PAGBASA I 

Gen 1:26-2:3

Pagbasa tikang han Basahan han Genesis.

Niyan nagsiring an Dyos, “Ngan yana paghihimoon ta an tawo; ha aton panagway ug ladawan hihimoon ta hiya. Maghahadi hiya han kaisdaan, katamsihan, ngan han ngatanan nga kamanampan, ihayop ngan ihalas, dagko ngan gudti!” Sanglit gintuha han Dyos an tawo, nga ginhimo hiya nga sugad ha iya ngahaw. Nagtuha hiya hin lalake ug babaye, ginbendisyonan hira ngan ginsiring, “Magkamay-ada kamo damo nga mga anak, basi mag-ukoy ha bug-os nga tuna an iyo mga tulin ngan paghadian nira ini. Iginbubutang ko kamo nga tinaporan han kaisdaan, han katamsihan, ngan han ngatanan nga ihalas nga kamanampan. Iginhatag ko an ngatanan nga magkalainlain nga mga binhe ngan an ngatanan nga magkalainlain nga mga bunga nga iyo kakaonon; kundi iginhatag ko an kabanwaan ngan an mga tanom para han ngatanan nga ihalas nga kamanampan ngan han ngatanan nga katamsihan”—ngan natuman ini. Nakita han Dyos an ngatanan nga iya ginhimo ngan nalipay hiya hin duro. Linabay an kagab-ihon ngan inabot an aga—amo adto an ikaunom nga adlaw.

Sanglit nahuman an bug-os nga kalibutan ngan an mga butang ha kalangitan. Dida han ikapito ka adlaw, nahuman han Dyos an iya mga gintuha, ngan pinahuway hiya. Ginbendisyonan niya an ikapito nga adlaw ngan ginlain niya ini sugad nga usa nga talagsaon nga adlaw, kay hito nga adlaw nahuman niya an iya pagtuha ngan hinunong na hiya hin pagtuha.

An Pulong han Ginoo.

Kon di’ man, ini

Col 3: 14-15,17, 23-25

Pagbasa tikang han Surat ni San Pablo ngadto han mga taga Colosas.

Mga kabugtoan: Ngan ha ngatanan hini idugang an gugma nga naghihigot han ngatanan nga mga butang ngada hin hingpit nga pagkaurosa. Papaghadia ha iyo mga kasingkasing an kalinaw nga ihinahatag ni Cristo, kay tungod hini nga kalinaw gintawag kamo han Dyos ngada hin usa nga lawas. Ngan pagpasalamat kamo. An ngatanan nga iyo bubuhaton o yayaknon kinahanglan buhaton niyo ha ngaran han Ginoo nga Jesus, samtang nga nagpapasalamat kamo han Dyos nga Amay pinaagi ha iya.

Bisan ano an iyo pagbuhaton, buhata niyo ha bug-os niyo nga kasingkasing, sugad hin nagbubuhat kamo para han Ginoo, ngan diri para la hin mga tawo. Panumdom nga babaloson kamo han Ginoo; kakarawton niyo an gintipigan niya nga balos para han iya mga tawo. Kay hi Cristo amo an matuod nga Agaron nga gin-aalagad niyo. An nagbubuhat hin sayop, bisan hin-o hiya, pagsisirotan liwat tungod han ginbubuhat niya nga mga sayop; kay naghuhukom han ngatanan an Dyos sugad han kaangayan.

An Pulong han Ginoo.

SALMO RESPONSORIO

Sal 90:2, 3-4, 12-13, 14 & 16

(b) Ginoo, hatagi hin kalampusan an amon mga buhat.

 Kon di’ man, ini:

(b) Alleluia!

1. Han waray pa nimo himoa an kabukiran,

han waray pa mahimugso an kalibutan,

Dyos ka, waray tinikangan ug ha kadayonan. (b)

2. Imo ginsugo pagpabalik an mga tawo,

ha daan niya nga kahimtang nga tapotapo.

Yukot nga mga tuig ha imo pagtan-aw,

sugad la hira hin usa ka adlaw.

Sugad hin kakulop nga linmabay na,

sugad hin takna ha gab-i nga pag-agma. (b)

3. Itutdo nga lumalabay la an kinabuhi,

basi mamay-ada kinaadman kami.

Tubtob san-o an imo kasina ha amon, Ginoo,

kalooyi an mga surugoon nimo. (b)

4. Kada aga pun-a kami han imo gugma,

basi kami ha imo dayuday magkanta.

Pakitaa kami, imo mga surugoon,

hadton mga buhat mo nga urosahon;

amon katulinan imo pakitaon,

hadton imo dako nga pagkaharangdon. (b)

PAGBASA II          

Mt 13:54-58

Pagbasa tikang han santos nga ebanghelyo sumala kan Mateo.

Ngan inuli hi Jesus ngadto han iya kalugaringon nga bungto. Nagtutdo hiya didto ha ira sinagoga, ngan nahipausa an nagpakabati ha iya, “Diin man niya kuhaa in sugad nga kinaadman?” nagpakiana hira. “Gin-unan-o niya hin pagbuhat han mga milagro? Diri ba hiya an anak han panday? Diri ba hi Maria an iroy niya ngan diri ba hira Santiago, Jose, Simon, ug Judas an iya kabugtoan? Diri ba nag-uukoy dinhe an iya kabugtoan nga kababayen-an? Diin man kuhaa niya ini ngatanan?” Sanglit ginsalikway hiya nira.

Nagsiring hi Jesus ha ira: “Gintatahod in manaragna bisan diin gawas han iya kalugaringon nga bungto ngan han iya kalugaringon nga panimalay.” Waray hiya pagbuhat didto hin damo nga mga milagro kay waray man nira pagtoo.

An Ebanghelyo han Ginoo.