PAGBASA I 

Buh 13:13-25

Pagbasa tikang han mga  Buhat han mga Apostoles.

Tikang ha Papos nagsakay hira Pablo ngan han iya mga kaupod, ngan inabot hira ha Perga, nga usa nga syudad ha Panfilya, kundi binayaan hira ni Juan Marcos nga inoli ngadto ha Jerusalem. Tikang ha Perga nagpadayon hira ngadto ha Antioquia han Pisidia, ngan ha Adlaw nga Iparahuway sinulod hira han sinagoga ngan liningkod. Kahuman pagbasa tikang han Balaod ni Moises ngan han sinurat han mga manaragna, nagpatugon ha ira an mga opisyal han sinagoga nga nasiring, “Kabugtoan, kon may-ada kamo mga pulong nga makakapadasig han mga tawo, karuyag namon nga magyakan kamo ha ira.”

Tinindog hi Pablo ngan nagsenyas hiya ha ira nga maghilom, ngan namulong hiya: “Mga igkasi ko Israelita ngan ngatanan nga mga Hentil nga hahani nga nagsisingba han Dyos: pamatii ako! An Dyos han katawhan han Israel nagpili han aton mga kaapoy-apoyan ngan ginhimo hira nga dako nga nasod ha panahon han pag-ukoy nira nga mga lumalangyaw didto ha Ehipto. Ginpagawas hira han Dyos tikang ha Ehipto pinaagi han iya dako nga gahom, ngan sulod hin kap-atan (40) ka tuig gin-ilob niya hira didto ha kamingawan. Ginbungkag niya in pito nga mga nasod didto ha tuna han Canaan, ngan ginhatag ini ha ira ngan ginpatag-iya hira hini nga tuna. Nahinabo ini ngatanan sulod hin mga upat kagatos kalim-an (450) ka tuig. “Kahuman hini, gintagan niya hira hin mga maghurukom tubtob han panahon ni manaragna Samuel. Ngan han pag-aro na nira hin hadi, iginhatag ha ira han Dyos hi Saulo nga anak ni Cis, tikang han tribo ni Benjamin basi maghadi ha ira hin kap-atan (40) ka tuig. Kahuman pagpaiwasa ha iya, hi David an ginhimo han Dyos nga ira hadi. Amo ini an iginsiring han Dyos mahitungod ha iya, ‘Hinbaroan ko nga hi David nga anak ni Isai amo an tawo nga akon naruruyagan ngan magtutuman han ngatanan nga akon karuyag ipabuhat ha iya.’ Hi Jesus nga tulin ni David amo an ginhimo han Dyos nga Magtaralwas han katawhan han Israel sumala han iya iginsaad. Han waray pa magtikang hi Jesus han iya buruhaton, nagwali na hi Juan ha ngatanan nga mga tawo han Israel nga kinahanglan magbasol hira ngan magpabunyag. Han harapit na matapos hi Juan han iya buruhaton, nagsiring hiya ha mga tawo, ‘Para ha iyo, hin-o gud ako? Diri ako amo an iyo ginhihinulat. Kundi kitaa: makanhi hiya sunod ha akon, ngan diri ngani ako takos hin paghukas han mga sandalyas han iya tiil.’

An Pulong han Ginoo.

SALMO RESPONSORIO

Sal 89:2-3, 21-22, 25 & 27

(b) Dayuday mag-aawit ako han imo gugma, Ginoo.

Kon di’ man, ini:

(b) Alleluia!

1. O Ginoo, pirme ako magkakanta,

hadton imo dayuday nga paghigugma;

igsasangyaw hin dayon han akon baba

an imo pagkamatinumanon manta.

Maaram gad ako nga magpapadayon,

an im' gugma ha ngatanan nga panahon;

nga adton imo pagkamatinumanon,

sugad gud han langit kamapidayonon. (b)

2. Akon surugoon David ginpili ko,

ngan h'ya an ginhimo ko nga hadi niyo.

Akon kusog pirme mag-upod ha iya,

akon gahom magin kusog pa gud niya. (b)

3. “Ha iya ak' mahigugma ngan maunong,

akon hiya dayuday pagpapadag-on.

‘Ikaw akon amay,’ sidngon ako niya,

‘Akon Dyos, panalipod, magtaralwas pa.’ (b)

PAGBASA II          

Jn 13:16-20

Pagbasa tikang han santos nga ebanghelyo sumala kan Juan.

[Katapos ni Jesus pamusa han mga tiil han iya mga tinun-an nagsering hiya:] “Susumatan ta kamo hin tinuod: waray oripon nga labaw han iya agaron; waray sinugo nga labaw han nagsugo ha iya. Yana maaram na kamo hini nga kamatuoran; palaran kamo kon buhaton ini niyo! “Diri ako naghihimangraw mahitungod ha iyo ngatanan; nakilala ako han akon mga ginpili. Kundi kinahanglan matuman an kasuratan nga nasiring, ‘Kinmontra ha akon an tawo nga sinmaro ha akon.’ Ginsusumat ko ini ha iyo yana, nga diri pa ini nahinanabo, basi kon mahinabo na ini, tumoo kamo nga hi ‘Ako Amo Ako.’ Nagsusumat ako ha iyo hin tinuod: an bisan hin-o nga nakarawat han akon sinusugo, nakarawat man ha akon; ngan an nakarawat ha akon, nakarawat man han nagsugo ha akon.”

An Ebanghelyo han Ginoo.