PAGBASA I 

Buh 18:1-8

Pagbasa tikang han mga  Buhat han mga Apostoles.

Katapos hini, ginikan hi Pablo tikang ha Atenas ngan nagpadayon ngadto ha Corinto. Iginkakita hiya didto hin usa nga Judiyo nga Aquila an ngaran, nga taga-Ponto. Bag-o pa la hiya nga inabot tikang ha Italia upod an iya asawa nga hi Priscila, kay hadto nga panahon ginpaiwas ha Roma ni Emperador Claudio an ngatanan nga mga Judiyo didto. Nakigkita hi Pablo ha ira, ngan tungod nga pareho man an ira pakabuhi linungon hiya ha ira ngan nakig-usa ha ira hin trabaho, kay pareho man hira parahimo hin tulda. Ha kada Adlaw nga Iparahuway nakiglantugi hiya didto ha sinagoga basi makabig niya in mga Judiyo ngan mga Griego.

Han pag-abot nira Silas ug Timoteo tikang ha Macedonia, gingamit ni Pablo an iya bug-os nga panahon hin pagwali han mensahe hin pagpamatuod ha mga Judiyo nga hi Jesus amo an Cristo. Han pagriwa ngan pagbiaybiay nira ha iya, iginyabyab ni Pablo an tapotapo han iya panapton ngan ginsiring hira, “Kon mahimulag kamo han Dyos, iyo na ito baratonon! Diri na ako niyo pagbabasolon. Tikang yana mapakadto ako han mga Hentil.” Sanglit binayaan niya hira ngan napakadto hin pag-ukoy ha balay hin usa nga Hentil nga ginngangaranan kan Tito Justo nga masingbahon han Dyos. Sapit la han sinagoga an iya balay. Tinoo han Ginoo hi Crispo nga pangulo han sinagoga, pati an bug-os niya nga panimalay. Damo pa nga mga tawo ha Corinto in nakabati han mensahe. Tinoo ini hira ngan nabunyagan.

An Pulong han Ginoo.

SALMO RESPONSORIO

Sal 98:1, 2-3ab, 3cd-4

(b) Nagpahayag an Ginoo ha mga kanasuran han iya matalwason nga gahum.

Kon di’ man, ini:

(b) Alleluia!

1. Bag-o nga kanta ha Ginoo kantahon,

kay ginbuhat niya mga urosahon!

Han iya baraan nga kusog ug gahom

an pagdarag-an iya na gud naangkon. (b)

2. An Ginoo amo'n nagpahibaro na

han iya pagdarag-an, iya victorya;

ha mga nasod ginpahibaro niya

adton iya gahom nga nagtatalwas pa.

Saad ha Israel gintuman gud niya

upod dayuday pag-unong, paghigugma. (b)

3. Pagdarag-an han aton Dyos an nakita

han mga katawhan ha tanan nga tuna.

Magrugyaw ha Ginoo, tanan nga tuna,

pagrayhak hin kanta, pagdayawa hiya. (b)

PAGBASA II          

Jn 16:16-20

Pagbasa tikang han santos nga ebanghelyo sumala kan Juan.

Nagsiring hi Jesus ha iya mga tinun-an: “Ha diri maiha, diri na kamo makita ha akon; ngan ha diri liwat maiha makita na liwat kamo ha akon.” Nagsiring ngadto han iba an pira han iya mga tinun-an: “Ano ba an kahulogan hini nga iya siring, ‘Ha diri maiha, diri na kamo makita ha akon, ngan diri maiha makita na liwat kamo ha akon’; ngan nasiring liwat hiya, ‘Kay makadto ako han Amay.’” Nagpakiana pa hira, “Ano an buot niya sidngon han ‘diri maiha’? Diri kita nasabot han iya ginyiyinakan!” Nahibaro hi Jesus nga karuyag hira pumakiana ha iya, sanglit nagsiring hiya ha ira, “Nagsiring ako, ‘Ha diri maiha diri na kamo makita ha akon, ngan diri maiha makita na liwat kamo ha akon.’ Amo ba ini an iyo ginpaparopakiana? Susumatan ta kamo hin tinuod: magtatangis ngan magngunguyngoy kamo, kundi maglilipay an kalibutan; magmamabidoon kamo, kundi magigin kalipayan an iyo kabidoan.”

An Ebanghelyo han Ginoo.