MISA HA ADLAW

PAGBASAI

Buh 10:34a, 37-43

Pagbasa tikang han mga  Buhat han mga Apostoles.

Nagtikang hi Pedro hin pamulong, “Maaram kamo han dako nga nahinabo ha bug-os nga tuna han Israel, nga nagtikang ha Galilea kahuman han pagwali ni Juan han iya mensahe mahitungod hin pagbunyag. Maaram kamo mahitungod kan Jesus nga taga-Nazaret, nga iginbubo ha iya han Dyos an Espiritu Santo ngan an Gahom. Kinadto hiya ha ngatanan nga dapit hin pagpakaupay ngan hin pagtambal han ngatanan nga ginagarongan han Yawa, kay an Dyos nakada ha iya. Mga saksi kami han ngatanan nga ginbuhat niya ha tuna han Israel ngan didto ha Jerusalem. Ginpatay hiya nira pinaagi hin pagraysangan ha iya ha kros. Kundi ginbanhaw hiya han Dyos ha ikatulo ka adlaw, ngan pinakita hiya, diri ha ngatanan nga mga tawo kundi ha amon la nga mga saksi, nga ginpili ngadaan han Dyos. Amo kami an kinaon ngan ininom upod ha iya kahuman niya kabanhaw. Ngan ginsugo kami niya hin pagwali ha mga tawo han Maupay nga Sumat, ngan pagpamatuod nga amo hiya an gintudlok han Dyos nga maghurukom han mga buhi ngan han mga minatay. Naghimangraw mahitungod ha iya an ngatanan nga mga manaragna nga nasiring nga an ngatanan nga natoo ha iya pasasayloon han ira mga sala pinaagi han gahom han iya ngaran.”

An Pulong han Ginoo.

SALMO RESPONSORIO        

Sal 118:1-2, 16-17, 22-23

(b) Amo ini an adlaw ngan ginhimo han Ginoo, paglipay kita hin tinuod.

1. Pasalamati'n Ginoo, maupay h'ya,

kadayonan gud an iya paghigugma.

An katawhan han Israel pagpasidnga,

“Kadayonan gud an iya paghigugma.” (b)

2. Inin iya ngahaw nga pagkagamhanan

an nagdara ha aton hin pagdarag-an;

gamhanan nga kamot han Ginoo

gudman nagpadaog ha at' dit' ha pag-awayan.

Di’ gud mamamatay, mabubuhi ako,

magsusumat kanan Ginoo nahimo. (b)

3. Bato nga ginsikway han panday ngatanan,

nahimo nga ulo nga patukoranan.

Kanan Ginoo gud ini binuhatan,

pagkadako hito nga kahiburongan! (b)

PAGBASA II

Col 3:1-4

Pagbasa tikang han Surat ni San Pablo ngadto han mga taga Colosas.

Mga kabugtoan: Ginbanhaw na kamo upod kan Cristo, sanglit pangitaa niyo an mga butang nga aadto ha langit, diin nalingkod hi Cristo han iya trono, ha tuo han Dyos. Ikadto an iyo hunahuna han mga butang didto ha langit, diri han mga butang dinhe ha tuna. Kay namatay na kamo, ngan an iyo kinabuhi natatago upod kan Cristo dida ha Dyos. An iyo matuod nga kinabuhi amo hi Cristo, ngan kon magpahayag na hiya, magpapahayag man liwat kamo upod ha iya ngan maangbit kamo han iya himaya!

An Pulong han Ginoo.

_______

Kun di’ man, ini:

1 Cor 5:6b-8

Pagbasa tikang han Syahan nga Surat ni San Pablo ngadto han mga taga Corinto.

Mga kabugtoan: Maaram man kamo han darahonon, “An gutiay nga patubo nakakapadako han bug-os nga minasa.” Kinahanglan kuhaon niyo ini nga daan nga patubo han sala basi mahingpit an iyo pagkaputli. Niyan masusugad na kamo hin bag-o nga minasa nga waray gud patubo, ngan maaram ako nga amo gud ini kamo. Kay andam na an Pyesta han Paglabay, yana nga iginhalad na hi Cristo nga amo an aton kordero han Paglabay. Sanglit saurugon ta an aton pyesta, diri pinaagi hin tinapay nga may daan nga patubo, an patubo hin sala ug karat-an, kundi pinaagi han tinapay nga waray patubo, an tinapay han pagkaputli ngan kamatuoran.

