PAGBASA I 

Buh 17:15, 22—18:1

Pagbasa tikang han mga  Buhat han mga Apostoles.

An mga tawo nga nagdul-ong kan Pablo inupod ha iya tubtob ha Atenas. Binalik hira ha Berea dara an tugon ni Pablo kanda Silas ug Timoteo nga lumanat dayon hira ha iya.

Sanglit tinindog hi Pablo ha atubangan han hukmanan han Areopago ngan nagsiring, “Mga taga-Atenas, nakikita nga makidyos kamo. Kay han naglalakat ako ha iyo syudad ngan nagkikita han mga lugar nga ginsisingbahan niyo, nakaagi liwat ako hin altar nga ginsuratan, ‘Ngadto han Dyos nga Diri Kinikilala.’ An ginsisingba niyo bisan kon diri niyo kinikilala amo an akon iginwawali ha iyo. An Dyos nga naghimo han kalibutan ngan han ngatanan dinhe ha kalibutan, amo an Ginoo han langit ngan han tuna, ngan diri nag-uokoy hiya dida hin mga templo nga hinimo hin tawo. Diri hiya nagkikinahanglan hin bisan ano nga buhat hin tawo, kay hiya man an nahatag ha ngatanan nga mga tawo hin kinabuhi, ginhawa, ngan ngatanan nga mga butang. Tikang ha usa nga tawo ginhimo niya an ngatanan nga kanasoran han katawhan, ngan ginpaukoy hira dinhe ha bug-os nga tuna. Igintalaan niya ngadaan an igo nga mga panahon ngan an mga pag-ultan ha ira mga puroy-anan. Ginbuhat niya ini basi magbiling hira han Dyos, ha paglaom nga hiaagian hiya dida han mga butang nga ginhimo para ha ira. Diri hirayo an Dyos ha tagsa-tagsa ha aton; sumala han iginsiring: ‘Dida ha iya kita nabubuhi, nagkikiwa, ngan aanhi ha kalibutan.’ Sugad ito han iginsiring hin pira han iyo mga parasiday: ‘Mga anak man liwat kita niya.’ Tungod nga mga anak man kita han Dyos, diri kita maghunahuna nga an kinaiya han Dyos sugad hin bulawan o salapi o bato nga ginporma nga ladawan pinaagi han kabatiran han tawo. Hadto han diri pa nakilala ha iya an mga tawo, ginpabay-an la han Dyos an mga butang, kundi yana iginsugo na niya nga magbasol hira han ira mga sala. Kay nagtalaan hiya hin adlaw nga paghuhukman niya hin matadong an kalibutan pinaagi han tawo nga iya ginpili. Ginpamatud-an niya ini ha ngatanan pinaagi han pagbanhawa niya hini nga tawo.”

Han pakabati nira kan Pablo nga nagyakan mahitungod han pagkabanhaw, nagbiaybiay ha iya in pira ha ira, kundi nagsiring an iba, “Karuyag namon mamati liwat ha imo mahitungod hini nga butang.” Ngan binaya hi Pablo han katirok. May-ada mga tawo nga inupod ha iya ngan tinoo; usa ha ira amo hi Dionisio nga sakop han hukmanan, ngan usa nga babaye nga ginngangaranan kan Damaris, ngan hin iba pa.

An Pulong han Ginoo.

SALMO RESPONSORIO

Sal 148:1-2, 11-12, 13, 14

(b) Puno an langit ug an tuna han imo himaya.

Kon di’ man, ini:

(b) Alleluia!

1. Pagdayawa, pagdayawa an Ginoo!

Tikang ha langit dayawa an Ginoo;

kamo ngatanan nga nag-uokoy didto,

didto han kahitas-an ngatanan kamo.

Pagdayawa gud hiya niyo ngatanan,

kamo nga iya mga kaangelisan.

Ngan dayawa man hiya niyo ngatanan,

nga iya langitnon nga kasondalohan. (b)

2. Dawaya h'ya, tanan hadi ngan katawhan,

tanan nga prinsipe ngan mga punoan.

An kadaragan-an ngan kaolitawhan,

mga tigurang ngan mga kabataan. (b)

3. Papagdayawa niyo hira ngatanan,

padayawa han kanan Ginoo ngaran.

Iya ngaran labaw gudman han ngatanan,

gahom n'ya igbaw han tuna, kalangitan. (b)

4. Adton iya nasod iya ginparig-on,

bas' han iya katawhan h'ya pagdayawon.

Katawhan Israel iya higugmaon.

Pagdayawon an Ginoo, pagdayawon. (b)

PAGBASA II          

Jn 16:12-15

Pagbasa tikang han santos nga ebanghelyo sumala kan Juan.

Nagsiring hi Jesus ha iya mga tinun-an: “Damo pa gad an akon igsurumat ha iyo, kundi diri pa ini niyo maaakos yana. Kundi kon umabot na an Espiritu han kamatuoran, igtututdo kamo niya ngadto han ngatanan nga kamatuoran. Diri hiya maghihimangraw ha iya la kalugaringon, kundi maghihimangraw hiya han hinbabatian, ngan magsusumat han mga butang nga tiarabot. Paghihimayaon ako niya, kay natikang ha akon an igsusumat niya ha iyo. Akon an ngatanan nga kanan Amay; sanglit nagsiring ako nga natikang ha akon an igsusumat ha iyo han Espiritu.”

An Ebanghelyo han Ginoo.