PAGBASA I 

Buh 15:1-6

Pagbasa tikang han mga  Buhat han mga Apostoles.

Nagkaabot ha Antioquia in mga tawo nga tikang ha Judea nga nagtutdo han mga magtinuohon: “Diri kamo matatalwas kon diri kamo magtuman han seremonyas han pagtori sumala han ginkikinahanglan han Balaod ni Moises.” Ginsupak ini nga pagturon-an nira Pablo ug Bernabe, sanglit nagkamay-ada hira mapaso nga lantugi mahitungod hini. Sanglit ginkauruyonan nga makadto ha Jerusalem hira Pablo ug Bernabe ngan iba pa nga kabugtoan ha Antioquia, ngan makigkita hira han mga apostoles ngan mga katigurangan mahitungod hini nga butang nga ginkakalantugian. Ginpagikan hira han singbahan, ngan han pag-agi nira ha Fenicia ngan ha Samaria, iginsumat nira an kakabig han mga Hentil ngadto sa Dyos. Nakalipay ini nga sumat han ngatanan nga mga magtinuohon. Han pag-abot nira ha Jerusalem, ginkarawat hira han singbahan, han mga apostoles, ngan han mga katigurangan, nga ira ginsumatan mahitungod han ngatanan nga ginbuhat han Dyos pinaagi ha ira. Kundi tinindog in pira han mga magtinuohon nga kaapi han hugpo han mga Parisiyo, ngan nagsiring, “Kinahanglan pagtorion an mga magtinuohon nga mga Hentil ngan sidngon hira nga magtuman han Balaod ni Moises.” Nagkatirok an mga apostoles ngan an mga katigurangan hin pagtuhay hini nga kasamok.

An Pulong han Ginoo.

SALMO RESPONSORIO

Sal 122:1-2, 3-4ab, 4cd-5

(b) Nalipay ako han akon pakabati, “Pakadto kita han balay han Dyos.”

Kon di’ man, ini:

(b) Alleluia!

1. Nalipay ako han sidngon ako nira,

“Ngat' han balay han Ginoo kadto kita.”

Jerusalem, aanhi na kami yana,

naninindog sakob han im' mga porta! (b)

2. Jerusalem, syudad nga nahibalik na,

ngadto hin matahom nga pagkaurosa!

Amo ini an kinakadtoan nira,

nga mga tribo han Israel nga tana. (b)

3. Kadto hin pagpasalamat han Ginoo,

sumala han iya ha ira ginsugo.

Kahadian han Israel napakadto,

hin paghukom hadton ira mga tawo. (b)

PAGBASA II          

Jn 15:1-8

Pagbasa tikang han santos nga ebanghelyo sumala kan Juan.

Nagsiring hi Jesus ha iya mga tinun-an: “Amo ako an tinuod nga balagon, ngan an akon Amay an magmarangno. Binabanggi niya an ngatanan nga sanga nga diri nabunga. Tinatag-an niya hin paghawan an kada sanga nga nabunga, basi mamunga hin darodamo. Nalinisan na kamo pinaagi han mensahe nga akon iginhimangraw ha iyo. Pabilin kamo didi ha akon, ngan magpapabilin man ako dida ha iyo. Diri makakabunga in sanga ha iya la kalugaringon; mahihimo la ini kon sumpay han puno an sanga. Ha sugad nga kaagi, diri kamo makakabunga, labot kon magpabilin kamo didi ha akon. Ako an balagon ngan kamo an mga sanga. Mabunga hin damo an bisan hin-o nga magpabilin didi ha akon, ngan ako dida ha iya, kay waray niyo mahihimo kon bulag kamo ha akon. Ilinalabog ha gawas an bisan hin-o nga diri nagpapabilin ha akon, ngan nauuga sugad hin sanga; gintitirok in sugad nga mga sanga, ngan ilinalabog ha kalayo, ngan sunogon. Kon magpabilin kamo didi ha akon, ngan magpabilin an akon mga pulong dida ha iyo, mangangaro kamo hin bisan ano nga inuungara niyo, ngan katutumanan kamo. Ginhihimaya an akon Amay tungod han iyo pamunga hin damo; ngan pinaagi hini, nagigin mga tinun-an ko kamo.”

An Ebanghelyo han Ginoo.