An Pulong han Ginoo.

_______

EBANGHELYO

Jn 20:1-9

Pagbasa tikang han santos nga ebanghelyo sumala kan Juan.

Temprano pa han aga han Domingo, samtang masirom pa, kinadto hi Maria Magdalena ha lubnganan, ngan hinkit-an niya nga kinuha na an bato nga ginsada han lubnganan. Nagdalagan hiya ngadto kanda Simon Pedro ngan han tinun-an nga hinigugma ni Jesus, ngan ginsumatan hira, “Ginkuha nira ha lubnganan an Ginoo, ngan diri kita maaram kon diin nira ibutang hiya!” Ngan napakadto dayon ha lubnganan hi Pedro ngan an usa nga tinun-an. Nagdalagan hira nga duha, kundi nahiuna pag-abot ha lubnganan an usa nga tinun-an kay malurolaksi hiya dumalagan kan Pedro. Inubo hiya hin paghiling ngan hinkit-an niya an lino nga mga dugnit, kundi waray hiya sumulod. Inabot hi Simon Pedro nga sinunod ha iya, ngan sinulod dayon han lubnganan. Hinkit-an niya didto an lino nga mga dugnit. Diri na tampo han lino nga mga dugnit an panyo nga iginputos han ulo ni Jesus, kundi bulag nga nalulukot ha piliw. Ngan sinulod liwat an tinun-an nga una makaabot han lubnganan; nakakita hiya ngan tinoo. Waray pa gihapon hira makasabot han kasuratan nga nagsiring nga kinahanglan mabanhaw hiya.

An Ebanghelyo han Ginoo.

_______

Ebanghelyo para han nga Misa ha kulop:

Lc 24: 13-35

Pagbasa tikang han santos nga Ebanghelyo sumala kan Lucas.

Hadto manta nga adlaw duha han kan Jesus mga tinun-an napakadto ha usa nga baryo nga Emmaus an ngaran, mga onse ka kilometro tikang ha Jerusalem. Naghihinimangraw hira mahitungod han ngatanan nga mga butang nga nanhinabo. Samtang naghihimangraw hira, dinaop hi Jesus ngan binunyog ha ira. Hinkit-an hiya nira, kundi ambot kon ano nga waray man hira pakakilala ha iya. Nagsiring hi Jesus ha ira, “Mahitungod hin ano an iyo ginkakarukayakan samtang naglalakat kamo?”

Inukoy hira nga mabidoon an ira mga bayhon. Nagpakiana ha iya an usa ha ira nga Cleopas an ngaran, “Ikaw gud la an umurukoy ha Jerusalem nga waray mahibaro han mga butang nga nanhinabo didto hini nga pira ka mga adlaw nga naglabay?” “Ano nga mga butang?” nagpakiana hiya. Nagbaton hira, “An mga butang nga nahinabo kan Jesus nga taga-Nazaret. Manaragna ini nga tawo, ngan gin-iisip han Dyos ngan han ngatanan nga mga tawo nga may gahom ha ngatanan nga iya ginyakan ug ginbuhat. Igintubyan hiya han amon mga puno han kapadian ngan mga punoan nga sirotan han kamatayon ngan iginraysang hiya ha kros. Ngan naglaom gud kami nga amo hiya an magtutubos han Israel! Labot pa hini ngatanan, amo na yana an ikatulo ka adlaw tikang mahinabo ini. Nanhipausa kami han sumat hin pira nga kababayen-an han amon hugpo. Kinadto hira ha lubnganan han maagahon pa, kundi waray hiagii nira an iya lawas. Binalik hira hin pagsumat nga nakakita hira hin panan-awon hin mga anghel nga nagsumat ha ira nga buhi hiya. Kinadto ha lubnganan in pira han amon hugpo, ngan hinsabotan nira sumala han iginsiring ha kababayen-an, kundi waray hira makakita ha iya.”

