PAGBASA I 

Buh 3:1-10

Pagbasa tikang han mga  Buhat han mga Apostoles.

Usa ka adlaw kinadto ha Templo hira Pedro ug Juan alas tres ha kulop, an takna han pag-ampo. May didto usa ka tawo nga lulid tikang han iya katawo nga nakada han ginngangaranan nga “Matahom nga Aragian.” Gindadara hiya kada adlaw ngada hini nga aragian basi makilimos han mga tawo nga napakadto ha Templo. Han pakakita niya kanda Pedro ug Juan nga nasulod, nakilimos hiya ha ira. Tinutokan hiya nira ngan nagsiring hi Pedro, “Siplat ha amon!” Sanglit siniplat hiya ha ira nga naglalaom nga lilimosan hiya. Kundi nagsiring hi Pedro ha iya, “Waray gud ako kwarta, kundi ihahatag ko ha imo an aadi ha akon: ha ngaran ni Jesu-Cristo nga taga-Nazaret, ginsusugo ko ikaw, buhat ngan lakat!” Ngan kinaptan ni Pedro an tuo nga kamot han lulid ngan binuligan niya hin pagtukdaw. Nagmakusog dayon an mga tiil ngan mga mukobuko han lulid; linukso hiya, tinindog, ngan nagtikang hin paglakat. Niyan inupod hiya ha ira ngadto ha Templo nga naglalakat ngan nagluluksolukso ngan nagdadayaw han Dyos. An ngatanan nakakita ha iya nga naglalakat ngan nagdadayaw han Dyos; ngan han pakakilala nira nga amo ini hiya an makililimos nga paralingkod didto han “Matahom nga Aragian” han Templo, nahipausa gud hira ngatanan han nahinabo ha iya.

An Pulong han Ginoo.

SALMO RESPONSORIO

Sal 105:1-2, 3-4, 6-7, 8-9

(b) Paglipay kamo, adton nagbibiling han Ginoo.

Kon di’ man, ini:

(b) Alleluia!

1. Pagpasalamati niyo an Ginoo

ngan igpasangyaw an iya pagkadako;

igpahayag an iya mga nahimo,

dida han kanasoran igsumat niyo!

Pagkantahi hin pagdayaw an Ginoo,

sumat nga ur'sahon iya nahimo. (b)

2. Pagkalipay kamo kay iya na kita

tanan nga nasingba ha iya magrakya.

Dangop ha Ginoo nga kamo buligan,

ngan magsingba ha iya hin kadayonan. (b)

3. Tulin ni Abraham nga iya ginsugo,

ngan tulin ni Jacob pinili nga tawo.

Amo hiya an aton Dyos nga Ginoo,

para han ngatanan iya mga sugo. (b)

4. Gintutuman niya iya ginsaaran,

mga saad ‘ya yukot nga katulinan.

Tutumanon iya sabot kan Abraham,

ngan an iya saad ngadto kan Isaac. (b)

PAGBASA II

Lc 24:13-35

Pagbasa tikang han santos nga ebanghelyo sumala kan Lucas.

 Hadto manta nga adlaw duha han kan Jesus mga tinun-an napakadto ha usa nga baryo nga Emmaus an ngaran, mga onse ka kilometro tikang ha Jerusalem. Naghihinimangraw hira mahitungod han ngatanan nga mga butang nga nanhinabo. Samtang naghihimangraw hira, dinaop hi Jesus ngan binunyog ha ira. Hinkit-an hiya nira, kundi ambot kon ano nga waray man hira pakakilala ha iya. Nagsiring hi Jesus ha ira, “Mahitungod hin ano an iyo ginkakarukayakan samtang naglalakat kamo?”

Inukoy hira nga mabidoon an ira mga bayhon. Nagpakiana ha iya an usa ha ira nga Cleopas an ngaran, “Ikaw gud la an umurukoy ha Jerusalem nga waray mahibaro han mga butang nga nanhinabo didto hini nga pira ka mga adlaw nga naglabay?” “Ano nga mga butang?” nagpakiana hiya. Nagbaton hira, “An mga butang nga nahinabo kan Jesus nga taga-Nazaret. Manaragna ini nga tawo, ngan gin-iisip han Dyos ngan han ngatanan nga mga tawo nga may gahom ha ngatanan nga iya ginyakan ug ginbuhat. Igintubyan hiya han amon mga puno han kapadian ngan mga punoan nga sirotan han kamatayon ngan iginraysang hiya ha kros. Ngan naglaom gud kami nga amo hiya an magtutubos han Israel! Labot pa hini ngatanan, amo na yana an ikatulo ka adlaw tikang mahinabo ini. Nanhipausa kami han sumat hin pira nga kababayen-an han amon hugpo. Kinadto hira ha lubnganan han maagahon pa, kundi waray hiagii nira an iya lawas. Binalik hira hin pagsumat nga nakakita hira hin panan-awon hin mga anghel nga nagsumat ha ira nga buhi hiya. Kinadto ha lubnganan in pira han amon hugpo, ngan hinsabotan nira sumala han iginsiring ha kababayen-an, kundi waray hira makakita ha iya.”

Ngan nagsiring hi Jesus ha ira, “Hin ka mga lurong niyo, hin kahinay niyo tumoo han ngatanan nga iginsiring han mga manaragna! Diri ba kinahanglan mag-antos anay an Mesiyas hini nga mga butang san-o hiya makasulod han iya himaya?” Niyan iginsaysay ha ira ni Jesus an iginsiring mahitungod ha iya ha ngatanan nga Kasuratan, tikang han mga basahan ni Moises ngan han mga sinurat han ngatanan nga mga manaragna.

Inabot hira hirani han baryo nga ira kinakadtoan, ngan nagpakita hi Jesus nga sugad hin magpapadayon pa hiya ngadto ha unhan; kundi ginhawiran hiya nira, “Pabilin na la upod ha amon kay kulopay na man ngan tikasirom na.” Sanglit sinulod hiya ngan nagpabilin upod ha ira. Liningkod hiya ha lamesa upod ha ira, kinuha han tinapay, ngan ginbendisyonan ini niya; katapos, ginpinitpinit niya an tinapay ngan iginhatag ha ira. Nabuksan an ira mga mata ngan kinilala hira ha iya; kundi napara hiya dayon ha ira mga mata. Naggipasiringsiring hira, “Diri ba sugad hin kalayo nga nagdidilaab dinhe ha aton, han nagyayakan hiya ha aton dida ha dalan, ngan nagsasaysay ha aton han Kasuratan?”

Nagkabuhat hira dayon ngan binalik ha Jerusalem, diin ira hin-agian nga nagkakatirok an onse nga mga tinun-an, kaupod han iba nga nagsiring, “Tinuod gud nga nabanhaw an Ginoo! Nagpakita hiya kan Simon!” Niyan iginsaysay nira nga duha ha ira an nahinabo ha dalan ngan kon naunan-o an ira pakakilala han Ginoo dida han pagpinitpinit niya han tinapay.

An Ebanghelyo han Ginoo.