PAGBASA I 

Buh 15:1-2, 22-29

Pagbasa tikang han mga  Buhat han mga Apostoles.

Nagkaabot ha Antioquia in mga tawo nga tikang ha Judea nga nagtutdo han mga magtinuohon: “Diri kamo matatalwas kon diri kamo magtuman han seremonyas han pagtori sumala han ginkikinahanglan han Balaod ni Moises.” Ginsupak ini nga pagturon-an nira Pablo ug Bernabe, sanglit nagkamay-ada hira mapaso nga lantugi mahitungod hini. Sanglit ginkauruyonan nga makadto ha Jerusalem hira Pablo ug Bernabe ngan iba pa nga kabugtoan ha Antioquia, ngan makigkita hira han mga apostoles ngan mga katigurangan mahitungod hini nga butang nga ginkakalantugian.

Niyan nagkasarabot an mga apostoles ngan an mga katigurangan ug an bug-os nga singbahan, hin pagpili hin pira nga mga tawo tikang han ira hugpo, ngan ginsugo hira ngadto ha Antioquia, upod kanda Pablo ug Bernabe. Ginpili nira hi Judas nga gintatawag nga Barsabas, ngan hi Silas, nga duha ka tawo nga tinahod kaupay han mga magtinuohon. Iginpadara ha ira ini nga surat: “Nangongomosta kami, an mga apostoles ngan mga katigurangan nga iyo kabugtoan, ha ngatanan nga kabugtoan nga Hentil nga nag-uokoy ha Antioquia, ha Siria, ngan ha Cilicia. Nakabati kami nga may-ada mga tawo tikang han amon hugpo, nga kinmada ngan nakasamok ha iyo pinaagi han ira mga ginpamulong, bisan kon waray namon hira pagsugoa hin pagbuhat hini. Sanglit nagkatirok kami ngan nagkaurosa hin pagpili hin mga tawo nga susugoon namon ngada ha iyo. Maupod hira han aton hinigugma nga kasangkayan, hira Bernabe ug Pablo, nga nagtubyan han ira kinabuhi tungod hin pagsirbe han aton Ginoo Jesu-Cristo. Nagsusugo kami ngada ha iyo kanda Judas ug Silas nga amo an magsusumat ha iyo han mga butang nga iginsurat namon ha iyo. Minaupay ini namon ngan han Espiritu Santo nga diri na kamo butangan hin lain pa nga paras-anon labot hini nga kinahanglanon nga mga turumanon: Diri kamo kumaon hin bisan ano nga pagkaon nga iginhalad ha mga diyosdiyos; diri kamo kumaon hin dugo; diri kamo kumaon hin bisan ano nga gintilo nga hayop; diri kamo makighilawas. Maghihingaupay kamo kon likayan niyo an pagbuhat hini nga mga butang. Adyos.”

An Pulong han Ginoo.

SALMO RESPONSORiO          

Sal 67:2-3, 5, 6, 8

(b) Magdayaw unta, O Dyos, an mga tawo, tanan nga kataw’han magdayaw ha imo.

Kon di’ man, ini:

(b) Alleluia!

1. O Dyos, pagmaloloy-on manggad ha amon,

imo unta kami pagpakaupayon.

Tan-awa kami ha im' kamaloloy-on,

nga sabton han 'tanan imo kaburut-on.

Tanan mga nasod unta mahibaro,

han katalwasan nga natikang ha imo. (b)

2. Maglipay na unta adton kanasoran,

ngan magkaranta na nga may kalipayan.

Kay matadong an paghukom mo han tanan,

ngatanan nga nasod im’ ginmamandoan. (b)

3. Magdayaw unta, O Dyos, an mga tawo,

tanan nga katawhan magdayaw ha imo.

An Dyos amo an ha aton nagbendisyon.

Katawhan ha tanan dapit mag-uruyon

pagyukbo ha iya hin matinahoron. (b)

PAGBASA II

Gnp 21:10-14, 22-23

Pagbasa tikang han basahan han Ginpadayag.

