PAGBASA I 

Buh 5:27-32, 40b-41

Pagbasa tikang han mga  Buhat han mga Apostoles.

Ginpasulod nira an mga apostoles, ginpaatubang han Labaw nga Hukmanan, ngan ginpakianhan hira han Labaw nga Padi. Nagsiring hiya, “Amon kamo gindid-an hin mahigpit nga diri kamo magtutdo ha ngaran hini nga tawo, kundi kitaa an iyo ginbuhat! Iginpasarang niyo ha bug-os nga Jerusalem an iyo pagturon-an, ngan karuyag pa niyo nga kami an pagbasolon han iya pagkamatay!” Binaton hi Pedro ngan an iba nga mga apostoles, “Kinahanglan pagsugton namon an Dyos, diri an mga tawo. Nagbanhaw kan Jesus an Dyos han amon kaapoy-apoyan kahuman niyo pataya hiya pinaagi hin pagraysangan ha iya ha kros. Ngan ginbanhaw hiya han Dyos ngadto ha iya tuo sugad nga Pangulo ngan Magtaralwas, hin paghatag ha mga tawo han Israel hin higayon hin pagbasol, ngan basi mapasaylo an ira mga sala. Mga saksi kami hini nga mga butang—kami ngan an Espiritu Santo nga amo an hatag han Dyos hadton mga nagsusugot ha iya.”

Ginsugo hira nga diri na gud magwali ha ngaran ni Jesus; ngan katapos ginbuhian hira. Han pagbaya na han mga apostoles han Labaw nga Hukmanan, maglipayon gud hira kay an Dyos nag-isip ha ira nga takos hin pag-antos hin mga pakaalo tungod han ngaran ni Jesus.

An Pulong han Ginoo.

SALMO RESPONSORiO          

Sal 30:2 & 4, 5-6, 11-12, 13

(b) Pagdayegon ka, Ginoo, kay gintalwas mo ako.

1. Nagdadayaw ako ha imo, Ginoo,

kay imo na man gintalwas ako,

waray mo itugot mga kaaway nakon,

nga ira na la ako pagyinubiton.

Ikakadto na ako ha Kahiladman,

kundi kamatayon ko imo ginpudngan. (b)

2. Pagkanta, pagdayaw kamo han Ginoo,

kamo, iya matinumanon nga mga tawo;

ginbuhat ha imo, ayaw hingalimti,

ngan hiya, an Baraan, pasalamati.

Diri nag-iiha an iya kasina,

ha kadayonan pagkamaupay niya;

bisan pa ha gab-i may-ada mga luha,

kundi kalipay naabot pagkaaga. (b)

3. Pamatii, Ginoo, ngan kalooyi,

intawon hi ako, Ginoo, buligi!”

Imo ginlipay hin sayaw an kabido,

nalipay ako, nakuha an kasubo.

Sanglit diri na gud ako magmimingaw,

akon kakantahon in mga pagdayaw;

Ginoo, hi ikaw gud la an Dyos nakon,

akon ka pasasalamatan hin dayon. (b)

PAGBASA II

Gnp 5:11-14

Pagbasa tikang han basahan han Ginpadayag.

Siniplat ako ngan akon hinbatian in yinukotyukot nga mga anghel! Natukdaw hira ngan ira ginlilibotan an trono, an upat nga buhi nga mga binuhat ngan an mga katigurangan, ngan nagkanta hira hin dako nga tingog: “An Kordero nga ginpatay takos kumarawat hin gahom, bahandi, kinaadman, ngan kusog, dungog, himaya, ngan pagdayaw!” Ngan hinbatian ko an tagsa nga binuhat didto ha langit, dinhe ha tuna, ngan didto ha kahiladman, nga didto ha dagat-an ngatanan nga buhi nga binuhat dinhe ha kalibutan—ngan nagkakanta hira: “Ha iya nga nalingkod ha trono, ngan ngadto han Kordero, magin an pagdayaw ngan dungog, himaya, ngan gahom, ha dayon nga mga katuigan!” Nagbaton an upat nga buhi nga mga binuhat, “Matuman kunta!” Ngan an mga katigurangan nanhapa ngan nagsingba.

An Pulong han Ginoo.

EBANGHELYO

Jn 21:1-19

[ Jn 21:1-14]

Pagbasa tikang han santos nga ebanghelyo sumala kan Juan.

