PAGBASA I 

Buh 20:17-27

Pagbasa tikang han mga  Buhat han mga Apostoles.

Tikang ha Mileto nagpatugon hi Pablo ha mga katigurangan han singbahan ha Efeso nga makigkita hira ha iya. Han pag-abot nira, ginsiring hira ni Pablo, “Sayod kamo han akon pakig-urosa ha iyo ha bug-os nga panahon tikang han syahan nga adlaw han akon pag-abot ha lalawigan han Asia. An akon buruhaton gintuman ko sugad nga surugoon han Ginoo upod an tim-os nga pagpaubos ngan mga pagtangis ha butnga han mga kakurian nga inmabot ha akon tungod han mga pagbudhi han mga Judiyo. Sayod man kamo nga waray ko iglirong ha iyo an bisan ano nga sadang makabulig ha iyo dida han akon pagwali ngan pagtutdo ha iyo ha gawas ngan ha sakob han iyo mga balay. Iginpahimangno ko ha mga Judiyo ngan sugad man ha mga Hentil nga kinahanglan magbasol hira han ira mga sala ngan bumalik sa Dyos, ngan tumoo hira han aton Ginoo Jesu-Cristo. Ngan yana, ha pagsugot han sugo han Espiritu Santo, makadto ako ha Jerusalem ngan diri ako maaram kon ano an akon dadangatan. Maaram la ako nga nagpasidaan ha akon an Espiritu Santo nga an pagkapriso ngan mga pag-antos hin kakurian naghuhulat ha akon ha kada syudad. Kundi waray ko pag-awili ini nga akon kinabuhi, basta matuman ko la an akon misyon, ngan mahuman ko an buruhaton nga iginhatag ha akon han Ginoo nga Jesus, nga amo an pagpahayag han Maupay nga Sumat mahitungod han grasya han Dyos.

“Nasahid ko kamo ngatanan hin paglibota hin pagwali han Ginhadian han Dyos. Ngan yana maaram ako nga waray ha iyo makakakita na ha akon. Sanglit nasiring ako ha iyo hini gud nga adlaw nga kon may-ada diri matalwas ha iyo, ayaw ako niyo pagbasola. Kay waray ko igdiwara ha iyo an bug-os nga katuyoan han Dyos; waray ako gintago ha iyo.

An Pulong han Ginoo.

SALMO RESPONSORIO

Sal 68:10-11, 20-21

(b) Mga ginhadian han tuna, pag-awit sa Dyos.

Kon di’ man, ini:

(b) Alleluia!

1. Imo ginpabunok in banos nga uran,

ngan ginpatambok mo uga nga kaumhan.

Didto na pagpuyo an imo katawhan,

ha kamaupay mo kablas nabuligan. (b)

2. Dayawa an Ginoo nga nagdadara,

han adlaw-adlaw nga mga darad-on ta.

Amo hiya an Dyos nga natalwas manta,

an Dyos nga natalwas nga Dyos naton yana.

Hiya an Ginoo, an Ginoo naton,

nga nagtatalwas tikang han kamatayon. (b)

PAGBASA II          

Jn 17:1-11a

Pagbasa tikang han santos nga ebanghelyo sumala kan Juan.

Katapos ni Jesus maghimangraw hini, hinangad hiya ha langit ngan nagsiring, “Amay ko, inabot na an takna. Paghimayaa an imo Anak, basi paghimayaon ka man han imo Anak. Kay gintagan mo man hiya hin gahom hin pagmando han ngatanan nga mga tawo basi humatag hiya han dayon nga kinabuhi ngadto han ngatanan nga igintubyan mo ha iya. Ngan amo ini an dayon nga kinabuhi; nga kumilala ha imo an mga tawo, nga ikaw la an matuod nga Dyos, ngan kumilala kan Jesu-Cristo nga imo ginsugo. Iginpakita ko ha tuna an imo himaya; ginhuman ko na an iginpabuhat mo ha akon. Amay ko, himayaa ako yana ha imo atubangan sugad han himaya nga akon hadto han kaupod pa ako nimo, han waray pa himoa an kalibutan.

“Iginpakilala ko ikaw han mga tawo nga imo ginkuha ha kalibutan. Imo hira, ngan gintubyan mo hira ha akon. Gintuman nira an imo pulong, ngan yana maaram hira nga tikang ha imo an ngatanan nga iginhatag mo ha akon. Igintutdo ko ha ira an mensahe nga iginhatag mo ha akon, ngan ginkarawat ini hira. Maaram hira nga tikang ako ha imo, ngan natoo hira nga ikaw an nagsugo ha akon. “Nag-aampo ako para ha ira. Diri ako nag-aampo para han kalibutan, kundi para han mga tawo nga igintubyan mo ha akon, kay imo man hira. Imo an ngatanan nga akon, ngan akon man an ngatanan nga imo; ngan napapasidunggan ako tungod ha ira. Yana makada na ako ha imo; mabaya na ako han kalibutan, kundi hahani pa hira ha kalibutan.”

An Ebanghelyo han Ginoo.