PAGBASA I 

Gen 11:1-9

Pagbasa tikang han Basahan han Genesis.

Ha syahan may-ada usa la nga pinulongan an mga tawo ha bug-os nga kalibutan ngan waray kalainan an mga pulong nga ira ginagamit. Samtang nagtitipakadto hira ha sinirangan, nahingadto hira ha kapatagan didto ha Babilonia ngan didto hira pag-ukoy. Naggipasiringsiring hira, “Tana, paghimo kita hin mga baldosa ngan banggaha ta hin maupay basi magmatig-a ini hin duro.” Sanglit nagkamay-ada hira mga baldosa nga igtirindog ngan alkitran hin pagturugkop han mga baldosa. Nagsiring hira, “Yana pagtindog kita hin usa nga syudad nga may-ada lantawan nga maabot ha langit, basi makaangkon kita hin ngaran para ha aton kalugaringon ngan diri kita magsarang ha bug-os nga tuna.”

Niyan linusad an Ginoo hin pagkita han syudad ngan han lantawan nga gintindog hito nga mga tawo, ngan nagsiring hiya, “Yana usa la nga katawhan ini hira ngatanan ngan nagyayakan hira hin usa la nga pinulongan; tinikangan pa la ini han ira nahuhunahunaan hin pagbuhat. Diri maiha mahihimo nira an bisan ano nga ira karuyag! Lusad kita ngan guponga ta an ira pinulongan basi diri hira magkasarabot.” Sanglit ginpasarang han Ginoo hira ngatanan ha bug-os nga tuna ngan ginpaukoy nira an pagtindog han syudad. Gintawag nga Babilon an syudad, kay didto gingupong han Ginoo an pinulongan han ngatanan nga mga tawo, ngan ginpasarang hira ha bug-os nga tuna.

An Pulong han Ginoo.

SALMO RESPONSORIO (I)

Sal 33:10-11, 12-13, 14-15

(b) Baraan an bungto nga ginpili han Ginoo nga iya kalugaringon.

1. Han Dyos ginpakyas kanan kanasoran tuyo,

waray itugot matuman an ira plano.

Padayon an iya nahunahunaan,

an iya panuyo waray kataposan. (b)

2. Palaran an nasod nga Dyos an Ginoo,

sugad man an pinili nga mga tawo.

Tikang ha langit tinmamod an Ginoo,

ngan kinita niya an ngatanan nga mga tawo. (b)

3. Tikang didto han iya ginhadian,

an mga umurukoy iya tinatamdan.

Hiya an nabantad han ira hunahuna,

han ngatanan nga buhat maaram hiya. (b)

PAGBASA II          

Ex 19:3-8, 16-20b

Pagbasa tikang han Basahan han Exodo.

Sinagka han bukid hi Moises hin pakigkita han Dyos. Nagtawag an Ginoo kan Moises tikang han bukid ngan pinapaghimangraw hiya ha mga Israelita nga mga tulin ni Jacob hin pagsiring: “Hinkit-an niyo an ginbuhat ko nga Ginoo ha mga Ehiptohanon ngan an pagdara ko ha iyo nga sugad hin pagdara hin agila han iya mga piso ha bawbaw han iya mga pako, ngan gindara ko kamo nganhi ha akon. Yana, kon pagsugton ako niyo, ngan kon pagtumanon niyo an akon ginsaaran, magigin akon kamo kalugaringon nga mga tawo. Akon an bug-os nga tuna, kundi magigin akon kamo pinili nga mga tawo, mga tawo nga iginhalad ha akon gud la, ngan mag-aalagad kamo nga kapadian ha akon.” Sanglit linugsong hi Moises ngan gintirok niya an mga pangulo han mga tawo ngan ginsumatan hira han ngatanan nga iginsugo ha iya han Ginoo. Niyan binaton hin durungan an ngatanan nga mga tawo, “Pagbubuhaton namon an ngatanan nga iginsiring han Ginoo,” ngan ginsumatan hini ni Moises an Ginoo.

An Pulong han Ginoo.

SALMO RESPONSORIO (II)

Dan 3:52, 53, 54, 55, 56

(b) Himaya ug pagdayaw ha kadayunan.

1. “Gindadayaw ka namon, O Ginoo

nga Dyos han amon kaapoy-apoyan.

Pagpasidunggan ngan pagtahoron unta ha kadayonan

an imo harangdon ngan baraan nga ngaran. (b)

2. Pagkantahon unta in mga imno

ha paghimaya ha imo ha kadayonan

ngan pagdayawon unta ikaw nga baraan

nga aadto hito nga Templo. (b)

3. Pagdayawon ka unta

samtang nalingkod ka ha hadianon mo nga trono.

Pagkantahon unta in mga imno

ha pagdayaw ha imo ha kadayonan. (b)

4. Nalingkod ka ha imo langitnon nga trono

ha igbaw han mga kerubin

ngan natan-aw ka ngadto ha tuna han mga minatay.

