PAGBASA I 

Buh 22:30; 23:6-11

Pagbasa tikang han mga  Buhat han mga Apostoles.

Karuyag han kapitan nga mahibaroan pa gud niya hin tukib kon ano an sumbong han mga Judiyo kontra kan Pablo. Sanglit han pagkabuwas ginpahubaran han mga kadena hi Pablo ngan nagsugo an kapitan nga magkatirok an mga puno han kapadian ngan an bug-os nga Labaw nga Hukmanan. Niyan ginpakuha niya hi Pablo ngan ginpaatubang hiya ha ira.

Han pakakita ni Pablo nga may-ada mga Sadusiyo dida han hugpo, ngan an iba nga Parisiyo, ginmoliat hiya, “Kabugtoan ko, usa ako nga Parisiyo nga anak hin usa nga Parisiyo. Ginhuhukman ako yana dinhe kay naglalaom ako nga an mga minatay mababanhaw!” Han pagsiring niya hini, nagkalantugi an mga Parisiyo ngan mga Sadusiyo, ngan nabahin an hugpo. (Kay nasiring an mga Sadusiyo nga waray pagkabanhaw an mga minatay, waray mga anghel ngan mga espiritu; kundi natoo an mga Parisiyo hini ngatanan.) Nagtikadako an ira paggisirusinggit, ngan may-ada mga magturutdo han Balaod dida han hugpo han mga Parisiyo nga tinmindog ngan rinmiwa gud hin pagsiring, “Waray kami hin-agian nga sala dida hini nga tawo! Bangin manggud nagyakan ha iya in usa nga espiritu o usa ba nga anghel!” Nagtikakusog an ira lantugi nga nahadlok na an kapitan han mga sondalo nga paghunothunoton hi Pablo. Sanglit ginpalusad niya an iya mga sondalo hin pagkuha kan Pablo ngan pagdara ha iya ngadto ha kwartel. Han pagkagab-i tinmupad an Ginoo kan Pablo ngan nagsiring, “Ayaw kahadlok! Sugad nga nagsaksi ka ha akon dinhe ha Jerusalem, magigin saksi ko liwat ikaw didto ha Roma.”

An Pulong han Ginoo.

SALMO RESPONSORIO

Sal 16:1-2a & 5, 7-8, 9-10, 11

(b) Panalipdi ako, Ginoo, ikaw an akon paglaum.

Kon di’ man, ini:

(b) Alleluia!

1. O Dyos, panalipdi ngan bantayi ako,

nadangop ako hin pag-ayop ha imo.

Siring ko ha imo, “Ikaw, Ginoo ko.”

Ikaw la, O Dyos, an akon maaangkon,

ngan ikaw gud la an mahatag ha akon

han ngatanan nga mga kinahanglanon;

aada ha imo kamot an akon kabubuwason. (b)

2. Dayawon an Dyos,

an nagdara ha akon,

ha gab-i akon konsensya nagpahinumdom.

Pirme aanhi ha akon an Ginoo,

suok hiya, diri mababantad ako. (b)

3. Magpapasalamat ako nga malipayon,

ngan waray gud sadang kahadlokan nakon.

Kay imo ako ginsalipdan han kamatayon,

pirme ako ha imo masinugtanon.

Ngan diri ka gud ha akon masalikway,

nga mahitampo ako han mga patay. (b)

4. Ipapakita mo ha akon an dalan,

han kinabuhi nga waray kataposan;

malipayon ako ha imo atubangan,

han tim-os nga kalipay ha kadayonan. (b)

PAGBASA II          

Jn 17:20-26

Pagbasa tikang han santos nga ebanghelyo sumala kan Juan.

Hinangad hi Jesus ha langit ngan nag-ampo: “Nag-aampo ako diri para la ha ira, kundi para liwat hadton mga matoo ha akon tungod han ira mensahe. Nag-aampo ako nga magkaurosa unta hira ngatanan. Amay, mahiusa unta hira ha aton, sugad gud nga aadi ka ha akon ngan aada ako ha imo, basi tumoo an kalibutan nga ikaw an nagsugo ha akon. Gintagan ko hira han amo nga himaya nga ihinatag mo ha akon, basi magkaurosa hira sugad nga uusa la kita; ako dida ha ira ngan ikaw dadi ha akon, basi magkaurosa unta hira hin hingpit, basi makasabot unta an kalibutan nga ikaw an nagsugo ha akon, ngan nahigugma ka ha ira sugad han imo paghigugma ha akon. Amay, igintubyan mo hira ha akon, ngan karuyag ko nga hira mahiusa ha akon bisan kon hain ako, basi hikit-an nira an akon himaya, an himaya nga ihinatag mo ha akon; kay ginhigugma mo ako han waray pa hihimoa an kalibutan. Matadong nga Amay, diri nakilala ha imo an kalibutan, kundi nakilala ako ha imo, ngan maaram ini hira nga ikaw an nagsugo ha akon. Iginpakilala ko ikaw ha ira, ngan ipadadayon ko hin pagpakilala ha imo, basi maangkon man nira an gugma mo para ha akon, ngan mag-ukoy man ako dida ha ira.”

An Ebanghelyo han Ginoo.