Ngan nagsiring hi Jesus ha ira, “Hin ka mga lurong niyo, hin kahinay niyo tumoo han ngatanan nga iginsiring han mga manaragna! Diri ba kinahanglan mag-antos anay an Mesiyas hini nga mga butang san-o hiya makasulod han iya himaya?” Niyan iginsaysay ha ira ni Jesus an iginsiring mahitungod ha iya ha ngatanan nga Kasuratan, tikang han mga basahan ni Moises ngan han mga sinurat han ngatanan nga mga manaragna.

Inabot hira hirani han baryo nga ira kinakadtoan, ngan nagpakita hi Jesus nga sugad hin magpapadayon pa hiya ngadto ha unhan; kundi ginhawiran hiya nira, “Pabilin na la upod ha amon kay kulopay na man ngan tikasirom na.” Sanglit sinulod hiya ngan nagpabilin upod ha ira. Liningkod hiya ha lamesa upod ha ira, kinuha han tinapay, ngan ginbendisyonan ini niya; katapos, ginpinitpinit niya an tinapay ngan iginhatag ha ira. Nabuksan an ira mga mata ngan kinilala hira ha iya; kundi napara hiya dayon ha ira mga mata. Naggipasiringsiring hira, “Diri ba sugad hin kalayo nga nagdidilaab dinhe ha aton, han nagyayakan hiya ha aton dida ha dalan, ngan nagsasaysay ha aton han Kasuratan?”

Nagkabuhat hira dayon ngan binalik ha Jerusalem, diin ira hin-agian nga nagkakatirok an onse nga mga tinun-an, kaupod han iba nga nagsiring, “Tinuod gud nga nabanhaw an Ginoo! Nagpakita hiya kan Simon!” Niyan iginsaysay nira nga duha ha ira an nahinabo ha dalan ngan kon naunan-o an ira pakakilala han Ginoo dida han pagpinitpinit niya han tinapay.

An Ebanghelyo han Ginoo.

_______

PAG-AMPO HAN BUNGTO

Ha aton pagsaurog hini nga labi kabaraan nga adlaw, pag-urosa kita hin pagdangop ngadto han aton dyosnon nga Amay, basi an birilhon nga mga buhat han iya Bugtong nga Anak ha pagtalwas ha aton magpabilin nga hinungdan han iya pagtagad han aton mga pangaraba. Sarabat kita pag-ampo ha pagsiring:

Amay namon nga Dyos, pamatia kami.

1) Basi an Singbahan ha bug-os nga kalibutan magmadinasigon kanunay dida han iya pagpasamwak han nakakatalwas nga mga misteryo han Nabanhaw nga Ginoo, an Kapawa han kalibutan. Mag-ampo kita ha Ginoo.

2) Basi adton mga nabunyagan ha bisan diin nga dapit magin tinuod liwat nga mga saksi han kamatuoran han Cristohanon nga mga panhitabọ ha ngatanan nga takna. Mag-ampo kita ha Gino0.

3) Basi an mga tinubyanan han aton katilingban dayuday lipayon ngan dasigon han grasya han Dyos ha ira pagserbisyo ug sugad man ha ira tagsa nga kinabuhi. Mag-ampo kita ha Ginoo.

4) Basi adton mga diri pa nakilala kan Cristo ug an mga nag-uukoy ha kasisidman han bisyo, karat-an ug sala malamragan han Cristohanon nga mga misteryo agud mabag-o hira ha pagkatawo ug ha kinabuhi. Mag-ampo  kita ha Ginoo.

5) Basi kita ngatarnan dayuday mag ukoy ubos han grasya ug kapawa ni Cristo agud makilal’an nga kita gayud tinuod nga mga anak han kapawa. Mag-ampo kita ha Ginoo.

Mahigugmaon nga Amay, ginbag-o nimo an kinabuhi han tawo dida han Pagkabanhaw han imo Anak. Pamatii kami ngan igpakatakos han imo padayon nga pagbag-o tubtob ha kahingpitan.  Pinaagi kan Jesucristo, amon Ginoo. Amen.