PAGBASA I 

Buh 13:14, 43-52

Pagbasa tikang han mga  Buhat han mga Apostoles.

Tikang ha Perga nagpadayon hira ngadto ha Antioquia han Pisidia, ngan ha Adlaw nga Iparahuway sinulod hira han sinagoga ngan liningkod. Kahuman na han katirok ha sinagoga, ginsunod hira Pablo ug Bernabe hin damo nga mga Judiyo ngan damo nga mga Hentil nga nakabig ha tuluohan han mga Judiyo. Naghimangraw ha ira an mga apostoles ngan gindasig hira nga magpadayon hin pag-ukoy hin kinabuhi dida ha grasya han Dyos.

Han pagkasunod nga Adlaw nga Iparahuway an haros ngatanan nga mga tawo han bungto kinmadto pamati han pulong han Ginoo. Han pakakita han mga Judiyo han damo nga mga tawo, napungot hira ngan tinipa hira han iginyakan ni Pablo ngan ginpakaalohan pa nira hiya. Kundi dinugang lugod an kaisog nira Pablo ug Bernabe hin pagyakan, “Kinahanglan nga kamo anay an pagwalihan han pulong han Dyos. Kundi tungod nga iyo man ini iginsasalikway ngan diri niyo gin-iisip nga takos kamo han kinabuhi nga dayon, matalikod kami ha iyo ngan makadto kami han mga Hentil. Kay amo ini an sugo nga iginhatag ha amon han Ginoo: ‘Iginbutang ko ikaw nga magin kapawa han mga Hentil, basi matalwas an bug-os nga kalibutan.’”

Nalipay an mga Hentil han pakabati nira hini, ngan gindayaw nira an mensahe han Ginoo, ngan adton mga ginpili para han dayon nga kinabuhi nahimo nga mga magtinuohon. Naglurab an pulong han Ginoo ha ngatanan nga dapit didto hito nga tuna. Kundi gintukso han mga Judiyo an mga dagko nga pagkatawo han syudad ngan an tinahod nga mga hinangad nga Hentil nga kababayen-an nga mainampoon han Dyos. Nagtikang hira hin pagpakurii kanda Pablo ug Bernabe, ngan ginpalayas hira han ira tuna. Ginpaspas han mga Apostoles an tapotapo han ira mga tiil nga tigaman han ira pagriwa, ngan nagpadayon hira ngadto ha Iconio. Duro an kalipay han mga magtinuohon ha Antioquia, ngan napuno hira han Espiritu Santo.

An Pulong han Ginoo.

SALMO RESPONSORiO          

Sal 100:1-2, 3, 5

(b) Iya kita kataw’han, an karnero han iya panon.

1. Pagrayhak ha Ginoo, bug-os nga tuna.

Hin malipayon an Ginoo singbaha;

ngan pumakada ha atubangan niya,

upod in malipayon nga mga kanta! (b)

2. Ayaw gud kalimot nga Dyos an Ginoo!

Amo hiya adton ha aton naghimo.

Hiya an tag-iya ha aton nga tawo,

katawhan kita niya, iya karnero. (b)

3. An Ginoo hin pagkamaupay gudman,

buhi an iya gugma ha kadayonan;

amo man an iya kamatinumanon,

ha kagihaponan gud nagpapadayon. (b)

PAGBASA II

Gnp 7:9, 14b-17

Pagbasa tikang han basahan han Ginpadayag.

Kahuman hini, tinman-aw ako ngan hinkit-an ko in dako nga hugpo hin mga tawo nga diri maiihap. Tikang hira ha magkalainlain nga kanasoran, tribo, pinulongan, ug katawhan. Natukdaw hira ha atubangan han trono ngan han Kordero, ngan nakakasul-ot hira hin busag nga higlawig nga bado, ngan nakakabitbit hira hin mga palwa.

Nagsiring hira ha akon, “Amo ini an mga tawo nga nakailob han makalilisang nga pag-antos. Ginlabhan nira an ira higlawig nga mga bado ngan ginlatakan hira han dugo han Kordero, sanglit nagmabusag.

Sanglit natukdaw hira ha atubangan han trono han Dyos ngan nag-aalagad ha iya adlaw gab-i didto han iya templo. Hiya nga nalingkod dida han trono amo an mananalipod ha ira pinaagi han iya pakig-usa ha ira. Diri na gud hira gugutomon o uuhawon; diri na hira mag-aantos han kapaso han adlaw o han bisan ano nga maping-it nga kapaso, kay an Kordero nga aada ha butnga han trono amo an ira Magmarangno ngan tutugwayan hira ngadto han mga burabod han tubig nga nahatag hin kinabuhi. Ngan papahiron han Dyos an tagsa nga luha ha ira mga mata.”

An Pulong han Ginoo.

EBANGHELYO

Jn 10:27-30

Pagbasa tikang han santos nga ebanghelyo sumala kan Juan.

Nagsering hi Jesus: “Namamati han akon tingog an akon mga karnero; nakilala ako ha ira, ngan nasunod hira ha akon; Nahatag ako ha ira han dayon nga kinabuhi, ngan diri nagud hira mamamatay; ngan waray makakaagaw ha ira tikang ha akon. Labaw han ngatanan an akon Amay nga amo an naghatag ha ira ha akon, ngan waray gud makakaagaw ha ira tikang han kamot han Amay. Mag-usa la an Amay ug ako.”

An Ebanghelyo han Ginoo.

PAG-AMPO HAN BUNGTO

Pag-ampo kita ngadto han aton makagarahum nga Amay nga nagpadara han iya Anak basi iya kita panimangnoon labaw han ngatanan nga mga tinuha. Ha kada tagsa nga  pangamuyo, masiring kita:

Maupay nga magmarangno, dunnga kami.

1) Tungod han mga tagdumara han Singbahan: an Santo Papa, kaobispohan, kapadian ug ngatanan nga nagmamangulo han Cristohanon nga katilingban: nga magpabilin hira nga matinunanon nga mga tinun-an ni Cristo ngan mahigugmaon nga mag marangno han iya panon. Mag-ampo kita.

2) Tungod han aton Nasud: nga ini nga panahon hin piniliay diri magdara hin kasamok ug kakurian ha iya, lugod mahimo nga higayon hin pagkaurosa ha kaupayan, ha pagburubligay ug ha pagserbisyo han kataw’han. Mag-ampo kita.

3) Tungod han aton kabugtoan nga nahibulag ha Pagtoo: nga an gugma ni Cristo nga nabanhaw ha mga minatay mag-aghat ha ira ha pagdangop ngan pagpabilin dida ha iya. Mag-ampo kita.

4) Tungod hadton gintatawag han Ginoo ngadto hin pagserbisyo han Singbahan ha pagkapadi ug pagka relihiyos0: nga dasigon hira ha pamati han tingog han Ginoo dida han ira pag-alagad ha iya ngan han ira pagmayuyo han kataw’han han Dyos. Mag-ampo kita.

5) Tungod ha aton nga naniningkamot hin pagsunod han pagtawag han Ginoo: nga diri kita maliga tungod han pagdapit hin lain pa nga mga tingog ngan magraot nga mga kaipa. Mag-ampo kita.

Langitnon nga Amay, dungga ini nga amon mga pangamuyo, ngan ipadayon gad an paghura ha amon han imo gugma ug bendisyon.  Pinaagi kan Jesucristo nga amon  Ginoo. Amen.