DOWNLOAD | eLEKSYONARYO - SEMANA SANTA

PAGBASA I

Ex 12:1-8, 11-14

Pagbasa tikang han Basahan han Exodo.

Naghimangraw an Ginoo kanda Moises ug Aaron didto ha Ehipto: “Amo ini an syahan nga bulan han tuig para ha iyo. Ighatag ini nga mga tugon ngadto han bug-os nga bungto han Israel: Dida han ikanapulo nga adlaw hini nga bulan kinahanglan magpili an kada tawo hin usa nga nati nga karnero o nati nga kanding para han iya panimalay. Kon diri damo an sakop han iya panimalay nga diri makakaubos hin bug-os nga nati nga karnero, mahihimo nga in usa nga karnero pagsaroan niya ngan han iya sapit nga amyaw, sumala han kadamo han mga tawo ngan sumala han kadamo nga makakaon han kada tawo. Makakagpili kamo hin karnero o kanding, kundi kinahanglan lalaki ini, usa ka tuig an panuigon, ngan waray gud mga karat-an. Laminga ini tubtob han ikanapulo kag-upat (14) nga adlaw han bulan, diin dida hiton gab-i pag-iihawon han bug-os nga bungto han Israel an hayop. Makuha hira han dugo ngan igpapahid ini dida han mga harigi han porta ngan han baybayon nga igbaw han porta han kabalayan diin kakaonon an mga hayop. Hito nga gab-i pag-aaslon an inihaw, ngan kakaonon ini upod hin magpait nga mga panakot ngan hin tinapay nga waray patubo. Ayaw kamo pagkaon hin bisan ano nga bahin han gin-ihaw nga hilaw o linaga, kundi kaona ini nga gin-asal hin bug-os, lakip an ulo, an mga tiil, ngan an mga sulod han ginhawa.

Kinahanglan kaonon ini niyo hin kadagmitan, nga nakabado na kamo nga daan, andam para hin paglakat, nga may sandalyas na an iyo mga tiil ngan tungkod ha iyo kamot. Amo ini an Paglabay nga pagbubuhaton niyo hin pagpasidungog ha akon nga Ginoo.

“Dida hito nga gab-i maglalatas ako han tuna han Ehipto ngan papatayon ko an ngatanan nga suhag nga lalake, ma tawo ug ma mananap, ngan kakastigohon ko an ngatanan nga kadiyosan han Ehipto. Ako amo an Ginoo. Mahihimo nga tigaman han kabablayan nga iyo inuokyan an dugo dida ha mga harigi han porta. Kon hikit-an ko an dugo, lalabyan ko la kamo, ngan diri ko kamo paglalabtan kon kastigohon ko na an mga Ehiptohanon. Kinahanglan pagsaurogon niyo ini nga adlaw nga usa nga pyesta para han Ginoo hin pagpahinumdom ha iyo han ginbuhat nakon nga Ginoo. Pagsauroga niyo ini ha ngatanan nga tiarabot nga panahon.”

An Pulong han Ginoo.

SALMO RESPONSORIO

Sal 116:12-13, 15-16bc, 17-18

(b) Ini nga benindisyonan nga irinmon

usa nga pakaangbit naton han dugo ni Cristo.

1. Ano an ak’ igbabalos han Ginoo,

han ngatanan niya nga kaupayan ko?

Pagdadad-an ko h'ya hin halad nga bino,

nga pasalamat nga gintalwas n'ya ako. (b)

2. Ha pagtan-aw han Ginoo

mahal gudman an kamatayon han ‘ya mga baraan.

Imo ako surugoon, O Ginoo,

ngan nag-aalagad gud ako ha imo;

sugad gud han ginbuhat hadton nanay ko,

tikang hin kamatay gintalwas mo ako. (b)

3. Ighahalad, ighahatag ko ha imo,

halad nga tinubod nga pasalamat ko;

ngan maghahalad ak' han akon pag-ampo,

ngan matatawag han ngaran han Ginoo.

Ha katirok han tanan mo nga katawhan,

ha Templo han Jerusalem nga bungsaran,

akon ighahatag an ak’ ginsumpaan,

pagdayawa an Ginoo! Paghalaran! (b)

PAGBASA II          

1 Cor 11:23-26

Pagbasa tikang han syahan nga surat ni San Pablo ngadto han mga taga Corinto.

