PAGBASA I 

Buh 4:23-31

Pagbasa tikang han mga  Buhat han mga Apostoles.

Han pagbuhii na ha ira, binmalik hira Pedro ug Juan ngadto han ira hugpo ngan ginsumatan nira ini hira mahitungod han iginsiring han labaw nga kapadian ngan han katigurangan. Han pakabati nira hini, nag-urosa hira hin pag-ampo sa Dyos: “Agaron ngan Magburuhat han langit, han tuna, han dagat, ngan han ngatanan nga aada ha ira! Nagyakan ka pinaagi han Espiritu Santo, pinaagi kan David nga amon ginikanan, nga imo surugoon, han iya pagsiring, ‘Kay ano nga napungot an mga Hentil, kay ano nga naghunahuna an mga tawo hin mga butang nga waray kapulsanan? Nag-andam an kahadian han tuna, ngan nagkatirok an mga punoan kontra han Ginoo ngan han iya Mesiyas.’ Kay ha tinuod nagkatirok dinhe hini nga syudad hira Herodes ug Poncio Pilato kaupod han mga Hentil ngan han mga tawo han Israel kontra kan Jesus, an imo baraan nga Surugoon nga imo ginhimo nga Mesiyas. Nagkaurosa hira hin pagbuhat han bisan ano, nga pinaagi han imo gahom ug pagbuot, imo na nga daan ginlarang nga mahinanabo. Ngan yana, Ginoo, kitaa an ira mga pagtarhog nga ira ginhimo, ngan ihatag ha amon nga imo mga surugoon an kamaisog hin pagpasangyaw han imo mensahe. Ipadapat an imo mga kamot hin panambal, ngan itugot nga buhaton unta an mga urosahon ngan mga milagro pinaagi han ngaran han imo baraan nga Surugoon nga hi Jesus.” Kahuman nira pag-ampo, nabay-og an dapit nga ira ginkatirokan. Napuno hira ngatanan han Espiritu Santo ngan nagtikang hira hin pagwali nga madasigon han mensahe han Dyos.

An Pulong han Ginoo.

SALMO RESPONSORIO

Sal 2:1-3, 4-7a, 7b-9

(b) Malipayon adton naglalaum han Ginoo.

 Kon di’ man, ini:

(b) Alleluia!

1. Kay ano nga an kanasoran,

nagplano man hin kasamokan?

Kay ano nga an mga tawo,

waray hangkag nga hin plano naghimo?

Nasupak, nasupil an ira kahadian,

nagkaarabuyon pa an ira mga punoan;

han Ginoo nga Dyos hin pagkontra,

pati an Hadi nga ginpili nira.

“Gawas kita han pagkahadi nira,

isalikway ta an ira pagdumara.” (b)

2. Tikang ha langit han iya trono,

gintinawaan la hira han Ginoo.

Gintamay an ira maluya nga plano.

Ha iya kasina, hira ginpahimangno;

ginhadlok hira han kapungot niya nga duro.

Iya siring, “Ha Sion, bukid nga baraan,

an akon hadi akon igbubutang.”

Siring han hadi, “Akon ipapahibaro,

an pulong ha akon han Ginoo. (b)

3. Nagsiring hiya, ‘Ikaw an anak ko,

Yana nga adlaw ako an amay nimo.

Pangaro kay ikaw akon tatagan,

imo an ngatanan nga kanasoran,

ug an bug-os nga kalibutan.

Mahigpit nga gahom an imo paghadi ha ira,

Magsasarang hira sugad hin buong nga daba.’” (b)

PAGBASA II  

Jn 3:1-8

Pagbasa tikang han santos nga ebanghelyo sumala kan Juan.

May-ada tawo nga Nicodemo an ngaran, usa nga pangulo han mga Judiyo, nga sakop han hugpo han mga Parisiyo. Usa ka gab-i, kinmadto hiya kan Jesus ngan nagsiring hiya, “Rabi, maaram kami nga magturutdo ka nga ginpadara han Dyos, kay waray makakahimo han mga orosahon nga imo ginbubuhat, gawas kon an Dyos aada ha iya.” Nagbaton hi Jesus, “Susumatan ko ikaw hin tinuod: waray tawo nga makakakita han Ginhadian han Dyos, labot kon matawo na liwat hiya.” Nagpakiana hi Nicodemo, “Uunanhon hin usa nga tigurang na hin katawo na liwat? Diri na gud hiya makakabalik ha tagoangkan han iroy niya, ngan ig-anak hin ikaduha!” Nagbaton hi Jesus, “Susumatan ko ikaw hin tinuod: waray tawo nga makakasulod han Ginhadian han Dyos labot kon matawo hiya pinaagi hin tubig ngan han Espiritu. Tikang hin mga kag-anak an lawasnon nga pagkatawo; kundi tikang han Espiritu an espirituhanon nga pagkatawo. Ayaw hipausa nga nasiring ako ha imo, ‘Kinahanglan matawo na liwat kamo ngatanan!’ Nahuyop an hangin bisan diin; hinbabatian mo an iya hinaganas, kundi diri ka maaram kon diin tikang ngan kon tikain. Sugad man liwat hito an ngatanan nga natatawo pinaagi han Espiritu.”

An Ebanghelyo han Ginoo.