PAGBASA I 

Buh 5:12-16

Pagbasa tikang han mga  Buhat han mga Apostoles.

Ginbuhat han mga apostoles dida han mga tawo in damo nga mga milagro ngan mga urosahon. Nagkatirok an ngatanan nga mga magtinuohon didto han Balkon ni Solomon. Waray taga gawas han hugpo nga nagpasipara hin pagtampo ha ira bisan kon hitaas an pagtahod ha ira han mga tawo. Kundi nagtikadamo an mga tawo nga nahidugang han ira hugpo—kadam-an nga kalalaken-an ngan kababayen-an nga tinmoo han Ginoo. Tungod han ginbuhat han mga apostoles, iginggawas an mga magsakit ngadto han kadalanan, ngan ginpahigda hira ha mga bantayaw ngan mga banig, basi ha paglabay ni Pedro, malambongan na man la in bisan pira ha ira. Ngan nagkaabot in damo nga mga tawo tikang han kaburubungtohan nga hirani ha Jerusalem, dara an ira mga magsakit ngan an may-ada magraot nga espiritu, ngan nagkauupay ini hira ngatanan.

An Pulong han Ginoo.

SALMO RESPONSORIO        

Sal 118:2-4, 13-15, 22-24

(b) Pagpasalamat han Ginoo kay maupay hiya; waray katapusan an iya gugma.

1. An katawhan han Israel pagpasidnga,

“Kadayonan gud an iya paghigugma.”

Adton kapadian han Dyos pagpasidnga,

“Kadayonan gud an iya paghigugma.”

Tanan nga nahadlok ha iya pasidnga,

“Kadayonan gud an iya paghigugma.” (b)

2. Ginpiit gud ako haros mapirde na,

kundi an Ginoo ha ak' binmulig pa.

Gahom, kusog ginhatagan ako niya,

ngan amo gud an magtaralwas ko hiya.

Pamatii an kanta han pagdarag-an,

ha mga tulda han kanan Dyos katawhan:

“Kanan Ginoo dako nga kagamhanan

amo'n nakagbuhat hini gud ngatanan.” (b)

3. Bato nga ginsikway han panday ngatanan,

nahimo nga ulo nga patukoranan.

Kanan Ginoo gud ini binuhatan,

pagkadako hito nga kahiburongan!

Ini'n adlaw han pagdaog han Ginoo,

pagkalipay kit' ngan magsaurog hito! (b)

PAGBASA II

Gnp 1:9-11a, 12-13, 17-19

Pagbasa tikang han basahan han Ginpadayag.

Ako amo hi Juan nga iyo bugto, ngan ha akon pagkasumurunod kan Cristo, kausa ako niyo dida han pag-antos ug pag-ilob hadton mga sakop han iya Ginhadian. Iginhalin ako nga bihag ngadto ha puro han Patmos tungod kay iginpasangyaw ko an pulong han Dyos ngan an kamatuoran nga iginpadayag ni Jesus. Dida han adlaw han Ginoo gindara ako han Ginoo nga hinbatian ko in dako nga tingog nga malanoy didi ha akon luyo sugad hin kanan trompeta. Nagsiring ini nga tingog, “Isurat kon ano an imo hikit-an.” Liningi ako panginano kon hin-o an nakighimangraw ha akon, ngan hinkit-an ko in pito nga bulawan nga mga burutangan hin suga. Ha butnga hini nga mga burutangan hin suga natindog in usa nga daw tawo pagkit-on nga nakasul-ot hin hilawig nga bado nga naabot ha iya mga tiil ngan may-ada banda nga bulawan nga isinangbod ha iya dughan.

Han pakakita ko ha iya, nahiraptay ako ha iya tiilan. Kinaptan ako han iya tuo nga kamot ngan nagsiring hiya, “Ayaw kahadlok! Amo ako an syahan ngan an kataposan. Ako amo an buhi! Namatay ako ngan yana buhi na ako ha kadayonan. Aada ha ubos han akon gahom an kamatayon ngan an kalibutan han mga patay. Isurat an mga butang nga imo makita, an mga butang nga nahinanabo yana, ngan ha orhe nga mga adlaw.

An Pulong han Ginoo.

EBANGHELYO

Jn 20:19-31

Pagbasa tikang han santos nga ebanghelyo sumala kan Juan.

