PAGBASA I 

Buh 1:1-11

Pagbasa tikang han mga  Buhat han mga Apostoles.

Minahal ko nga Teofilo: Didto han syahan nga ginsurat ko nga basahan, ginsaysay ko an ngatanan nga ginbuhat ngan gintutdo ni Jesus tikang han pagtikang niya han iya buruhaton tubtob han adlaw han pagbayawa ha iya ngadto ha langit. Han waray pa hiya babayawa, gintugon niya pinaagi han gahom han Espiritu Santo an mga tawo nga iya ginpili hin ka mga apostoles. Sulod hin kap-atan (40) ka adlaw tikang hiya mamatay, nakadamo hiya pagpakita ha ira, ha mga paagi nga nagpamatuod hin waray ruhaduha, nga buhi pa hiya. Pinakita hiya ha ira ngan nakigkayakan ha ira mahitungod han Ginhadian han Dyos. Ngan han katirok na nira, gintugon niya hira, “Ayaw kamo anay pagbaya ha Jerusalem, kundi hulata niyo an hatag nga ginsaad han akon Amay ngan akon iginsumat ha iyo. Nagbunyag hi Juan hin tubig, kundi pira na la ka adlaw pagbubunyagan kamo han Espiritu Santo.”

Han pagkatitirok han mga apostoles upod hi Jesus, ginpakianhan hiya nira, “Ginoo, ibabalik mo na ba yana nga panahon an ginhadian han Israel?” Binaton hi Jesus ha ira, “Daan na ginbuot han akon Amay an mga panahon ngan mga adlaw, ngan waray niyo katungod hin paghibaro kon san-o ini nahinanabo. Kundi kon kumunsad na ha iyo an Espiritu Santo, mapupuno kamo hin gahom ngan magigin mga saksi ko kamo ha Jerusalem, ha bug-os nga Judea ug Samaria, ngan ha bug-os nga kalibutan.” Kahuman niya pagyakan hini, ginbayaw hiya ngadto ha langit samtang nagkikinita hira ha iya, ngan nasalipdan hiya hin dampog. Han nagtitinutok hira ngadto ha langit, samtang nagtitipaigbaw hiya, tigda la nga tinindog tupad ha ira in duha ka tawo nga magbusag an mga panapton. Nagsiring ini hira, “Mga taga-Galilea, kay ano nga nagtitinutok kamo ngan nagkikinita ngadto ha langit? Ini nga Jesus nga ginbayaw ngadto ha langit tikang ha iyo mabalik ha amo ngahaw nga paagi nga iyo hinkit-an han iya pagsaka ngadto ha langit.”

An Pulong han Ginoo.

SALMO RESPONSORiO          

Sal 47:2-3, 6-7, 8-9

(b) Sinaka an Dyos upod in mga goliat hin kalipay; an Ginoo sinaka upod an tingog hin mga turunggon.

Kon di’ man, ini:

(b) Alleluia!

1. Pamakpak na kamo nga may kalipayan,

kamo ngatanan gud nga mga katawhan;

hin pagdayaw an Dyos iyo goliatan,

hin dagko nga tingog iyo pagkantahan.

An Ginoo angay niyo kahadlokan,

an Dyos nga Gilalabawi han Ngatanan.

Hiya amo an hadi nga dako gudman,

nga nagkahadi han bug-os kalibutan. (b)

2. Napakadto na an Dyos han iya trono,

may mga gogliat hin kalipay didto,

ngan may-ada mga pagtrompeta'n dagko,

samtang nasaka na adto nga Ginoo.

Pagkanta ngadto ha Dyos hin malipayon,

pagkanta hin pagdayaw ha hadi naton. (b)

3. Hadi'n Dyos han tanan nga kalibutanon,

pagdayawa hiya'n mga karantahon!

8Nalingkod adton Dyos nga amo'n Ginoo,

didto hadton iya baraan nga trono;

ngan iya ginhahadian tikang didto,

an ngatanan nga kanasoran hin tawo. (b)

PAGBASA II

Ef 1:17-23

Pagbasa tikang han Surat ni San Pablo ngadto han mga taga Efeso.

Mga Kabugtoan: Nahangyo ako han Dyos han aton Ginoo Jesu-Cristo, an harangdon nga Amay, nga ihatag ha iyo an Espiritu han kinaadman basi magmaaram kamo, ngan amo an magpapadayag han Dyos ha iyo, basi kumilala kamo ha iya. Ginhahangyo ko nga mabuksan unta an iyo mga hunahuna, basi hibaroan niyo an paglaom nga tungod hini gintawag kamo niya, kon ano kahura an makaaramdok nga mga kaupayan nga iya iginsaad han iya mga tawo, ngan kon ano ka dako an iya gahom nga nagbubuhat dinhe ha aton nga natoo. Ini nga gahom nga aanhi ha aton amo ngahaw an gamhanan nga kusog nga ginamit niya hin pagbanhaw ngan pagpalingkod kan Cristo ha iya tuo didto ha langit. Naghahadi hi Cristo didto labaw han ngatanan nga langitnon nga mga punoan, mga magburuot, kagamhanan, ngan mga ginoo. May-ada niya ngaran nga labaw han ngatanan nga ngaran hin kagamhanan dinhe hini nga kalibutan ngan didto han masunod. Iginbutang han Dyos ha ubos han pagdumara ni Cristo an ngatanan nga mga butang, ngan igintubyan hiya ngada han singbahan usa nga labaw nga Ginoo han ngatanan nga mga butang. An singbahan amo an lawas ni Cristo, an kahingpitan niya nga amo ngahaw an naghihingpit han ngatanan nga mga butang ha ngatanan nga dapit.