Mga kabugtoan: Kay kinarawat ko tikang han Ginoo an pagturon-an nga akon na iginhatag ha iyo: nga ha gab-i han paglingoa han Ginoo nga Jesus, kinuha hiya hin tinapay, nagpasalamat sa Dyos, ginpinitpinit niya, ngan nagsiring, “Amo ini an akon lawas nga iginhahalad para ha iyo. Buhata ini nga hinumdoman ha akon.” Ha amo man nga paagi, kinuha niya an irimnan katapos han panihapon ngan nagsiring, “Amo ini nga irimnan an kanan Dyos bag-o nga ginsabotan nga gintigamnan han akon dugo. Buhata ini nga hinumdoman ha akon ha kada pag-iinom niyo hini.” Kay ha kada pagkakaon niyo hini nga tinapay ngan pag-iinom tikang hini nga irimnan, iginpapasangyaw niyo an kamatayon han Ginoo tubtob han iya pag-abot.

An Pulong han Ginoo.

PAGBASA III        

Jn 13: 1-15

Pagbasa tikang han santos nga ebanghelyo sumala kan  Juan.

Bisperas na adto han Pyesta han Paglabay. Maaram na hi Jesus nga inabot na an iya takna hin pagbaya hini nga kalibutan ngan hin pagkadto han Amay. Dayuday ginhigugma niya an iya mga sakop dinhe ha kalibutan, ngan ginhigugma niya hira tubtob gud ha kataposan. Tarangka ha panihapon hi Jesus ngan an iya mga tinun-an. Ginlarang na han Yawa nga maglilingo kan Jesus hi Judas nga anak ni Simon Iscariote. Maaram hi Jesus nga itinubyan ha iya han Amay an bug-os nga gahom, ngan maaram hiya nga tikang hiya ha Dyos, ngan tikadto na hiya sa Dyos. Sanglit binuhat hi Jesus ngan maglubas han iya bawbaw nga bado, ngan magbagkos hin twalya. Inipis hiya hin tubig ngada ha palanggana ngan nagtikang hin panmusa han mga tiil han mga tinun-an, ngan ginpahiran han twalya nga iya iginbagkos. Hinarani kan Simon Pedro nga nagsiring ha iya, “Ginoo, mamumusa ka ba han akon mga tiil?” Nagbaton hi Jesus ha iya, “Diri ka pa maaram yana kon ano an akon ginbubuhat, kundi hibabaroan mo ini onina.” Nagsiring hi Pedro, “Diri gud ako matugot nga mamusa ka han akon mga tiil!” Nagbaton hi Jesus, “Kon diri ako mamusa han imo mga tiil, diri ka na magigin tinun-an ko.” Nagbaton hi Simon Pedro, “Kon amo man ini, Ginoo, diri la an akon mga tiil, kundi ilakip liwat hin paghugas an akon mga kamot ngan ulo!”

Nagsiring hi Jesus, “An human na kumarigos, malinis na an iya bug-os nga lawas, sanglit diri na kinahanglan maghugas pa ha iya ngahaw, kundi an iya mga tiil na la. Malinis na kamo kundi diri ngatanan.” Maaram na hi Jesus kon hin-o an maglilingo ha iya, sanglit nagsiring hiya, “Malinis na kamo kundi diri ngatanan.”

Katapos niya pamusa han ira mga tiil, nagsul-ot na liwat hi Jesus han iya bawbaw nga bado, ngan binalik ha iya lingkoran ha lamesa. Nagpakiana hiya, “Nasayod ba kamo han ginbuhat ko ha iyo? Natawag kamo ha akon nga magturutdo ngan Ginoo, ngan may kamatuoran, kay amo gud ito ako. Sanglit kon ako nga iyo Ginoo ngan Magturutdo namusa han iyo mga tiil, angay man liwat kamo maggiparupamusa han iyo mga tiil. Gintagan ko kamo hin susbaranan, basi sugaron niyo hin pagbuhat han ginbuhat ko ha iyo.”

An Ebanghelyo han Ginoo.