PAGBASA I 

Buh 16:22-34

Pagbasa tikang han mga  Buhat han mga Apostoles.

Binulig an mga tawo hin paghampak ha ira; ginggisi ngan ginlubas han mga punoan an mga panapton nira Pablo ug Silas, ngan iginpalatob hira. Kahuman hin duro nga paghampak, iginsulod hira ha prisohan ngan ginsugo an gwardya han prisohan nga pagbantayan gud hira hin maupay. Han pakakarawat hini nga sugo, iginsulod hira han gwardya ha bartolina ngan ginpandogan an ira mga tiil.

Han harapit na magkatutnga an kagab-ihon, hira Pablo ug Silas nag-iinampo ngan nagkikinanta hin mga pagdayaw han Dyos, ngan nagpipinamati ha ira an iba nga mga priso. Tigda la nga lininog hin duro kakusog, nga nakabay-og han bug-os nga prisohan. Hito manta nga takna naabre an mga porta ngan natangtang an mga kadena han ngatanan nga mga priso. Nagmata an gwardya, ngan han pagkita niya nga naabre na an mga porta han prisohan, hinulbot niya an iya espada ngan nag-uunay na unta hiya, kay nakahunahuna hiya nga nagpakakalagiw na an ngatanan nga mga priso. Kundi ginoliat hi Pablo, “Ayaw pag-unay! Aadi kami ngatanan!” Nag-aro hin suga an gwardya han prisohan, nagdagmit pagsulod, ngan hinapa nga nangungurog ha tiilan nira Pablo ug Silas. Ngan igingawas hira ngan nagpakiana hiya ha ira, “Mga mano, ano an kinahanglan ko pagbuhaton basi matalwas ako?” Binaton hira, “Too han Ginoo nga Jesus, ngan matatalwas ka—ikaw, pati an imo panimalay.” Niyan iginwali nira an pulong han Ginoo ha iya ngan han ngatanan nga sakop han iya balay. Hito manta nga takna han gab-i gindara hira han gwardya ngan ginhugasan an ira mga samad; ngan ginbunyagan dayon hiya ngan an bug-os niya nga panimalay. Kahuman ginpauswag niya hira Pablo ug Silas ngadto han iya balay ngan gindurotan hira hin pagkaon. Malipayon na hiya ngan an iya panimalay kay tinoo na man hira han Dyos.

An Pulong han Ginoo.

SALMO RESPONSORIO

Sal 138:1-2ab, 2cde-3, 7c-8

(b) Unata an imo kamot, Ginoo, ngan talwasa ako.

Kon di’ man, ini:

(b) Alleluia!

1. Nagpapasalamat ak’ ha im’, Ginoo,

tikang gud han bug-os nga kasingkasing ko.

Nagkakanta ako pagdayaw ha imo,

atubangan han kadiyosan nga palso.

Gin-atubang ko baraan mo nga Templo,

nayukbo nga nadayaw han ngaran nimo. (b)

2. Tungod han imo gugma nga kadayonan,

ngan han imo pagkamatinumanon man.

Imo ginpakita nga labaw han tanan,

an im’ mga sugo ngan an imo ngaran.

Han akon pagtawag imo ginbaton man,

Im’ ak’ ginpakusog han imo kakusgan. (b)

3. Gintatalwas ako han im’ kagamhanan.

Tanan mo nga saad im’ pagtutumanon,

O Ginoo, an im’ gugma an padayon.

Hingpita gad adton imo gintikangan,

gintikangan nga buhat, di' mo talikdan. (b)

PAGBASA II          

Jn 16:5-11

Pagbasa tikang han santos nga ebanghelyo sumala kan Juan.

Nagsiring hi Jesus ha iya mga tinun-an: “Kundi yana, makadto na ako han nagsugo ha akon; kundi waray ha iyo napakiana ha akon, ‘Tikain ka?’ Ngan yana nga ginsumatan ko na kamo, nagmamabidoon kamo. Kundi susumatan ko kamo hin tinuod: mauruupay para ha iyo nga malakat ako, kay kon diri ako lumakat, diri makanhi ha iyo an Parabulig. Kundi kon lumakat ako, ipadadara ko hiya nganhi ha iyo. Ngan kon umabot na hiya, magpapamatuod hiya ha mga tawo han kalibutan nga mga sayop hira mahitungod han sala, mahitungod han pagkamatadong, ngan mahitungod han paghukom han Dyos. Sayop hira mahitungod han sala, kay diri hira natoo ha akon; mahitungod han pagkamatadong, kay makadto ako han Amay ngan diri na kamo makita ha akon; mahitungod han paghukom, kay ginhukman na an punoan hini nga kalibutan.”

An Ebanghelyo han Ginoo.