PAGBASA I 

Buh 13:26-33

Pagbasa tikang han mga  Buhat han mga Apostoles.

[Han pagkadto ni Pablo ha Antioquia han Pisidia, sinulod hiya han sinagoga ngan namulong:] “Mga igkasi ko Israelita nga mga tulin ni Abraham, ngan kamo ngatanan nga mga Hentil nga nagsisingba han Dyos: amo kita an ginpadad-an hini nga mensahe han katalwasan! An mga tawo nga nag-uokoy ha Jerusalem ngan an ira mga pangulo waray kumilala nga hiya amo an Magtaralwas ngan waray hira pakasabot han mga pulong han mga manaragna nga ginbabasa ha kada Adlaw nga Iparahuway. Kundi natuman nira an mga pulong han mga manaragna pinaagi han pagsiroti nira kan Jesus. Ngan bisan kon waray nira hin-agian nga sadang pasikaran hin pagsirot ha iya ha kamatayon, pinangaro nira kan Pilato nga patayon hiya. Ngan kahuman nira pagtumana an ngatanan nga ginhimangraw han Kasuratan mahitungod ha iya, gintanggal hiya nira ha kros ngan iginlubong. Kundi ginbanhaw hiya han Dyos, ngan sulod hin damo nga mga adlaw nagpakita hiya hadton mga inmupod ha iya tikang ha Galilea ngadto ha Jerusalem. Mga saksi na hira niya yana ngadto ha katawhan han Israel. Ngan aanhi kami yana pagdara han Maupay nga Sumat ha iyo: an iginsaad han Dyos ha aton mga kaapoy-apoyan nga iya pagbubuhaton, gintuman na niya yana para ha aton nga ira mga tulin, pinaagi han pagbanhaw kan Jesus. Sumala han iginsurat ha ikaduha nga Salmo: ‘Ikaw an akon Anak; yana nga adlaw nagin Amay ako nimo.’

An Pulong han Ginoo.

SALMO RESPONSORIO

Sal 2:6-7, 8-9, 10-11ab

(b) Ikaw an akon Anak; yana nga adlaw ginhimugso ko ikaw.

Kon di’ man, ini:

(b) Alleluia!

1. Iya siring, “Ha Sion, bukid nga baraan,

an akon hadi akon igbubutang.”

Siring han hadi, “Akon ipapahibaro,

an pulong ha akon han Ginoo.

Nagsiring hiya, ‘Ikaw an anak ko,

Yana nga adlaw ako an amay nimo. (b)

2. Pangaro kay ikaw akon tatagan,

imo an ngatanan nga kanasoran,

ug an bug-os nga kalibutan.

Mahigpit nga gahom an imo paghadi ha ira,

Magsasarang hira sugad hin buong nga daba.’” (b)

3. Mga kahadian, pamatii ako,

hini nga akon pahimatngon ha iyo;

pag-aram kamo hini nga pagturon-an,

kamo nga mga punoan han kalibutan:

Pagataman upod hin kahadlok han Ginoo,

ha iya atubangan pangurog 12ngan yukbo. (b)

PAGBASA II          

Jn 14:1-6

Pagbasa tikang han santos nga ebanghelyo sumala kan Juan.

Nagsiring ha ira hi Jesus, “Ayaw kamo kabaraka ngan kagupong. Too kamo han Dyos ngan too man kamo ha akon. Damo in mga kwarto didto han balay han akon Amay, ngan makadto ako hin pag-andam hin dapit para ha iyo. Diri ako magsusumat hini ha iyo kon diri pa ini tinuod. Ngan katapos ko kadto ngan pag-andam hin dapit para ha iyo, mabalik ako ngan pauupdon ko kamo ha akon, basi kon hain ako aadto man liwat kamo. Maaram na kamo kon uunanhon niyo pagsangpot ngadto han akon kakadtoan.” Nagsiring ha iya hi Tomas, “Ginoo, diri kami maaram kon tikain ka; uunanhon man namon paghibaro han dalan nga tipakadto?” Nagbaton ha iya hi Jesus, “Amo ako an dalan, an kamatuoran, ngan an kinabuhi; waray makakadto han Amay kon diri pinaagi ha akon.”

An Ebanghelyo han Ginoo.