DOWNLOAD | eLEKSYONARYO - SEMANA SANTA

PAGBASA I 

Is 50: 4-9a

Pagbasa tikang han basahan ni Isaias, an Manaragna.

Gintutdoan ako han Ginoo nga Dyos kon ano an akon igsisiring, basi makahatag ako hin kusog hadton mga ginugul-an. Kada aga gin-aaghat ako niya hin pamati han iya igtututdo ha akon. Gintagan ako han Ginoo hin pagsabot, ngan waray ako sumupil o bumaya ha iya. Ginlubasan ko an akon taludtod ngadto hadton mga naghahampak ha akon, tinugotan ko hira hin pagtamay ha akon, han pagrabot han akon bungot, ngan pagtupra ha akon bayhon.

Kundi diri makakadaot ha akon an ira mga pagtamay, kay ginbubuligan ako han Ginoo nga Dyos. Maniniguro ako nga mailob ko ini, maaram ako nga diri ako kaalohan, kay hirani an Dyos ha akon, ngan magpapamatuod hiya nga waray ko sala. May-ada ba nagpapasipara hin pagsumbong kontra ha akon? Pakadtoa kami ha hukmanan! Ipadara ha iya an iya sumbong! An Ginoo nga Dyos ngahaw an nananalipod ha akon—sanglit hin-o an makakagpamatuod nga salaan ako?

An Pulong han Ginoo.

SALMO RESPONSORIO

Sal 69:8-10, 21-22, 31 and 33-34

(b) Tungod han imo dako nga gugma, Ginoo, pamatii ako.

1. Tungod ito ha imo nga ginyubitan ako,

ngan nga napuputos ako hin kaalo.

8Sugad ako hin dumuruong ha akon kabugtoan,

sugad hin lumalangyaw ha akon panimalay.

Naglalaga ha akon sugad hin kalayo

an akon kasindak para han imo Templo;

nahuhulog ha akon an mga pagyubit

nga iginlabay ha imo. (b)

2. Nasamad an akon kasingkasing

han mga pagyubit,

ngan makalolooy gud ako.

Nagpaabot ako hin pagpaid,

kundi waray gud;

hin pagliaw, kundi waray gud inabot.

Gintagan ako nira hin hilo,

han ginugutom ako;

gintagan ako nira hin suoy,

han inuuhaw ako. (b)

3. Dadayawon ko hin kanta an Dyos;

igsasangyaw ko an iya pagkadako

pinaagi hin pagpasalamat ha iya.

Malilipay an mga magpakalolooy

kon makakita hira hini;

madadasig adton mga nagsisingba han Dyos.

Namamati an Ginoo hadton mga

nagkikinahanglan,

ngan diri nalilimot han iya katawhan

ha bilanggoan. (b)

PAGBASA II          

Mt 26: 14-25

Pagbasa tikang han santos nga ebanghelyo sumala kan San Mateo.

Kinadto han mga puno han kapadian in usa han dose nga mga tinun-an, nga ginngangaranan kan Judas Iscariote, ngan nagsiring, “Ano man an ihahatag niyo ha akon kon itubyan ko ha iyo hi Jesus?” Nag-ihap hira hin katloan (30) ka salapi ngan iginhatag nira ha iya. Tikang hadto nga takna naghingita na hi Judas hin maupay nga higayon hin paglingo kan Jesus.

Ha syahan nga adlaw han Pyesta han Tinapay nga Waray Patubo, hinarani kan Jesus an iya mga tinun-an ngan nagpakiana, “Diin an imo karuyag nga amon pag-aandaman para ha imo han kanan Paglabay nga pangaon?” Binaton hiya, “Pakadto kamo hin usa ka tawo didto ha syudad, ngan sidnga hiya: ‘Nasiring an Magturutdo. Inabot na an akon takna; magsasaurog ako ngan an akon mga tinun-an han Paglabay dida ha imo balay.’” Gintuman han mga tinun-an an iginsugo ha ira ni Jesus, ngan gin-andam an kanan Paglabay nga pangaon.

Han pagkagab-i na, liningkod hin pagkaon hi Jesus ngan an dose niya nga mga tinun-an. Samtang nangangaon hira, nagsiring hi Jesus, “Susumatan ta kamo, usa ha iyo in maglilingo ha akon.” Duro an kabido han mga tinun-an ngan an tagsatagsa nagpakiana ha iya, “Ako ba, Ginoo?” Binaton hi Jesus, “An madungan ha akon hin pagtunlob han iya tinapay ha plato, amo hiya an maglilingo ha akon. Mapatay an Anak han Tawo sumala han iginsiring han Kasuratan, kundi kamakaharadlok para han tawo nga maglilingo han Anak han Tawo! Mauruupay pa unta kon waray ini hiya matawo!” Nagpakiana hi Judas, an malingo nga tawo, “Magturutdo, ako ba an karuyag mo sidngon?” Binaton hi Jesus, “Ginyakan mo ini.”

An Ebanghelyo han Ginoo.