PAGBASA I 

Buh 7:51—8:1a

Pagbasa tikang han mga  Buhat han mga Apostoles.

Namulong hi Esteban han mga katigurangan ug mga Escriba: “Pagkamatig-a han iyo mga ulo! Pagkadiri matinuohon han iyo mga kasingkasing! Pagkabungol niyo han mensahe han Dyos! Pareho gud kamo han iyo mga ginikanan: dayuday sinusupak niyo an Espiritu Santo! May-ada ha manaragna nga waray pagpakurii han iyo mga ginikanan? Ginpatay nira an mga surugoon han Dyos nga hadto pa nagpahibaro mahitungod han pag-abot han iya matadong nga Surugoon. Ngan yana iyo ginlingo ngan ginpatay hiya. Hi kamo an kinarawat han Balaod han Dyos nga iginhatag pinaagi hin mga anghel, kundi waray ini niyo pagtumana!”

Han namamati kan Esteban an mga sakop han Labaw nga Hukmanan, duro gud an ira kasina ngan nanligot an ira mga ngipon tungod hin kapungot ha iya. Kundi hinangad ha langit hi Esteban nga puno han Espiritu, ngan nakita niya an himaya han Dyos ngan hi Jesus nga natindog ha tuo han Dyos. Nagsiring hiya, “Kitaa, nakita ako nga nabuksan an langit ngan an Anak han Tawo nga natindog ha tuo han Dyos!”  Sinagpo han ira mga kamot an ira mga talinga upod in paggoliat, ngan nagdurungan hira ngatanan hin pagdasmag ha iya. Ginlabog hiya nira ngadto ha gawas han syudad, ngan didto ginbato hiya. Iginbutang han mga saksi an ira mga kurugpos ha tiilan hin usa nga batan-on nga Saulo an ngaran. Ginbinato nira hi Esteban samtang nag-aampo hiya han Ginoo nga nasiring, “Ginoo nga Jesus, karawata an akon espiritu!” Linuhod hi Esteban ngan ginoliat, “Ginoo! Ayaw ini hira pagsalaa hini nga ira ginbuhat!” Kahuman niya pagyakan hini, namatay hiya.

Ngan inabuyon hi Saulo han pagpataya kan Esteban.

An Pulong han Ginoo.

SALMO RESPONSORIO

Sal 31:3cd-4, 6 & 7b & 8a, 17 & 21ab

(b) Ha imo mga kamot, Ginoo, itinutubyan ko an akon kalag.

Kon di’ man, ini:

(b) Alleluia!

1. Magin akon ka darangpanan

hin pagpanalipod ha akon;

akon panalipod hin pagtalwas ha akon.

Ikaw an akon arayopan ngan akon panalipod;

mandoi ngan pag-unhi ako

sugad han imo iginsaad. (b)

2. Ha imo kamot itinutubyan ko an akon espiritu.

Tatalwason mo ako, Ginoo;

matinumanon ka nga Dyos.

kundi nasarig ako ha imo.

Marayhak ako ngan malilipay

tungod han imo dayuday nga paghigugma. (b)

3. Kalooyi an imo surugoon;

talwasa ako ha imo dayuday nga paghigugma.

Tinatago mo hira hin waray pagkahadlok ha imo atubangan,

tikang han mabudhion nga mga larang han mga tawo. (b)

PAGBASA II          

Jn  6:30-35

Pagbasa tikang han santos nga ebanghelyo sumala kan Juan.

Nagpakiana liwat hira, “Ano nga tigaman han imo gahom an imo bubuhaton basi namon hikit-an, ngan sumarig kami ha imo? Ano man an bubuhaton mo? Nangaon han mana didto ha kamingawan an amon mga ginikanan, sumala han siring han kasuratan: ‘Gintagan hira niya hin tinapay nga tikang ha langit.’” Nagsiring hi Jesus, “Susumatan ta kamo hin tinuod: diri tikang ha langit nga pagkaon an iginhatag ni Moises ha iyo; an akon Amay an nahatag ha iyo han tinuod nga pagkaon nga tikang ha langit. Kay an pagkaon nga ihinahatag han Dyos amo hiya nga linusad tikang ha langit, ngan nahatag hin kinabuhi ha kalibutan.” Ngan naghangyo hira ha iya, “Dayuday tagi kami hini nga pagkaon.” Nagsumat hi Jesus ha ira, “Ako amo an pagkaon nga nahatag han kinabuhi. An napakadi ha akon diri na gud gugutomon; ngan an nasarig ha akon diri na gud uuhawon.

An Ebanghelyo han Ginoo.