PAGBASA I 

Buh 4:1-12

Pagbasa tikang han mga  Buhat han mga Apostoles.

Han nagyayakan pa ha mga tawo hira Pedro ug Juan, nagkaabot in kapadian, an pangulo han mga gwardya han Templo, ug in mga Sadusiyo. Napungot hira kay an duha nga mga apostoles nagtinutdo han mga tawo nga nabanhaw hi Jesus, ngan nagpamatuod ini nga may pagkabanhaw an mga patay. Sanglit gindakop hira ngan ginpriso ngada han pagkasunod nga adlaw kay tikagab-i na adto. Kundi tinuo in damo han nagpakabati han mensahe, ngan inabot na hin mga lima kayukot (5,000) an mga tawo.

Han pagkabuwas nagkatirok didto ha Jerusalem an mga pangulo nga Judiyo, an katigurangan, ngan an mga magturutdo han Balaod. Nakigkita hira han Labaw nga Padi nga hi Anas, ngan kan Caifas, kan Juan, kan Alejandro, ngan han iba pa nga mga sakop han panimalay han Labaw nga Padi. Ginpaatubang ha ira an mga apostoles ngan ginpakianhan nira, “Gin-unan-o niyo hin pagbuhat hini? Ano an iyo gahom, ngan kanay ngaran an iyo ginamit?” Binaton hi Pedro nga puno han Espiritu Santo, “Mga pangulo han mga tawo ngan mga katigurangan: kon ginpapakianhan kami yana mahitungod han maupay nga amon ginbuhat hini nga lulid, ngan kon naunan-o nga naupay na hiya, kinahanglan masayod kamo ngatanan ngan an ngatanan nga mga tawo ha Israel, nga ini nga tawo nga natindog ha iyo atubangan naupay na pinaagi han gahom han ngaran ni Jesu-Cristo nga taga-Nazaret, nga iyo iginraysang ha kros, kundi ginbanhaw han Dyos. Amo ini hi Jesus an hinnanabihan han Kasuratan nga nasiring: ‘An bato nga gintamay niyo nga mga magtirindog hin balay, nahimo lugod nga labi ka importante nga bato.’ Hiaagian an katalwasan pinaagi gud la ha iya. Kay ha bug-os nga kalibutan waray lain nga ngaran nga iginhatag han Dyos ha mga tawo, nga sadang makatalwas ha aton.”

An Pulong han Ginoo.

SALMO RESPONSORIO

Sal 118:1-2 & 4, 22-24, 25-27a

(b) An bato nga ginsalikway han panday ngatanan, nahimo nga ulo nga patukoranan.

Kon di’ man, ini:

(b) Alleluia!

1. Pasalamati’n Ginoo, maupay h’ya,

kadayonan gud an iya paghigugma.

An katawhan han Israel pagpasidnga,

“Kadayonan gud an iya paghigugma.”

Tanan nga nahadlok ha iya pasidnga,

“Kadayonan gud an iya paghigugma.” (b)

2. Bato nga ginsikway han panday ngatanan,

nahimo nga ulo nga patukoranan.

Kanan Ginoo gud ini binuhatan,

pagkadako hito nga kahiburongan!

Ini’n adlaw han pagdaog han Ginoo,

pagkalipay kit' ngan magsaurog hito! (b)

3. Talwasa kami, talwasa, O Ginoo,

tagi’n kagawasan, nahangyo ha imo.

An naabot han Dyos unta bendisyonan,

an nakanhi ha kanan Ginoo ngaran!

Tatagan ka gud namon hin kaupayan,

tikang didto han Templo han Ginoo man!

Dyos an Ginoo; nagin maupay ha am’. (b)

PAGBASA II   

Jn 21:1-14

Pagbasa tikang han santos nga ebanghelyo sumala kan Juan.

Katapos hini, nagpakita liwat hi Jesus ngadto han iya mga tinun-an didto ha Lanaw han Tiberias. Sugad hini an iya pagpakita. Urosa hira Simon Pedro, hi Tomas (an tinatawag nga Karuha), hi Natanael (an taga-Cana, ha Galilea), an mga anak ni Sebedeo, nga duha pa nga mga tinun-an ni Jesus. Nagsiring hi Simon Pedro ha ira, “Mangingisda ako.” “Maupod kami,” nagsiring hira. Sanglit kinmadto hira ngan pinalawod hira; kundi waray gud nira nadakop hadto nga bug-os nga gab-i.

Han tisirang na an adlaw, tinindog hi Jesus ha baybayon, kundi waray makakilala an mga tinun-an nga hi Jesus ngay-an adto. Nagsiring hiya ha ira, “Nakadakop ba kamo?” “Waray!” binaton hira. Nagsiring hiya ha ira, “Huloga an iyo pukot ha tuo han sakayan, ngan makakadakop kamo.” Sanglit ginhulog nira an pukot, ngan waray na hira pakakaakos hin pag-alsa tungod han kadamo han isda. Nagsiring kan Pedro an tinun-an nga hinigugma ni Jesus, “Amo hiya an Ginoo!” Han pakabati ni Simon Pedro nga amo hiya an Ginoo, iginbagkos niya an iya bado (kay lubas man hiya) ngan linmukso ngadto ha tubig.

Dinuong ha baybayon an iba nga mga tinun-an, nga nagbubutong han pukot nga puno hin isda, kay diri man hira hirayo ha tabi, may mga kaunoman (60) la ka dupa. Paghaw-as na nira, hinkit-an nira in mga baga nga may ginsusugba nga isda ngan mga tinapay. Ngan nagsiring ha ira hi Jesus, “Pagdara ngadi hin mga isda nga iyo pa la nadakop.”

Sanglit sinakay hi Pedro ngan ginguyod niya ngadto ha baybayon an pukot nga puno hin dagko nga mga isda, usa kagatos kalim-an kagtulo (153) ngatanan; waray magisi an pukot, bisan kon damo hin duro an mga isda. Nagsiring hi Jesus ha ira, “Kadi, ngan pamahaw kita.” Waray gud han mga tinun-an nangahas hin pagpakiana ha iya, “Hin-o ka?” kay nasayod man hira nga amo hiya an Ginoo. Sanglit dinmaop hi Jesus, ginkuha an tinapay, ngan iginhatag ha ira, ngan sugad man an mga isda. Amo ini an ikatulo nga pagpakita ni Jesus han iya mga tinun-an katapos niya mabanhaw.

An Ebanghelyo han Ginoo.