo nga aadi ha akon an Amay, ngan aada ako ha iya.” Gin-idarakop na liwat hiya nira, kundi nakapudlos hiya tikang ha ira mga kamot.

Binalik na liwat hi Jesus ngadto ha tabok han Salog han Jordan, ngadto han dapit diin nanunyag hi Juan, ngan nagpabilin hiya didto. Pinakadto ha iya in damo nga mga tawo. Nagsiring hira, “Waray magbuhat hi Juan hin mga orosahon, kundi puros matuod an iginsiring niya mahitungod hini nga tawo.” Ngan damo nga mga tawo didto in tinoo kan Jesus.

An Ebanghelyo han Ginoo.