PAGBASA I 

Buh 9:31-42

Pagbasa tikang han mga  Buhat han mga Apostoles.

Tungod hini nagkamay-ada kalinaw an singbahan ha bug-os nga Judea, Galilea, ug Samaria. Pinaagi han bulig han Espiritu Santo nagmadig-on an singbahan ngan nagdamo, samtang nagpapadayon hira hin pag-ukoy dida hin kamatinahoron han Ginoo. Nagsudoy hi Pedro ha ngatanan nga dapit, ngan usa ka panahon kinadto hiya hin pagduaw han mga tawo han Dyos nga nag-uokoy didto ha Lida. Iginkita hiya didto hin tawo nga paralitiko nga Eneas an ngaran. Waray na ini hiya makabuhat sulod hin walo ka tuig. Ginsiring hiya ni Pedro, “Eneas, gin-uupay ka ni Jesu-Cristo. Buhat ngan lukota an imo higdaan.” Binuhat dayon hi Eneas. Nakakita ha iya an ngatanan nga mga tawo nga nag-uokoy ha Lida ngan ha Saron, ngan tinoo hira han Ginoo.

Didto ha Jope may-ada usa nga matinuohon nga babaye nga ginngangaranan nga Tabita. (Dorcas an iya ngaran ha Griego, nga bugsok an kahulogan.) Ginamit niya an iya bug-os nga panahon hin pagpakaupay ngan pagbulig han mga kablas. Hito nga panahon nasakit hiya ngan namatay. Ginpunasan an iya lawas ngan ginhayad didto han kwarto ha igbaw. Diri gud hirayo an Jope tikang ha Lida. Han pakabati han mga magtinuohon ha Jope nga nakadto hi Pedro ha Lida, ginsugo nira in duha ka tawo ngadto ha iya upod in tugon nga magdagmit gud hiya hin pagkadto ha Jope. Sanglit nag-andam hi Pedro ngan inupod ha ira. Han pag-abot niya, gindara hiya nira ngadto han kwarto ha igbaw. Gin-alirongan hi Pedro han ngatanan nga mga balo nga kababayen-an nga nagtitinangis, ngan iginpapakita ha iya an mga bado ngan mga kurugpos nga ginhimo ni Dorcas han buhi pa hiya. Ginpaguwa hira ngatanan ni Pedro. Linuhod ngan nag-ampo hiya. Kahuman, inatubang niya an minatay ngan sidngon, “Tabita, buhat!” Pinukrat ini hiya, ngan han pakakita niya kan Pedro, liningkod hiya. Ginkaptan ni Pedro an kamot han babaye ngan binuligan hiya pagtukdaw. Kahuman, gintawag niya an mga magtinuohon ngan an mga balo nga kababayen-an, ngan igintubyan niya ha ira hi Dorcas nga buhi na. Nahibantog ini ha bug-os nga Jope, ngan damo nga mga tawo in tinoo han Ginoo.

An Pulong han Ginoo.

SALMO RESPONSORIO

Sal 116:12-13, 14-15, 16-17

(b) Uunanhon ko an pagbalos han Ginoo tungod han kaupayan nga iya ginhatag ha akon?

Kon di’ man, ini:

(b) Alleluia!

1. Ano an ak’ igbabalos han Ginoo,

han ngatanan niya nga kaupayan ko?

Pagdadad-an ko h’ya hin halad nga bino,

nga pasalamat nga gintalwas n’ya ako. (b)

2. Babaydan ko’n Ginoo’n ak’ ginsumpaan,

dida ha katirok han iya katawhan;

ha pagtan-aw han Ginoo mahal gudman

an kamatayon han ‘ya mga baraan. (b)

3. Imo ako surugoon, O Ginoo,

ngan nag-aalagad gud ako ha imo;

sugad gud han ginbuhat hadton nanay ko,

tikang hin kamatay gintalwas mo ako.

Ighahalad, ighahatag ko ha imo,

halad nga tinubod nga pasalamat ko;

ngan maghahalad ak’ han akon pag-ampo,

ngan matatawag han ngaran han Ginoo. (b)

PAGBASA II          

Jn 6:60-69

Pagbasa tikang han santos nga ebanghelyo sumala kan Juan.

Nakabati hini in damo han iya mga tinun-an ngan nagsiring, “Makuri hin duro matugkad ini nga pagturon-an. Hin-o in makakasantop hini?” Bisan kon waray nagsumat, nahibaroan ni Jesus nga nagnginginurutob an iya mga tinun-an mahitungod hini: sanglit nagsiring hiya ha ira, “Nakapaluya ba ini han iyo pagtoo ha akon? Niyan, ano daw la kon mahibalik an iyo pagtoo kon kumita na kamo han Anak han Tawo nga masaka ngadto han dapit nga iya anay inokyan? An Espiritu han Dyos an nahatag hin kinabuhi; diri gud ito mahihimo hin gahom nga lawasnon. Espiritu ngan kinabuhi an iginhimangraw ko ha iyo nga mga pulong. Kundi may pira ha iyo nga diri natoo ha akon.” (Tikang pa ha tinikangan, maaram na nga daan hi Jesus kon hin-o an diri natoo, ngan kon hin-o an maglilingo ha iya.) Ngan nagsiring pa hiya, “Amo gud ini an hinungdan nga nagsiring ako ha iyo, nga waray gud makakadaop ha akon labot kon itugot han Amay nga mahimo ito niya.”

Tungod hini, binulag in damo han iya mga tinun-an ngan waray na bumunyog ha iya. Sanglit nagpakiana hi Jesus han dose nga mga tinun-an, “Ngan kamo karuyag ba liwat niyo hin pagbaya ha akon?” Binaton ha iya hi Simon Pedro, “Ngain pa man kami kakadto, Ginoo? Ikaw an may mga pulong nga nahatag han dayon nga kinabuhi. Ngan yana natoo ngan maaram kami nga amo ka an Baraan nga tikang sa Dyos.”

An Ebanghelyo han Ginoo.