An Pulong han Ginoo.

Kon Tuig C mahihimo ini gamiton nga ikaduha nga pagbasa:

Heb 9:24-28; 10:19-23

Pagbasa tikang han surat ngadto han mga Hebreo.

Kay waray sumulod hi Cristo ngadto hin baraan nga dapit nga hinimo hin mga tawo, nga kupya la han tinuod nga dapit. Kundi kinadto hiya ha langit, ug yana aadto hiya ha atubangan han Dyos tungod ha aton. An Labaw nga Padi nga Judiyo nasulod han Baraan nga Dapit ha kada tuig ngan dara niya in dugo hin mananap. Kundi waray sumulod hi Cristo paghalad hin makadamo han iya kalugaringon, kay kon sugad, makakadamo daw hiya pag-aantos tikang han paghimoa han kalibutan. Lugod, yana nga hirani na matapos an panahon, nagpakita hiya makausa gudla ngan para han ngatanan pagkuha han sala pinaagi han paghalad han iya kalugaringon. Kinahanglan mamatay an tagsa-tagsa makausa, ngan katapos hini paghukman hiya han Dyos. Ha amo man nga kahimtang, iginhalad hi Cristo makausa pagkuha han mga sala han kadam-an. Magpapakita liwat hiya hin ikaduha diri na tungod han sala, kundi pagtalwas na hadton mga naghuhulat na iya.

Sanglit, kabugtoan, may-ada na kita hingpit nga kagawasan hin pagsulod han Labi ka Baraan nga Dapit tungod han kamatayon ni Jesus. Gin-abrehan niya para ha aton in bag-o ngan buhi nga aragian, pinaagi han biray—ha aton pa, pinaagi han iya kalugaringon nga lawas. May-ada kita gamhanan nga padi nga tinaporan han balay han Dyos. Sanglit dangop kita han Dyos upod in tangkod nga kasingkasing ngan marig-on nga pagsarig, upod in mga kasingkasing nga nalinisan na tikang hin salaan nga konsensya ngan panhunahuna, ngan mga lawas nga nahugasan na hin limpyo nga tubig. Kapti naton hini maupay an aton paglaom, kay makakasarig kita han Dyos nga magtutuman han iya saad.

An Pulong han Ginoo.

EBANGHELYO (TUIG C)

Lc 24:46-53

Pagbasa tikang han santos nga ebanghelyo sumala kan Lucas.

Ngan nagsiring hi Jesus han iya mga tinun-an, “Amo ini an nahisurat: kinahanglan mag-antos an Mesiyas ngan mabanhaw ha ikatulo ka adlaw, ngan ha iya ngaran kinahanglan igwali ha ngatanan nga mga nasod, tikang ha Jerusalem, an mensahe mahitungod han pagbasol ngan pagpasaylo han mga sala. Mga saksi kamo hini nga mga butang. Ngan ako ngahaw an magpapadara nganhi ha iyo han iginsaad han akon Amay. Kundi kinahanglan maghulat kamo didto ha syudad tubtob nga kumunsad ha iyo an gahom nga tikang ha igbaw.”

Niyan gindara hira niya ha gawas han syudad tubtob ha Betania diin gin-alsa niya an iya mga kamot ngan ginbendisyonan hira. Samtang nagbebendisyon hiya ha ira, binaya hiya ha ira ngan ginbayaw hiya ha langit. Nagsingba hira ha iya ngan binalik hira ngadto ha Jerusalem, nga malipayon, ngan dayuday didto hira ha Templo, hin pagpasalamat han Dyos.

An Ebanghelyo han Ginoo.

PAG-AMPO HAN BUNGTO

Samtang malipayon kita nga namumulat han mahimayaon nga pagkanhi han Ginoo, padayon liwat kita hin pagbuhat han iya mga sugo ngan ha pag-ampo nga malaumon.  Sanglit, sarabat kita pagsiring:

Kalooye kami, Ginoo.

1) Tungod han bug-os nga Singba han: nga magpadayon hiya pagtuman han iya misyon para han katalwasan han katawhan. Mag-ampo kita ha Ginoo.

2) Tungod han mga pinuno han aton nasud ug dapit: nga mahimo hira kanunay nga mag-uruna ha kadasig, kaupayan, katadungan ha ira pagdumara han molupyo. Mag-ampo kita ha Ginoo.

3) Tungod han mga naghihimakuri ngan nag-aantos hin mga kasakitan: nga diri hira kulangon hin pagtapod ug paglaum sa Dyos, ngan makab-ot nira an hingyap nga mga kaupayan. Mag-ampo kita ha Ginoo.

4) Tungod hadton binaya na hini nga kalibutan: nga karawaton na nira an kahingpitan han dyosnon nga kalooy ngan makab-ot na nira an dayon nga pagpahuway. Mag-ampo kita ha Ginoo.

5) Tungod ha aton ngatanan: nga mahiara kita pagkilala ngan pagbaton han pag-aghat ug pagtawag ni Cristo ha aton ha ikinaadlaw. Mag-ampo kita ha Ginoo.

O Dyosnon nga Amay namon, pamatii an mga halad namon nga pag-ampo ug pangaraba, ngan ipadayon gad an imo paghura ha amon han ino bendisyon. Pinaagi kan Jesucristo, amon Ginoo. Amen.