PAGBASA I 

Buh 14:21-27

Pagbasa tikang han mga  Buhat han mga Apostoles.

Iginwali nira Pablo ug Bernabe an Maupay nga Sumat didto ha Derbe, ngan damo an ira nakabig. Niyan binalik hira ngadto ha Listra ug Iconio ngan nagpadayon ngadto ha Antioquia ha Pisidia. Ginparig-on nira an mga magtinuohon ngan gindasig nira nga magpadayon hira han ira pagtoo. Nagtutdo hira, “Kinahanglan mag-agi kita hin damo nga mga kakurian hin pagsulod han Ginhadian han Dyos.” Ha kada singbahan nagtudlok hira hin mga katigurangan, ngan upod an mga pag-ampo ngan pagpuasa, igintubyan hira ngadto han Ginoo nga ira sinasarigan. Kahuman nira maglatas han katunaan han Pisidia, inabot hira ha Pamfilya. Iginwali nira an mensahe didto ha Perga, ngan katapos linugsong hira ngadto ha Atalia. Tikang didto nagsakay hira pagbalik ngadto ha Antioquia, diin didto igintubyan hira ngadto han mahigugmaon nga pagmangno han grasya han Dyos para han buruhaton nga yana ira na natuman. Han pag-abot nira ha Antioquia, gintirok nira an mga sakop han singbahan ngan iginsumat nira ha ira an ngatanan nga ginbuhat han Dyos pinaagi ha ira ngan kon ginpaunan-o niya basi kabuksan an dalan ngan tumoo an mga Hentil.

An Pulong han Ginoo.

SALMO RESPONSORiO          

Sal 145:8-9, 10-11, 12-13

(b) Pagdadayawon ko an imo ngaran ha kadayonan,

O Dyos nga akon hadi.

Kon di’ man, ini:

(b) Alleluia!

1. Ginoo mahigugmaon, maloloy-on,

mahinay masina, may gugma nga dayon.

Maupay ha tanan hiya nga Ginoo,

ha tanan binuhat napaid hin husto. (b)

2. Tanan nga im’ mga binuhat, Ginoo,

mananagdayaw gud ngatanan ha imo.

Ngan pagpapasalamatan ka na hadto,

han ngatanan gud nga imo mga tawo.

An kaharangdon han imo ginhadian

amo gud an ira paghihimangrawan.

Ira igsusumat ngadto han ngatanan

an imo kakusgan, imo kagamhanan. (b)

3. Hisabtan han tanan buhat mo nga gamhanan,

ngan an kaanyag gud han im’ ginhadian.

An im’ ginhadian magpapadayon man,

maghahadi ka hin waray kataposan.

Iya saad, Ginoo matinumanon,

ngan tangkod han iya mga buruhaton. (b)

PAGBASA II

Gnp 21:1-5a

Pagbasa tikang han basahan han Ginpadayag.

Ngan hinkit-an ko in bag-o nga langit ngan bag-o nga tuna. An syahan nga langit ngan an syahan nga tuna nawara, ngan naanaw an dagat. Hinkit-an ko an Baraan nga Syudad, an bag-o nga Jerusalem, nakunsad ha langit tikang sa Dyos, andam sugad hin karaslon nga babaye, binistihan ngan andam na gud hin pagtapo han iya bana. Hinbatian ko in dako nga tingog tikang han trono, “Yana, an Dyos mag-uokoy dinhe han mga tawo. Mag-uokoy hiya upod ha ira ngan mahihimo hira nga iya mga tawo. An Dyos ngahaw maaada ha ira ngan Dyos hira nira. Papahiron niya an ngatanan nga mga luha ha ira mga mata. Waray na kamatayon, waray na kasubo, pagtangis, o kabidoan. Naanaw na an daan nga mga butang.” Niyan nagsiring an nalingkod ha trono, “Ngan yana babag-ohon ko an ngatanan!”

An Pulong han Ginoo.

EBANGHELYO

Jn 13:31-33a, 34-35

Pagbasa tikang han santos nga ebanghelyo sumala kan Juan.

Han paggawas na ni Judas, nagsiring hi Jesus, “Iginpapakita na yana an himaya han Anak han Tawo, ngan pinaagi ha iya, ginpapakita liwat an himaya han Dyos. Kon iginpapakita an himaya han Dyos pinaagi ha iya, magpapakita man an Dyos han himaya han Anak han Tawo ha iya ngahaw, ngan bubuhaton ito niya dayon. Mga anak ko, gutiay na la nga panahon an akon pakig-urosa ha iyo. Ihinahatag ko ha iyo in bag-o nga sugo: magsihigugmaay kamo. Kinahanglan magsihigugmaay kamo sugad han akon paghigugma ha iyo. Kon magsihigugmaay kamo, mahibabaro an ngatanan nga akon kamo mga tinun-an.”

An Ebanghelyo han Ginoo.

PAG-AMPO HAN BUNGTO

Tungod kay ginpakita man han Ginoo ha aton nga an gilalabawi nga paghigugma amo an paghalad han kabug-usan han aton pagkatawo ug kinabuhi para han kaupayan han iba, pangaro kita sa Dyos hin sugad hini nga paghigugma para ha aton ngan para han bug-os nga kataw’han. Sarabat kita pagsiring:

Kalooye kami, mahigugmaon nga Dyos.

1) Basi an santos ug catolico nga Singbahan magpadayon pagsangyaw ug pagsaksi ha ngatanan nga higayon han dako kaupay nga paghigugma han Dyos dida kan Cristo. Mag-ampo kita ha Ginoo.

2) Basi an mga tinubyanan han aton gobyerno kumarawat hin lamrag ug kusog dida han ira pakig-asdang han karat’an ngan sugad man dida han ira panimangno han ira mga ginsasakopan. Mag-ampo kita ha Ginoo.

3) Basi an mga tawo nga nag-uukoy ha kasisidman han sala umabat han amaynon nga kalooy han Dyos ngan han mahigugmaon nga pagpaura ni Cristo, labi na gud pinaagi han Singbahan. Mag-ampo kita ha Ginoo.

4) Basi an mga nagkamatay nga mag tinuohon makakab-ot na han kahingpitan han kalooy han Dyos ngan han kalipayan han tawo nga ginsaad hadton mga anak sa Dyos. Mag-ampo kita ha Ginoo.

5) Basi kita nga nagkakatitirok dinhi yana makakilala han mahigugmaon nga Cristo dida han aton pagkauroso ha pagsingba ngan ha pagsasaro han uusa nga Lawas ug kalis han Dugo niya. Mag-ampo kita ha Ginoo.

Dyos, amon Amay, ginpakita nimo ha amon an imo waray sukol nga paghigugma han kataw’han dida han imo Bugtong nga Anak. Itugot nga mahimo kami nga mga tigaman hini nga misterio pinaagi han pagtuman han sugo niya ha amon. Nga buhi ug hadi ha dayon nga katuigan. Amen.