Pagdayawon nga pagsidunggan ka unta ha kadayonan. (b)

5. Pagdayawon ka unta didto ha kahitas-an.

Pagkantahon unta in mga imno

ha pagdayaw ha imo ha kadayonan. (b)

PAGBASA III        

Ezeq 37:1-14

Pagbasa tikang han Basahan ni Ezequiel nga manaragna.

Inabat ako nga an Ginoo aanhi ha akon, ngan gindara ako han iya espiritu ngan iginbutang ako didto hin usa nga kahamub-an nga luob hin mga tul-an. Iginlibot ako niya han kahamub-an, ngan hinkit-an ko nga damo hin duro an mga tul-an ngan duro na hin ka mga uga. Nagsiring hiya ha akon, “Anak hin tawo, mabubuhi pa ba ini nga mga tul-an?” Binaton ako, “Ikaw la an makakabaton hito; Ginoo nga Dyos!”

Nagsiring hiya, “Ipanagna ngadto han mga tul-an. Sidnga ini nga uga nga mga tul-an nga mamati han pulong han Ginoo. Sidnga ini nga nasiring ako nga Ginoo nga Dyos: Maginhawa ko ngada ha iyo ngan bubuhion ko kamo. Tatagan ko kamo hin mga ugat ngan mga kusog, ngan puputson ko kamo hin panit. Giginhawaan ko kamo hin gininhawa ngan bubuhion ko kamo. Niyan makilala kamo nga ako amo an Ginoo.”

Sanglit nanagna ako sumala han iginsugo ha akon. Han nagyayakan ako, hinbatian ko in linagatak nga aringasa, ngan nagtikang pagturugkop an mga tul-an. Samtang nagkikinita ako, naputos hin mga ugat ngan mga kusog an mga tul-an, ngan naputos liwat hin panit. Kundi waray ginhawa dida ha ira.

Nagsiring ha akon an Dyos, “Anak hin tawo, panagna an hangin. Sidnga an hangin nga nagsusugo an Ginoo nga Dyos, nga guminhawa hiya ngadto hini nga patay nga mga lawas, basi mabuhi hira.” Sanglit nanagna ako sumala han iginsugo ha akon. Nagkamay-ada gininhawa an mga lawas. Nabuhi hira ngan nanindog. Igo an ira kadamo hin usa ka hugpo hin kasondalohan.

Nagsiring ha akon an Dyos, “Anak hin tawo, sugad an mga tawo han Israel hini nga mga tul-an. Nasiring hira nga uga na hira, nga waray na gud paglaom, ngan waray na kabubwason. Sanglit panagna ngadto han akon mga tawo, an Israel, ngan sidnga hira nga bubuksan ko, an Ginoo nga Dyos, an ira mga lubnganan. Igagawas ko hira ngan ibabalik hira ngadto han tuna han Israel. Kon buksan ko na an mga lubnganan nga ginlubngan han akon mga tawo ngan mahigawas na hira, makilala hira nga ako amo an Ginoo. Giginhawaan ko hira, bubuhion ko hira, ngan pauokyon ko hira didto han ira kalugaringon nga tuna. Niyan makilala hira nga ako amo an Ginoo. Nagsaad ako nga pagbubuhaton ko ini—ngan pagtutumanon ko gud. Ako nga Ginoo an nagyakan.”

An Pulong han Ginoo.

SALMO RESPONSORIO (III)

Sal 107:2-3, 4-5, 6-7, 8-9

(b) Pagpasalamat han Ginoo; an iya gugma waray katapusan.

1. Hini nga mga pulong sarabat kita,

adton ngatanan nga gintalwas na niya.

Ginbawi kam' tikang mga kaaway man;

ginbalik tikang han langyaw kanasoran;

tikang ha sinirangan ngan ha katundan,

ngan tikang ha amihanan ngan timogan. (b)

2. May nagsudoysudoy hadton kamingawan,

waray makaagi'n syudad nga urokyan.

Nag-antos hin kagutom ngan kauhaw man,

waray nagud nira sadang paglaoman. (b)

3. Niyan ha butnga han ira kakurian,

an Ginoo ira ginsangpit, gintawag;

ngan iya tinagan hira'n katalwasan,

tikang hadton ira mga kasakitan.

Ginmandoan hira ha tadong nga dalan,

ngadto hadton syudad nga ira gin-ukyan. (b)

4. Ginoo ira gud pagpasalamatan,

tungod han gugma n’ya nga ha kadayonan,

tungod urosahon ginbuhat ha ira.

Mga inuuhaw’ya pinapatunga;

mga ginugutom binubusog niya

pinaagi’n mga kaupayan niya. (b)

PAGBASA IV         

Jl 3:1-5

Pagbasa tikang han Basahan ni Joel nga manaragna.

