PAGBASA I 

Buh 5:17-26

Pagbasa tikang han mga  Buhat han mga Apostoles.

Niyan an Labaw nga Padi ngan an ngatanan niya nga mga kaupod nga mga sakop han hugpo han mga Sadusiyo naawa hin duro han mga apostoles, sanglit nagkaurosa hira hin pagpugong ha ira. Gindakop nira an mga apostoles ngan iginsulod ha prisohan. Kundi hito ngahaw nga gab-i gin-abrehan hin usa nga anghel han Ginoo an mga portahan han prisohan ngan ginpagawas an mga apostoles, ngan nagsiring ha ira, “Kadto ngan tindog kamo didto ha Templo ngan pagsumati an mga tawo mahitungod hini nga bag-o nga kinabuhi.” Gintuman ini han mga apostoles, ngan han maagahon pa sinulod hira han Templo ngan nagtikang hin pagtutdo. An Labaw nga Padi ngan han iya mga kaupod nagtawag han ngatanan nga katigurangan nga Judiyo ngadto hin usa nga katirok han Labaw nga Hukmanan. Niyan nagsugo hira hin pagkuha han mga apostoles ha prisohan basi umatubang ha ira. Kundi han pagkadto didto han mga opisyal, waray na didto an mga apostoles. Sanglit binalik hira ngadto han Labaw nga Hukmanan ngan nagsumat, “Han pag-abot namon ha prisohan, hinkit-an namon nga trinangkahan ini hin maupay ngan binantayan an mga portahan han ngatanan nga mga gwardya; kundi han pag-abrehi na namon han mga portahan, waray namon hinkit-an nga tawo ha sulod!” Han pakabati hini han kapitan han mga gwardya han Templo, ngan han mga puno han kapadian, nahipausa hira kon ano an nahinabo han mga apostoles. Niyan inmabot in usa ka tawo nga nagsiring ha ira, “An mga tawo nga iyo ginpriso aadto na ha Templo nagtututdo han mga tawo!” Sanglit kinmadto ha Templo an kapitan upod an iya mga sakop, ngan gindakop nira an mga apostoles. Kundi waray hira gumamit hin kusog kay nahadlok hira nga bangin pagbatoon hira han mga tawo.

An Pulong han Ginoo.

SALMO RESPONSORIO

Sal 34:2-3, 4-5, 6-7, 8-9

(b) Panamamati-an han Ginoo an pangaraba han mga kablas.

 Kon di’ man, ini:

(b) Alleluia!

1. Pasalamatan ko pirme an Ginoo,

pagdayaw ha iya di' maundang ako.

Tungod han iya buhat ak' dadayawon,

an ginsakit mamati, magmalipayon! (b)

2. An pagkaharangdon han aton Ginoo,

upod ha akon isangyaw na gud niyo;

pagdayaw ha iya mag-urusa kita,

aton pagbayawon adton ngaran niya.

Nag-ampo ak' ngan ginbaton han Ginoo,

gintalwas niya han tanan kahadlok ko. (b)

3. Tan-aw ha iya ngan magmalipayon man;

Di’ na mahiawod, di' na maalohan.

Nasangpit an kabos ngan nabaton hiya,

natalwas han tanan kakurian nira. (b)

4. Anghel han Ginoo bantay, panalipod,

an ha Ginoo nahadlok ngan natahod.

Ha imo ngahaw, Ginoo, usisaha,

makikita mo nga maupay gud hiya;

palaran an tawo, waray kabaraka,

kon iya katalwasan tikang ha iya. (b)

PAGBASA II      

Jn 3:16-21

Pagbasa tikang han santos nga ebanghelyo sumala kan Juan.

Kay ginhigugma gud han Dyos an kalibutan, nga iginhatag niya an iya bugtong nga Anak, basi diri unta mamatay an ngatanan nga nasarig ha iya, kundi makaangkon han dayon nga kinabuhi. Kay waray magsugo an Dyos han iya Anak nganhi hin paghukom han kalibutan, kundi hin pagtalawas han kalibutan. Diri ginhuhukman an bisan hin-o nga nasarig han Anak, kundi ginhukman na an bisan hin-o nga diri nasarig, kay waray hiya sumarig han bugtong nga Anak han Dyos. Amo ini an paagi han paghukom: inabot an kapawa ha kalibutan, kundi ginpalabi han mga tawo an kasisidman kay han kapawa, kay nagbubuhat man hira hin maraot. Nadiri han kapawa, an bisan hin-o nga nagbubuhat hin karat-an, ngan nalikay han kapawa, kay diri hiya naruruyag nga hikit-an an iya magraot nga mga buhat. Kundi napakita ha kapaw-an an bisan hin-o nga nagbubuhat hin matadong, basi hikit-an nga nagsusugot hiya han Dyos.

An Ebanghelyo han Ginoo.