PAGBASA I 

Buh 4:32-37

Pagbasa tikang han mga  Buhat han mga Apostoles.

An hugpo han mga magtinuohon usa la ha hunahuna ug kasingkasing. Waray usa ha ira nga nasiring nga tag-iya hiya han iya mga butang, kundi nag-angbitay hira han ngatanan nga mga butang nga ira naaangkon. Upod in dako nga gahom nagsaksi an mga apostoles han pagkabanhaw han Ginoo nga hi Jesus, ngan ginpakaupay gud han Dyos an ngatanan nga mga magtinuohon. Waray usa dida han ira hugpo in nagkikinahanglan. Adton may mga uma o mga balay, iginbabaligya ini, gindadara an kwarta nga palit hini, ngan ginhahatag ngadto han mga apostoles, ngan ginbabahinbahin an kwarta ha tagsatagsa sumala han iya kinahanglan.

Amo man ngani nga hi Jose nga usa nga Levita nga taga-Cipre, nga ginngaranan han mga apostoles nga Bernabe (nga an kahulogan, “Usa nga Magdarasig”) nagbaligya han iya kalugaringon nga uma, gindara ngan iginhatag ini ngadto han mga apostoles.

An Pulong han Ginoo.

SALMO RESPONSORIO

Sal 93:1ab, 1cd-2, 5

(b) Hadi an Ginoo, hiya binadoan hin pagkarangdon.

 Kon di’ man, ini:

(b) Alleluia!

1. Hadi an Ginoo! Hiya binadoan

hin pagkaharangdon ngan hin pagkakusgan. (b)

2. Diri mababantad inin kalibutan,

iginpahimutang gud ha kadig-onan.

Im’ trono, Ginoo, tindog na nga daan,

nga marig-on tikang pa ha tinikangan.

San-o magtikang an mga katuigan,

ikaw nakada na ha kamaihaan. (b)

3. O Ginoo, an imo mga balaod,

waray pagkabantad nagpapadayon gud;

ngan an imo Templo baraan nga gayod,

ha kadayonan gud baraan matuod. (b)

PAGBASA II        

Jn 3:7b-15

Pagbasa tikang han santos nga ebanghelyo sumala kan Juan.

Nagsiring hi Jesus kan Nicodemo: ‘Kinahanglan matawo na liwat kamo ngatanan!’ Nahuyop an hangin bisan diin; hinbabatian mo an iya hinaganas, kundi diri ka maaram kon diin tikang ngan kon tikain. Sugad man liwat hito an ngatanan nga natatawo pinaagi han Espiritu.” “Uunanhon man ini?” nagpakiana hi Nicodemo. Nagbaton hi Jesus, “Bantogan ka nga magturutdo ha Israel, ngan diri ka ba nakakasabot hini? Susumatan ko ikaw hin tinuod: nagyayakan kami han amon hinbabaroan ngan nagsusumat kami han amon hinkit-an, kundi waray ha iyo naruruyag hin pagkarawat han amon mensahe. Diri kamo natuod ha akon kon naghihimangraw ako ha iyo mahitungod han tunan-on nga mga butang; sanglit uunanhon pagtuod niyo ha akon, kon magsumat ako ha iyo mahitungod han langitnon nga mga butang? Ngan waray pagud nakasaka ha langit labot han Anak han Tawo nga linmusad tikang ha langit!” Sugad nga gin-isa ni Moises didto ha kamingawan an halas nga bronse, kinahanglan man liwat nga isahon an Anak han Tawo hin sugad nga paagi, basi makaangkon han dayon nga kinabuhi an ngatanan nga natoo ha iya.

An Ebanghelyo han Ginoo.