Nasiring an Ginoo: “Katapos hini iipison ko an akon espiritu ngada han ngatanan nga mga tawo: magsasangyaw han akon mensahe an iyo mga anak nga kalalaken-an ug kababayen-an; mag-iinop an iyo mga lagas nga kalalaken-an, ngan makakakita hin mga panan-awon an iyo batan-on nga kalalaken-an. Hito nga panahon iipison ko an akon Espiritu bisan ngada hin mga surugoon nga kalalaken-an ug kababayen-an.

“Hito nga adlaw mahatag ako hin mga pahimatngon didto ha langit ngan dinhe ha tuna. Magkakamay-ada dugo, kalayo, ngan mga harigi nga aso. Magmamasirom an adlaw, ngan magmamapula an bulan sugad hin dugo ha diri pa maabot an makarit ngan makalilisang nga adlaw han Ginoo. Kundi matatalwas an ngatanan nga makibulig han Ginoo. Sumala han iginsiring han Ginoo, ‘Makakalikay in pira didto ha Jerusalem; mahisasalin nga buhi adton akon pagpilion.’”

An Pulong han Ginoo.

SALMO RESPONSORIO (IV)

Sal 104:1-2a, 24 & 35c, 27-28, 29bc-30

(b) Ipadara, Ginoo, an imo Espiritu ngan bag-oha an dagway han kalibutan.

1. Pagdayawa an Ginoo, O kalag ko!

O Ginoo nga akon Dyos pagkadako!

Kaharangdon, kadungganan an bado mo,

naputos ka ngahaw han kapawa nimo. (b)

2. O Ginoo ka damo nga mga butang

an im' ginhimo han imo kinaadman;

ikaw an nagbuhat hini gud ngatanan,

puno na han im' buhat an kalibutan.

Pagdayawa an Ginoo, O kalag ko! (b)

3. Nasarig ha imo ini gud ngatanan,

hin mga pagkaon, ira kinahanglan;

an imo ginhatag ira ginpupulsan,

han imo pagkaon hira busog gudman. (b)

4. Han im’ gininhawa patay kon kuhaan,

ngan balik ha tuna diin hira tikang.

Kundi kon nahatag ka ngadto ha ira

han im’ gininhawa, hira natutuha;

hin bag-o nga kinabuhi nahatag ka

ngadto ha kalibutan dinhe ha tuna. (b)

PAGBASA V          

Rom 8:22-27

Pagbasa tikang han Surat ni San Pablo ngadto han mga taga Roma.

Mga kabugtoan: Kay maaram kita nga ngada yana nga panahon nag-aaraba hin kasakit an ngatanan nga mga binuhat, sugad hin babaye nga tipag-aranak. Kundi diri an mga binuhat la; pati kita nga kinmarawat na han Espiritu sugad nga syahan han mga hatag han Dyos, nag-aaraba liwat ha aton kalugaringon samtang naghuhulat kita kon san-o kita hihimoa han Dyos nga iya mga anak, ngan kon san-o liwat an aton hingpit nga katalwasan. Kay natalwas kita pinaagi hin paglaom; kundi kon nakita na kita han aton ginlalaoman, diri na ito tinuod nga paglaom. Kay hin-o in naglalaom pa han kinikita na niya? Kundi kon naglalaom kita han diri naton nakikita, nagpapaabot kita hito hin mailobon.

Ha amo nga paagi, an Espiritu nabulig liwat ha aton dida han aton kamaluya. Kay diri kita maaram kon uunanhon naton an pag-ampo; kundi an Espiritu ngahaw an nanginginyupo han Dyos para ha aton pinaagi hin mga pangaraba nga makuri ipagawas ha mga pulong. Ngan an Dyos nga nakita han mga kasingkasing han tawo maaram han ginhuhunahuna han Espiritu; kay an Espiritu han Dyos nanginginyupo para han iya mga tawo, ngan sumala han iya kaburut-on.

An Pulong han Ginoo.

ALLELUIA

Alleluia.

Pakadi, Santo Espiritu,

pun-a an mga kasingkasing

han imo magtinuohon;

ngan padilaaba dida ha ira

an kalayo han imo gugma.

Alleluia.

PAGBASA VI (EBANGHELYO)         

Jn 7:37-39

Pagbasa tikang han santos nga ebanghelyo sumala kan Juan.

An kataposan nga adlaw han pyesta amo an gidadakoi nga adlaw. Hito nga adlaw tinindog hi Jesus ngan nagsiring hin dako nga tingog, “Kinahanglan kumadi ha akon ngan uminom an bisan hin-o nga inuuhaw. Sumala han siring han kasuratan, ‘Tikang ha kasingkasing hadton natoo ha akon maawas in tubig nga nahatag hin kinabuhi.’”

Iginsiring ini ni Jesus mahitungod han Espiritu nga kakarawaton hadton mga natoo ha iya. Hadto nga takna waray pa ihatag an Espiritu, kay waray pa man mamatay ngan mabanhaw hi Jesus.

An Ebanghelyo han Ginoo.