Ginbut-an ako han Espiritu, ngan gindara ako han anghel ngadto ha pungkay hin hitaas hin duro nga bukid. Iginpakita niya ha akon an Jerusalem, an Baraan nga Syudad nga nakunsad ha langit tikang sa Dyos, nga nasilaw han himaya han Dyos. Naranggat an syudad sugad hin mahal nga bato nga haspe, matin-aw sugad hin kristal. May-ada ito hitaas ngan madakmol nga pader, nga may-ada dose nga mga ganghaan, ngan an tagsa nga ganghaan may-ada tinaporan nga anghel. Dida han mga ganghaan nahisurat an mga ngaran han dose nga mga tribo han Israel. Ha kada bayhon may-ada tulo nga ganghaan: tulo ha sinirangan tulo ha salatan, tulo ha amihan, ngan tulo ha katundan. An pader han syudad natindog ha bawbaw hin dose nga mga patukoranan nga bato, diin nahisurat an dose nga ngaran han mga apostoles han Kordero.

Waray ako hinkit-an nga templo ha sakob han syudad kay an Templo amo an Ginoo nga Dyos nga Labi Kamakagarahum ngan an Kordero. An syudad waray pagkinahanglan han adlaw o han bulan nga makapawa ha iya, tungod kay an himaya han Dyos amo an nahatag hin kapawa ngan an Kordero amo an suga.

An Pulong han Ginoo.

EBANGHELYO

Jn 14:23-29

Pagbasa tikang han santos nga ebanghelyo sumala kan Juan.

Nagbaton hi Jesus ha iya, “Magtutuman han akon mensahe an bisan hin-o nga nahigugma ha akon. Hihigugmaon hiya han akon Amay, ngan makada kami ha iya, ngan mag-uokoy kami dida ha iya. Diri nagtutuman han akon mga pulong an bisan hin-o nga diri nahigugma ha akon. Diri akon an mensahe nga hinbatian niyo, kundi natikang han Amay nga nagsugo ha akon.

“Iginsumat ko ini ha iyo samtang upod pa ako niyo. Kundi an Parabulig, an Espiritu Santo, nga susugoon han Amay ha akon ngaran, amo an magtututdo ha iyo han ngatanan nga mga butang, ngan magpapahinumdom ha iyo han ngatanan nga akon iginsumat ha iyo. Ibibilin ko ha iyo an kalinaw; ihahatag ko ha iyo an akon kalinaw. Ihahatag ko ini ha iyo diri sugad han paghatag han kalibutan. Ayaw kamo kabaraka ngan kalisang; ayaw kamo kahadlok. Hinbatian ako niyo nga nasiring ha iyo, ‘Mabaya ako, kundi mabalik ako ha iyo.’ Kon nahigugma kamo ha akon, maglilipay unta kamo nga makadto ako han Amay, kay larolabaw hiya ha akon. Iginsusumat ko ini ha iyo yana, nga diri pa ini nahinanabo, basi kon mahinabo na ini, tumoo kamo.”

An Ebanghelyo han Ginoo.

PAG-AMPO HAN BUNGTO

Natikang han Dyos an katalwasan ug ngatanan nga kaupayan; sanglit pangaro kita nga malaumon tikang han iya kamahinatagon, ha sarabat nga pagsiring:

Bendisyone kami, Ginoo.

1) Basi an Santo Papa ug an iya mga kaupod ha pagdumara han Singbahan kanunay dasigon han Espiritu dida han ira pagpasamwak han kamatuoran ngan han pag-atubang hin mga kakurian. Mag-ampo kita ha Ginoo.

2) Basi an mga tinubyanan han aton nasud ug han lokal nga pamunoan dayuday magmaduruto ha ira katungdanan ngan magmaaghop ha ira panimangno han molopyo. Mag-ampo kita ha Gino0.

3) Basi an magtinuohon nga naabat hin mga kabaraka, kalisang ug kahadlok mahiagom han kalinaw nga saad ni Cristo ngan maaghat han mga pahinumdumn han iya Espiritu. Mag-ampo kita ha Ginoo.

4) Basi an aton katilingban dayuday rig-onon han mga tutdo ni Cristo ngan padayon nga magmabinungahon ha kaupayan, katadungan ug kamurayaw. Mag-ampo kita ha Gino0.

5) Basi kita nga aanhi yana magtalinguha hin pagpabilin dida han gugma ni Cristo, ngan kanunay magmatinumanon han iya mga sugo. Mag-ampo kita ha Ginoo.

Mahigugmaon nga Amay, tungod han imo dako nga paghigugma ha amon, imo kami ginhihingpit dida kan Cristo. Ikalipay unta nimo an amon pagdangup ha imo agud kumarawat kami han amon ginkikinahanglan. Pinaagi kan Jesucristo, amon Ginoo. Amen.