PAGBASA I 

Buh 8:26-40

Pagbasa tikang han mga  Buhat han mga Apostoles.

Nagsiring kan Felipe in usa nga anghel han Ginoo, “Pag-andam ngan kadto ha timogan, ha dalan nga tikang ha Jerusalem tipakadto ha Gaza.” (Diri na ginagamit ini nga dalan.) Sanglit nag-andam hi Felipe ngan kinmadto. Niyan may usa nga yunuko nga taga-Etiopia nga tipauli na. Usa hiya nga importante nga opisyal ug tisurero ni Candace o Rayna han Etiopia. Kinadto hiya ha Jerusalem hin pagsingba han Dyos, ngan nagtitipauli na nga sakay han iya karuwahe. Samtang nagsasakay hiya, nagbibinasa hiya han basahan nga sinurat ni Isaias nga manaragna. Nagsiring kan Felipe an Espiritu Santo, “Kadtoa ngan duoka ito nga karuwahe.” Dinalagan hin paghirani hi Felipe ngan hinbatian niya nga nagbabasa an yunuko han basahan ni manaragna Isaias. Niyan nagpakiana hi Felipe ha iya, “Nakakasabot ka ba han imo ginbabasa?”

Nagbaton an opisyal, “Uunanhon ko hin pakasabot kon waray magtutdo hini ha akon?” Ngan ginhangyo niya hi Felipe nga sumakay han karuwahe sapit ha iya. Amo ini an bahin han Kasuratan nga iya ginbabasa: “Sugad hiya hin karnero nga gindara basi pag-ihawon. Sugad hiya hin nati nga karnero nga waray aringasa kon gin-aarotan. Ginpakaalohan hiya ngan waray tagi hin katadongan. Waray makakagsumat mahitungod han iya katulinan, kay natapos na man an iya kinabuhi dinhe ha tuna.”

Nagsiring kan Felipe an opisyal, “Sumati ako kon hin-o an hinnanabihan hini han manaragna. Hiya ba, o lain ba nga tawo?” Sanglit gin-asoyan hiya ni Felipe han Maupay nga Sumat mahitungod kan Jesus tikang gud dinhe hini nga bahin han Kasuratan. Samtang nagpapadayon hira ha dalan, inmabot hira hin dapit nga may-ada tubig, ngan nagsiring an opisyal, “Iini na in tubig; ano pa man in nakakaulang hin pagbunyag ha akon?” (Nagsiring ha iya hi Felipe, “Mabubunyagan ka kon kinasingkasing gud an imo pagtoo.” Binaton hiya, “Oo, natoo ako nga hi Jesu-Cristo amo an Anak han Dyos.”) Ginpaukoy han opisyal an karuwahe, linugsong hira Felipe ngan an opisyal ngadto han tubig, ngan ginbunyagan hiya ni Felipe. Han paghaw-as nira han tubig, gindara hi Felipe han Espiritu han Ginoo ngan waray na hiya hikit-i han opisyal. Kundi nagpadayon hin pagsakay nga malipayon an opisyal. Nakasabot na la hi Felipe nga nakadto na hiya ha Azoto. Nagpadayon hiya ngadto ha Cesarea ngan nagwali hiya han Maupay nga Sumat ha kada bungto nga iya inagian.

An Pulong han Ginoo.

SALMO RESPONSORIO

Sal 66:8-9, 16-17, 20

(b) Goliat hin kalipay sa Dyos, ngatanan dinhi ha tuna.

Kon di’ man, ini:

(b) Alleluia!

1. Pagdayaw han Dyos, kamo nasod ngatanan,

Himoa’n iyo pagdayaw nga hidunggan.

Iya gintugot nga kita mabuhi pa,

ngan waray tumugot nga mapukan kita. (b)

2. Kamo ngatanan nga ha Dyos matahoron,

kadi ha akon ngan iyo pamation;

kay akon igsasaysay an susumaton,

han ngatanan nga ginbuhat n'ya ha akon.

Nagsangpit ak’ hin pakibulig ha iya,

ngan ak’ hiya gindayaw hin mga kanta. (b)

3. Tungod hini an Dyos ak’ gindadayaw man,

tungod kay an iya gugma di' naundang. (b)

PAGBASA II          

Jn 6:44-51

Pagbasa tikang han santos nga ebanghelyo sumala kan Juan.

Ginsiring ni Jesus an kadam-an nga mga tawo: “Waray makakakadi ha akon labot kon kabigon hiya ngadi ha akon han Amay nga nagsugo ha akon; ngan babanhawon ko hiya ha kataposan nga adlaw. Nagsurat an mga manaragna, ‘Tututdoan han Dyos an ngatanan nga mga tawo.’ An ngatanan nga namamati han Amay ngan nahibabaro tikang ha iya napakadi ha akon. Diri karuyag sidngon hini nga may-ada na nakakita han Amay; hiya la nga tikang han Dyos an nakakita han Amay. Susumatan ko kamo hin tinuod; may-ada na dayon nga kinabuhi adton natoo. Amo ako an pagkaon nga nahatag han kinabuhi. Nangaon han mana didto ha kamingawan an iyo mga ginikanan, kundi nagkamatay hira. Kundi diri na mamamatay an nakaon han pagkaon nga tikang ha langit. Amo ako an pagkaon nga nahatag han kinabuhi nga tikang ha langit. Mabubuhi ha kadayonan an kumaon hini. Ngan an pagkaon nga ihahatag ko ha iya amo an akon unod, nga ihinahatag ko basi mabuhi an kalibutan.”

An Ebanghelyo han Ginoo.