PAGBASA I 

Buh 19:1-8

Pagbasa tikang han mga  Buhat han mga Apostoles.

Samtang nakadto hi Apolo ha Corinto, naglatas hi Pablo han lalawigan ngan inabot hiya ha Efeso. Didto iginkita hiya hin mga tinun-an, ngan iya ginpakianhan hira, “Kinarawat ba kamo han Espiritu Santo han pagkarawat niyo han pagtoo?” Binaton hira, “Waray ngani kami makabati nga may-ada Espiritu Santo.” “Kon sugad, ano man nga pagbunyag an iyo kinarawat?” nagpakiana hi Pablo. Ngan nagbaton hira nga an bunyag ni Juan. Nagsiring hi Pablo, “An bunyag ni Juan para adto hadton mga nagbasol han ira mga sala, ngan ginsiring ni Juan an mga tawo han Israel nga tumoo hira hin usa nga tiarabot sunod ha iya, nga amo hi Jesus.” Han pakabati nira hini, ginbunyagan hira ha ngaran han Ginoo nga Jesus. Ginpandongan hira ni Pablo han iya mga kamot ngan kinunsaran hira han Espiritu Santo. Nagyakan hira hin magkalainlain nga mga pinulongan ngan nagpasangyaw liwat han mensahe han Dyos. May mga napulo kagduha (12) ka tawo hira ngatanan.

Kinadto hi Pablo ha sinagoga, ngan sulod hin tulo ka bulan namulong hiya hin waray kahadlok ngadto han mga tawo. Nakiglantugi hiya ha ira mahitungod han Ginhadian han Dyos.

An Pulong han Ginoo.

SALMO RESPONSORIO

Sal 68:2-3ab, 4-5acd, 6-7ab

(b) Mga ginhadian han tuna, pag-awit kamo sa Dyos.

Kon di’ man, ini:

(b) Alleluia!

1. Bumuhat na an Dyos, hinaot pa unta,

ngan pasadngon adton mga kaaway n’ya;

hinaot nga an nagdudumot ha iya,

kumalagiw tikang ha atubangan n’ya.

Daw sugad hin iginpapalid nga aso,

tatabogon hira niya hin tutoo.

Daw sibo nga natutunaw ha kalayo. (b)

2. Kundi magmamalipayon an magtadong,

ha prisensya han Dyos hira malipayon.

An ira kalipay nga pagbabation,

rayhak nga matuod, waray na matupong.

Pagkanta ha Dyos dayawa'n iya ngaran,

an nasakay ha dampog angay kantahan;

An Ginoo amo adton iya ngaran,

pagmalipayon ha iya atubangan! (b)

3. Ikaw an Dyos nga amo an nagpupuyo,

adton hadton imo baraan nga templo,

amay nga napaid hadton mga ilo,

ngan nananalipod hadton mga balo.

An minimingaw tinatagan puroy-an,

ngan an mga priso ira katalwasan. (b)

PAGBASA II          

Jn 16:29-33

Pagbasa tikang han santos nga ebanghelyo sumala kan Juan.

Ngan nagsiring an iya mga tinun-an, “Kitaa, dayag na kaupay an imo pagyakan, ngan diri ka na nagamit hin mga pananglitan. Maaram na kami yana nga sayod ka han ngatanan; diri ka nagkikinahanglan nga may magpinakiana pa ha imo. Nakakapatoo ini ha amon nga tikang ka han Dyos.” Nagbaton ha ira hi Jesus, “Natoo na ba kamo yana? Maabot an panahon, ngan aanhi na, nga magkakaburublag kamo ngatanan, kada usa, ha iya kalugaringon nga urukyan, ngan babayaan ako nga mag-uusaan. Kundi diri tinuod nga nag-uusaan la ako, kay kaupod ko an Amay. Iginsumat ko ini ha iyo basi mamay-ada niyo kamurayaw pinaagi hin pakig-usa ha akon. Pagpapaantoson kamo han kalibutan; kundi pagmaisog kamo! Gindaog ko na an kalibutan!”

An Ebanghelyo han Ginoo.