[ Katapos hini, nagpakita liwat hi Jesus ngadto han iya mga tinun-an didto ha Lanaw han Tiberias. Sugad hini an iya pagpakita. Urosa hira Simon Pedro, hi Tomas (an tinatawag nga Karuha), hi Natanael (an taga-Cana, ha Galilea), an mga anak ni Sebedeo, nga duha pa nga mga tinun-an ni Jesus. Nagsiring hi Simon Pedro ha ira, “Mangingisda ako.” “Maupod kami,” nagsiring hira. Sanglit kinadto hira ngan pinalawod hira; kundi waray gud nira nadakop hadto nga bug-os nga gab-i. Han tisirang na an adlaw, tinindog hi Jesus ha baybayon, kundi waray makakilala an mga tinun-an nga hi Jesus ngay-an adto. Nagsiring hiya ha ira, “Nakadakop ba kamo?” “Waray!” binaton hira. Nagsiring hiya ha ira, “Huloga an iyo pukot ha tuo han sakayan, ngan makakadakop kamo.” Sanglit ginhulog nira an pukot, ngan waray na hira pakakaakos hin pag-alsa tungod han kadamo han isda. Nagsiring kan Pedro an tinun-an nga hinigugma ni Jesus, “Amo hiya an Ginoo!” Han pakabati ni Simon Pedro nga amo hiya an Ginoo, iginbagkos niya an iya bado (kay lubas man hiya) ngan linukso ngadto ha tubig. Dinuong ha baybayon an iba nga mga tinun-an, nga nagbubutong han pukot nga puno hin isda, kay diri man hira hirayo ha tabi, may mga kaunoman (60) la ka dupa. Paghaw-as na nira, hinkit-an nira in mga baga nga may ginsusugba nga isda ngan mga tinapay. Ngan nagsiring ha ira hi Jesus, “Pagdara ngadi hin mga isda nga iyo pa la nadakop.” Sanglit sinakay hi Pedro ngan ginguyod niya ngadto ha baybayon an pukot nga puno hin dagko nga mga isda, usa kagatos kalim-an kagtulo (153) ngatanan; waray magisi an pukot, bisan kon damo hin duro an mga isda. Nagsiring hi Jesus ha ira, “Kadi, ngan pamahaw kita.” Waray gud han mga tinun-an nangahas hin pagpakiana ha iya, “Hin-o ka?” kay nasayod man hira nga amo hiya an Ginoo. Sanglit dinaop hi Jesus, ginkuha an tinapay, ngan iginhatag ha ira, ngan sugad man an mga isda. Amo ini an ikatulo nga pagpakita ni Jesus han iya mga tinun-an katapos niya mabanhaw. ]

Katapos nira pamahaw, nagsiring hi Jesus kan Simon Pedro, “Simon Pedro, anak ni Juan, nahigugma ka ba ha akon labaw han ira paghigugma ha akon?” Nagbaton hiya, “Oo, Ginoo, sayod ka nga nahigugma ako ha imo.” Nagsiring ha iya hi Jesus, “Mangnoi an akon nati nga mga karnero.” Nagsiring hi Jesus ha iya hin ikaduha, “Simon, anak ni Juan, nahigugma ka ba ha akon?” Nagbaton hiya, “Oo, Ginoo, sayod ka nga nahigugma ako ha imo.” Nagsiring ha iya hi Jesus, “Mangnoi an akon mga karnero.” Nagsiring gihapon hi Jesus hin ikatulo, “Simon, anak ni Juan, nahigugma ka ba ha akon?” Nabido hi Pedro kay ikatulo na ini nga iya pakianhi, “Nahigugma ka ba ha akon!” Ngan nagsiring hiya kan Jesus, “Ginoo, sayod ka han ngatanan nga mga butang. Sayod ka nga nahigugma ako ha imo!” Nagsiring na liwat hi Jesus ha iya, “Mangnoi an akon mga karnero. Susumatan ko ikaw hin tinuod: han batan-on ka pa, ikaw la an nagbabakos ha imo ngahaw, ngan napasingadto ka bisan diin nga karuyag mo kadtoan, kundi kon malagas ka na, uunaton mo na la an imo mga kamot, ngan iba na an magbabakos ha imo, ngan dadad-on ka ngadto hin dapit nga diri mo karuyag kadtoan.” (Iginyakan ini ni Jesus ha pagpasabot kon ano nga paagi an pagkamatay ni Pedro ngan an iya paghimaya han Dyos.) Ngan nagsiring ha iya hi Jesus, “Sunod ha akon!”

An Ebanghelyo han Ginoo.

PAG-AMPO HAN BUNGTO

Mga kabugtoan, ha dako nga kalipay ug pasalamat ha aton makagara hum nga Ginoo, an nabanhaw nga Cristo, ipahayag naton nga malaumon an aton waray ruhaduha nga pagtapod sa Dyos, ha pag-ampo nga nasiring:

Kalooye ngan buligi kami, Ginoo.

1) Basi an mga tinubyanan han Singbahan dayuday mahinumdum ngan dasigon han paghigugma ni Jesucristo nga padayon nga nagsusugo ha ira hin tinood nga panimangno ha iya panon. Mag-ampo kita ha Ginoo.

2) Basi ha waray hunong nga pag-aghat ug pagrig-on han Dyos, diri lumuya an mga namumuno ha aton gobyerno ug katilingban hin paningkamot nga magkaurosa an kadam’an ha kauswagan ug kaupayan. Mag-ampo kita ha Gino0.

3) Basi pakusgon pa an aton pagtoo ug pagtapod sa Dyos dida han aton pagsaksi han Maupay nga Sumat ni Jesucristo, bisan ha butnga hin mga kakurian ug mga pagsulay. Mag-ampo kita ha Ginoo.

4) Basi an kalipay han bungto sa Dyos dayuday magduso han kada matinuohon, labi na gud han batan-on nga mga kaapi han singbahan, ngadto hin madinasigon nga pagpasamwak han Dyosnon nga mga kamatuoran. Mag-ampo kita ha Ginoo.

 5) Basi an aton kabugtoan nga nagkamatay na mahiagom na han kahingpitan han saad nga mga kaupayan didto han Dyosnon nga puruy-anan. Mag-ampo kita ha Ginoo.

 Pamatii, maloloy-on nga Ginoo, ngan batona gad an mga pangamuyo han imo bungto; an imo mga upa ha amon magdasig unta han amon pagmisyon, ngan magpalangbo han amon kinabuhi nga Cristohanon, kay ikaw buhi ug hadi ha dayon nga katuigan. Amen.