PAGBASA I 

Buh 15:7-21

Pagbasa tikang han mga  Buhat han mga Apostoles.

Kahuman hin maiha nga larulantugi, tinmindog hi Pedro ngan nagsiring, “Kabugtoan ko, maaram man kamo nga han nag-agi nga panahon ginpili ako han Dyos tikang ha iyo, hin pagwali han Maupay nga Sumat ngadto han mga Hentil, basi hira makabati ngan tumoo. Ngan nagpadayag an Dyos nga sayod han kasingkasing han mga tawo, han iya pagkarawat han mga Hentil pinaagi hin paghatag ha ira han Espiritu Santo sugad han paghatag niya ha aton. Waray ginpalabi han Dyos ha aton ngan ha ira; ginpasaylo niya an ira mga sala kay tinoo man hira. Sanglit kay ano nga yana karuyag man niyo nga pagsarihan an Dyos pinaagi hin pagbutang hin makuri nga paras-anon ha mga magtinuohon, nga diri ngani mahihimo hin kapas-an naton ngan han aton mga kaapoy-apoyan? Diri ito amo! Natoo kami nga hira, sugad ha aton, natatalwas pinaagi han grasya han Ginoo nga Jesus.” Nagmingaw an bug-os nga hugpo han pakabati nira han sumat nira Bernabe ug Pablo hiunong han ngatanan nga mga orosahon ngan mga milagro nga ginbuhat han Dyos ngadto han mga Hentil pinaagi ha ira.

Katapos nira pagyakan, nagsiring liwat hi Santiago: “Kabugtoan, pamatii ako niyo. Kahuman pa la igsaysay hi Simon hiunong han syahan nga pagpakita han Dyos han iya paghigugma han mga Hentil, pinaagi hin pagkuha tikang ha ira hin kalugaringon niya nga mga tawo. Nahauyon ini han mga pulong han mga manaragna sumala han siring han Kasuratan: ‘Kahuman hini mabalik ako, nasiring an Ginoo, ngan titindogon ko an napukan nga balay ni David. Ibabalik ko an mga nagkaruruba, ngan padidig-onon ko na liwat ini. Sanglit magbibiling han Ginoo an iba nga katawhan, ngan an ngatanan nga mga Hentil nga gintawag ko nga akon kalugaringon. Amo ini an siring han Ginoo nga nagpadayag hini hadto pa nga panahon.’

“Ha akon nga bahin,” nagpadayon hi Santiago, “diri naton pagsamokon an mga Hentil nga nadangop han Dyos. Lugod, kinahanglan magsurat kita hin pagsumat ha ira nga diri na hira kumaon hin pagkaon nga nahugawan tungod nga iginhalad ngadto han mga kadiyosan; nga likayan nira an pakighilawas; ngan diri hira kumaon hin bisan ano nga gintilo nga hayop ngan hin dugo. Kay tikang pa han una nga mga panahon pirme ginbabasa an Balaod ni Moises ha mga sinagoga ha kada Adlaw nga Iparahuway, ngan iginwawali an iya mga pulong ha kada bungto.”

An Pulong han Ginoo.

SALMO RESPONSORIO

Sal 96:1-2a, 2b-3, 10

(b) Igsumat an mga makaramdok nga buhat han Ginoo ha mga kataw’han.

Kon di’ man, ini:

(b) Alleluia!

1. Kanta ha Ginoo hin bag-o nga kanta!

Kanta ha Ginoo, an bug-os nga tuna!

Kanta ha Ginoo, pagdayawa hiya! (b)

2. Kada adlaw sumat katalwasan niya.

Ha kanasoran iyo igpakilala

iya pagkaharangdon, iya himaya,

ngan an mga gamhanan nga buhat niya

ha ngatanan nga katawhan han tuna. (b)

3. Sidnga’n kanasoran, “Ginoo hadi na!

An kalibutan ginpahimutang niya.

Diri mabantad kay iya ginparig-on,

katawhan paghuhukman gud hin matadong.” (b)

PAGBASA II          

Jn 15:9-11

Pagbasa tikang han santos nga ebanghelyo sumala kan Juan.

Nagsiring hi Jesus ha iya mga tinun-an: “Hinihigugma ko kamo sugad gud han paghigugma ha akon han Amay; pagpabilin kamo didi han akon gugma. Kon tumanon niyo an akon mga sugo, magpapabilin kamo ha akon gugma, sugad gud han pagtuman ko han mga sugo han akon Amay ngan nagpapabilin ako dida han iya gugma.”

“Iginsumat ko ini ha iyo basi mahingada ha iyo an akon kalipay, ngan basi mahingpit an iyo kalipay.”

An Ebanghelyo han Ginoo.