Han pagkagab-i na hadto ngahaw nga Domingo, nagtirok an mga tinun-an ha sulod hin balay nga trinangkahan an mga porta, kay nahadlok hira han mga punoan nga Judiyo. Ngan inmabot hi Jesus ngan tinmukdaw ha butnga nira ngan nagsiring, “An kalinaw maada ha iyo.” Katapos niya pagsiring hini, iginpakita niya ha ira an iya mga kamot ngan an iya kagiliran. Nalipay an mga tinun-an han pakakita nira han Ginoo. Ngan nagsiring liwat hi Jesus ha ira, “An kalinaw maada ha iyo. Sugad nga ginsugo ako han Amay, sinusugo ko man kamo.” Ginhuypan hira niya nga sidngon, “Karawata niyo an Espiritu Santo. Kon pasayloon niyo an mga sala han mga tawo, pasasayloon hira; ngan kon diri niyo pasayloon hira, diri man hira pasasayloon.”

Diri kaupod nira hi Tomas, (an gintatawag nga karuha) nga usa han dose nga mga tinun-an, han pagpakita ni Jesus ha ira. Sanglit ginsumatan hiya han iba nga mga tinun-an, “Hinkit-an namon an Ginoo!” Nagsiring hi Tomas ha ira, “Diri ako matuod kon diri ko hikit-an an mga ulat han ginlahosan han mga raysang dida han iya mga kamot ngan mahibutang ko an akon tudlo dida hini nga mga ulat ngan mahiram han akon kamot an iya kagiliran.”

Paglabay hin usa ka semana, nagkaurosa na liwat an mga tinun-an ha sulod hin balay, ngan upod na nira hi Tomas. Trangkado an mga porta, kundi inmabot hi Jesus ngan tinmukdaw ha butnga nira ngan nagsiring, “An kalinaw maada ha iyo.” Ngan nagsiring hiya kan Tomas, “Ibutang didi an imo tudlo, ngan kitaa an akon mga kamot; ngan ikadi an imo kamot ngan hirama an akon kagiliran. Ayaw na pagruhaduha, tuo na!” Nagbaton hi Tomas ha iya, “Ginoo ko ngan Dyos ko!” Nagsiring hi Jesus ha iya, “Natoo ka na ba kay nakakita ka ha akon? Palaran adton natoo bisan waray makakita ha akon!”

Ginbuhat ni Jesus in damo pa nga mga milagro ha atubangan han iya mga tinun-an, nga waray mahisurat dida hini nga basahan. Kundi iginsurat ini, basi tumoo kamo nga hi Jesus amo an Mesiyas, an Anak han Dyos, nga pinaagi hini nga pagtoo ha iya, makaangkon unta kamo han kinabuhi.

An Ebanghelyo han Ginoo.

PAG-AMPO HAN BUNGTO

Ha aton pagkatitirok yana dinhi, pag-urusaha naton iton aton kasing kasing ug hunahuna ha pag-ampo ngadto sa Dyos Amay nga nagbanhaw han iya Anak tikang ha mga minatay basi kita katagan hin damo pa nga mga grasya. Sarabat kita pagbaton ha pagsiring:

Mahigugmaon nga Amay, kalooye kami.

1) Basi an ngatanan nga binunyagan, ha pagpangulo han mga tinubyanan han Singbahan, dayuday magin tigaman han Dyosnon nga paghigugma ug kalooy para han kataw’han. Mag ampo kita ha Ginoo.

 2) Basi an mga pinili nga mamuno han aton katilingban magpabilin nga mag uruna ha mga buhat hin pagpakaupay han kadam’an ug pagpadukwag han ira kahimtang. Mag-ampo kita ha Ginoo.

 3) Basi an pagkaurosa ug pagkasara bot maghadi dida han ngatanan nga mga nasud ug mga hugpo labi na gud dinhi ha aton dapit ngan bisan ha aton panimalay. Mag-ampo kita ha Ginoo.

4) Basi an ngatanan nga nagugupong, nagruruhaduha ug nawawad’an hin pagtuo malamragan han kamatuoran han Maupay nga Sumat dida han kinabuhi ug mga buhat han tagsa nga Cristyano ug han Cristohanon nga mga katilingban. Mag-ampo kita ha Ginoo.

 5) Basi kita ngatanan nga nagkakatitirok yana dayuday magtubo dida han aton pagtagad, pagbulig ug paghigugma han aton igkasitawo agud mag pabilin kita dida han kalooy han Dyos ngan mabuhi dida han iya gugma. Mag-ampo kita ha Ginoo.

Makagarahum nga Amay, kalooye ug pamatii an imo bungto dida hini nga amon mga panginyupo para han amon kalugaringon ngan para liwat hiton kadam’an. Pinaagi kan Jesucristo, amon Ginoo. Amen.