PAGBASA I 

Buh 11:1-18

Pagbasa tikang han mga  Buhat han mga Apostoles.

Nahibaroan han mga apostoles ngan han mga magtinuohon ha bug-os nga Judea nga an mga Hentil kinarawat liwat han pulong han Dyos. Han pagkadto ni Pedro ha Jerusalem, ginsusnan hiya han hugpo han mga Judiyo nga karuyag torion an mga Hentil, sugad han ira gintutuohan. Nagsiring hira, “Kay ano nga nakig-usa ka hadton diri tinori nga mga Hentil ngan nakigsaro ka pa ngani ha ira?” Sanglit iginsaysay ha ira hin tukib ni Pedro an nahinabo tikang gud ha tinikangan: “Nag-aampo ako didto ha syudad han Jope ngan nagkamay-ada ako hin usa nga panan-awon. Hinkit-an ko nga may nagtitipaubos nga sugad hin halapad nga taklap tikang ha langit nga gintutunton pinaagi han upat nga mga kanto, ngan hinunong ini sapit ha akon. Gin-usisa ko an sulod hini, ngan hinkit-an ko in mga hayop, mga mananap nga naglalakat ngan nagkakamang, ngan mga ihalas nga katamsihan. Niyan nakabati ako hin tingog nga nagsiring ha akon, ‘Pedro, tindog; pag-ihaw ngan kaon!’ Kundi nagsiring ako, ‘Diri gud ako, Ginoo! Kay waray pa gud nakasulod ha akon baba nga mahugaw o diri malinis nga pagkaon.’ Nagyakan liwat an tingog tikang ha langit, ‘Ayaw paghunahunaa nga mahugaw in bisan ano nga ginsiring na han Dyos nga malinis.’ Nahinabo ini makatulo ngan kahuman, iginbalik an akon hinkit-an ngadto ha langit. Hito manta nga takna inabot ha balay nga akon sinak-an in tulo ka tawo nga ginsugo tikang ha Cesarea. Ginsiring ako han Espiritu nga umupod ako ha ira hin waray pagruhaduha. Inupod liwat ha akon ngadto ha Cesarea ini nga unom nga mga magtinuohon nga taga-Jope, ngan sinulod kami ngatanan han balay ni Cornelio. Iginsumat niya ha amon nga nakakita hiya hin anghel nga natindog ha sulod han iya balay, nga nagsiring ha iya, ‘Pagsugo hin mga tawo ngadto ha Jope, ngan ipakuha didto in usa ka tawo nga Simon Pedro an ngaran. Magyayakan hiya ha iyo hin mga pulong nga makakatalwas ha imo ngan han bug-os mo nga panimalay.’ Ngan han pagtikang ko na hin pagyakan, kinmunsad ha ira an Espiritu Santo sugad gud han pagkunsad ha aton hadto han Espiritu Santo. Niyan nahinumdom ako han iginsiring han Ginoo, ‘Nagbunyag hin tubig hi Juan, kundi pagbubunyagan kamo han Espiritu Santo.’ Dayag kaupay nga naghatag an Dyos ngadto hito nga mga Hentil hin sugad nga hatag nga aton nakarawat ha iya dida han pagtoo naton kan Jesu-Cristo nga aton Ginoo. Sanglit hin-o ngani ako nga magpupugong han Dyos?” Han pakabati nira hini, inokoy an ira pagsuson ngan gindayaw nira an Dyos hin pagsiring, “Kon sugad, naghatag liwat an Dyos ngadto han mga Hentil hin higayon hin pagbasol basi hira mabuhi!”

An Pulong han Ginoo.

SALMO RESPONSORIO

Sal 42:2-3; 43:3, 4

(b) Inuuhaw an akon kalag han buhi nga Dyos.

Kon di’ man, ini:

(b) Alleluia!

1. Sugad hin bugsok nga inuuhaw hin mahagkot nga tubig,

inuuhaw man ako ha imo, O Dyos.

Inuuhaw ako ha imo, an buhi nga Dyos.

San-o ako kakadto ngan pagsisingba ha imo atubangan? (b)

2. Pasigaha an imo kapawa ngan an imo kamatuoran;

pagmandoan unta ako nira

ngan pabalikon ha Sion, nga imo baraan nga pungtod,

ngan ha imo Templo, nga imo gin-uokyan. (b)

3. Niyan mapakadto ako ha imo altar, O Dyos;

ikaw an burabod han akon kalipayan.

Patotokaron ko an akon arpa

ngan magkakanta ako ha imo,

O Dyos, nga akon Dyos. (b)

PAGBASA II          

Jn 10:1-10

Pagbasa tikang han santos nga ebanghelyo sumala kan Juan.

Nagsering hi Jesus: “Susumatan ta kamo hin tinuod: kawatan ngan tikasan an tawo nga diri naagi ha porta hin pagsulod han turil, kundi nagsasaka hin iba nga agian. Magmarangno han mga karnero an tawo nga naagi ha porta. Pinaaagi hiya han magbarantay han portahan; namamati an mga karnero han iya tingog kon gintatawag niya hira hin ira tagsatagsa nga ngaran, ngan pinagagawas niya hira han turil. Paghihigawas na nira, nag-uuna hiya ha ira, ngan nasunod an mga karnero ha iya kay nakilala han iya tingog. Diri hira masunod hin iba; lugod makalagiw hira, kay diri nira kinikilala an iya tingog.” Iginsumat ni Jesus ha ira ini nga pananglitan, kundi waray hira makasabot han karuyag sidngon han pananglitan. Sanglit nagsiring liwat hi Jesus, “Susumatan ta kamo hin tinuod: amo ako an porta para han mga karnero. Mga kawatan ngan mga tikasan an ngatanan nga kinmanhi una ha akon; kundi waray mamati ha ira an mga karnero. Amo ako an porta. Matatalwas an bisan hin-o nga masulod pinaaagi ha akon, masulod-guwa hiya ngan makakaagi hin panibsiban. Nasulod la an kawatan hin pangawat, pamatay, ngan pamungkag. Kinanhi ako basi makaangkon hira han kinabuhi, an hura nga kinabuhi.

An Ebanghelyo han Ginoo.