DOWNLOAD | eLEKSYONARYO - SEMANA SANTA

PAGBASA I 

Is 49: 1-6

Pagbasa tikang han basahan ni Isaias, an Manaragna.

Pamati ha akon, higrayo nga kanasoran, kamo nga mga tawo nga harayo hin duro an gin-uokyan! Ginpili ako han Ginoo han waray pa ako katatawo, ngan gintudlok ako nga magin iya surugoon. Ginhimo niya an akon mga pulong nga sugad hin espada kamatarom. Ginpanalipdan ako niya pinaagi han iya kalugaringon nga kamot. Ginhimo ako niya nga sugad hin pana nga matarom ngan andam paggamita. Nagsiring hiya ha akon, “Israel, ikaw an akon surugoon; pagdadayawon ako hin mga tawo tungod ha imo.”

Nagsiring ako, “Nagkabudlay ako, kundi hin kawaray pulos hini! Ginggamit ko an akon kusog, kundi waray ko man nahimo nga bisan ano.” Kundi makakasarig ako han Ginoo nga pananalipdan niya an akon mga katadongan; pagbabaloson ako niya tungod han akon ginbubuhat. Gintudlok ako han Ginoo han waray pa ako katatawo; ginhimo ako niya nga iya surugoon ha pagpabalik han iya mga tawo, ha pagpabalik han nagsasarang nga mga tawo han Israel. Ginpasidunggan ako han Ginoo; amo hiya an surok han akon kusog. Nagsiring ha akon an Ginoo, “May-ada ko darudako nga buruhaton para ha imo nga akon surugoon. Diri la nga ibabalik an kagamhanan han nanhisalin nga mga tawo han Israel, kundi hihimoon ko liwat ikaw nga kapawa ngadto han mga nasod—basi matalwas an bug-os nga kalibutan.”

An Pulong han Ginoo.

SALMO RESPONSORIO

Sal 71:1-2, 3-4a, 5ab-6ab, 15 & 17

(b) An akon baba nagpasangyaw han imo katalwasan.

1. Ginoo, talwas ako dida ha imo;

ayaw gud ipapirde ako!

Buligi ngan bawia ako, kay matadong ka.

Pamatii ngan talwasa ako! (b)

2. Magin marig-on ka nga akon salipdanan,

ngan marig-on nga kuta nga arayopan

pagsalipod ha akon;

ikaw an akon arayopan ngan panalipod.

Bawia ako, O Dyos ko,

tikang han magraot nga mga tawo. (b)

3. Nalaom ako ha imo gudla, O Ginoo nga Dyos;

sinarig ako ha imo tikang han bata pa ako.

Tinapod ako ha imo ha bug-os ko nga kinabuhi;

pinanalipdan mo ako tikang pa han akon katawo. (b)

4. Igsusumat ko an imo pagkamatadong;

maghihimangraw ako ha bug-os nga adlaw

han imo katalwasan,

bisan kon labaw ito han akon masasabtan.

Gintutdoan mo ako tikang pa han akon kabatan-on,

ngan iginsusumat ko pa gihapon

an imo urosahon nga mga buhat. (b)

PAGBASA II          

Jn 13: 21-33, 36-38

Pagbasa tikang han santos nga ebanghelyo sumala kan San Juan.

Katapos ni Jesus magsiring hini, inalpan hiya hin dako nga kabido, ngan nagsiring hin dayag, “Susumatan ta kamo hin tinuod: maglilingo ha akon in usa ha iyo.” Naggipasirosiplat hira nga nanhiburong kon hin-o gud an iya karuyag sidngon. Nalingkod sapit ni Jesus an hinigugma niya nga tinun-an. Nagsenyas hi Simon Pedro ha iya ngan nagsiring, “Pakianhi daw hiya kon hin-o an iya hinnanabihan.” Sanglit siniring kan Jesus adto nga tinun-an ngan nagpakiana, “Hin-o man hiya, Ginoo?” Nagbaton hi Jesus, “Itutunlob ko an tinapay ngan ihahatag ko ini ha iya; amo hiya an tawo.” Sanglit kinuha hiya hin pinit nga tinapay, iya ini gintunlob, ngan iginhatag kan Judas nga anak ni Simon Iscariote. Han pakakarawat gud la ni Judas han tinapay, sinulod dayon ha iya hi Satanas. Nagsiring hi Jesus ha iya, “Dagmit ngan tumana an kinahanglan mo buhaton!” Waray nakasabot han mga nakada ha lamesa kay ano nga ginsiring ini ni Jesus ha iya. Tungod nga hi Judas man an tinaporan han supot han kwarta, nakahunahuna an iba nga mga tinun-an nga ginsugo hiya ni Jesus hin pagpalit han ira kinahanglanon para han pyesta, o bangin ginsugo hiya paghatag ngadto han mga kablas. Ginkarawat ni Judas an tinapay ngan ginawas hiya dayon. Gab-i adto.

Han paggawas na ni Judas, nagsiring hi Jesus, “Iginpapakita na yana an himaya han Anak han Tawo, ngan pinaagi ha iya, ginpapakita liwat an himaya han Dyos. Kon iginpapakita an himaya han Dyos pinaagi ha iya, magpapakita man an Dyos han himaya han Anak han Tawo ha iya ngahaw, ngan bubuhaton ito niya dayon. Mga anak ko, gutiay na la nga panahon an akon pakig-urosa ha iyo. Mamimiling kamo ha akon; kundi susumatan ko kamo yana han akon iginsiring ngadto han mga Judiyo, ‘Diri kamo makakadto han akon kakadtoan.’

Nagpakiana ha iya hi Simon Pedro, “Ngain ka man kakadto, Ginoo?” Nagbaton hi Jesus, “Diri ka pa yana makakasunod ngadto han akon kakadtoan, kundi masunod ka ha akon onina.” Nagpakiana hi Pedro, “Ginoo, kay ano hin diri ko pakasunod ha imo yana? Andam man ako pagpakamatay tungod ha imo!” Nagbaton hi Jesus, “Ungod ba nga andam ka pagpakamatay tungod ha akon? Susumatan ko ikaw hin tinuod: diri pa matugaok an manok, iglilirong mo na akon hin makatulo.”

An Ebanghelyo han Ginoo.