PAGBASA I 

Buh 2:1-11

Pagbasa tikang han mga  Buhat han mga Apostoles.

Han pag-abot na han adlaw han Pentecostes, nagkatitirok an ngatanan nga mga magtinuohon ha usa nga dapit. Tigda la nga nagdaguhob tikang ha langit in sugad hin makusog nga alipuros ngan nakapuno ini han bug-os nga balay diin hira nagkakalingkod. Ngan nakakita hira hin sugad hin mga dila nga kalayo nga hinugdon ha kada usa ha ira. Napuno hira ngatanan han Espiritu Santo, ngan nagtikang hira pagyakan hin iba nga mga yinaknan, sumala han iginpayakan ha ira han Espiritu.

Nag-uokoy didto ha Jerusalem in mga Judiyo nga mag-inampoon, mga tawo nga tikang ha magkalainlain nga mga nasod han kalibutan. Han pakabati nira hini nga aringasa, nagtitirok in kadam-an nga mga tawo. Nahipausa hira ngatanan, kay nakabati an tagsa ha ira nga nagyayakan an mga magtinuohon han tagsatagsa nga yinaknan han mga namamati. Nagsiring hira ha dako nga paghipausa, “Diri ba mga taga-Galilea ini ngatanan nga nagyayakan? Naunan-o man nga nakabati kita ngatanan ha ira nga nagyayakan han aton tagsa nga kalugaringon nga yinaknan? Dinhe ha aton may mga taga-Partia, taga-Media, taga-Elam, mga umurukoy ha Mesopotamia, ha Judea, ha Capadocia, ha Ponto, ngan ha Asia, ha Frigia, ha Pamfilya, ha Ehipto, ngan ha mga dapit han Libya hirani ha Cirene; mga taga-Roma an iba ha aton, mga Judiyo ngan mga Hentil nga nakabig ha tuluohan han mga Judiyo; mga taga-Creta ngan mga taga-Arabia an pipira ha aton—kundi nakabati kita ngatanan ha ira nga nagyayakan han aton kalugaringon nga mga yinaknan mahitungod han orosahon nga mga butang nga ginbuhat han Dyos!”

An Pulong han Ginoo.

SALMO RESPONSORIO

Sal 104:1 & 24, 29-30, 31 & 34 

(b) Ipadara, Ginoo, an imo Espiritu ngan bag-uha an dagway han kalibutan.

Kon di’ man, ini:

(b) Alleluia!

1. Pagdayawa an Ginoo, O kalag ko!

O Ginoo nga akon Dyos pagkadako!

O Ginoo ka damo nga mga butang

an im' ginhimo han imo kinaadman;

ikaw an nagbuhat hini gud ngatanan,

puno na han im' buhat an kalibutan. (b)

2. Hadlok hira kon imo binabayaan,

patay hira kon imo binabawian;

han im' gininhawa patay kon kuhaan,

ngan balik ha tuna diin hira tikang.

Kundi kon nahatag ka ngadto ha ira

han im' gininhawa, hira natutuha;

hin bag-o nga kinabuhi nahatag ka

ngadto ha kalibutan dinhe ha tuna. (b)

3. Magpabilin na unta ha kadayonan

an himaya han Dyos, iya kagamhan!

An Ginoo unta magmalipayon man,

tungod hadton iya mga binuhatan!

Makalipay unta ha iya'n ak' kanta,

kay ginlilipay man liwat ako niya. (b)

PAGBASA II

1 Cor 12:3b-7, 12-13

Pagbasa tikang han Syahan nga Surat ni San Pablo ngadto han mga taga Corinto.

Mga kabugtoan: “Waray pa tawo nga makakagtug-an nga hi Jesus amo an Ginoo gawas kon minandoan hiya han Espiritu Santo.

May-ada magkalainlain nga espirituhanon nga mga hatag, kundi amo la ngahaw nga Espiritu an nahatag. May-ada magkalainlain nga pag-alagad, kundi amo la ngahaw nga Ginoo an gin-aalagad. May-ada magkalainlain nga mga pagkatakos hin pag-alagad, kundi amo la ngahaw nga Dyos an nahatag hin katakos ha ngatanan para han ira pag-alagad. Tinatagan an kada usa hin pangilal-an han Espiritu para han kaupayan han ngatanan.

Sugad hi Cristo hin usa nga lawas nga damo an mga bahin; an ngatanan nga bahin han lawas, bisan kon damo ngan magkalainlain, uusa la nga lawas. Ha amo man nga paagi, ginbunyagan kita ngatanan, mga Judiyo ngan mga Hentil, mga oripon ngan mga talwas, ngadto han usa la nga lawas pinaagi han amo ngahaw nga Espiritu, ngan ginpainom kita ngatanan han usa nga Espiritu.

An Pulong han Ginoo.

Kon di’ man, ini nga ikaduha nga pagbasa:

Rom 8:8-17

Pagbasa tikang han Surat ni San Pablo ngadto han mga taga Roma.

Mga kabugtoan: Diri nakakalipay han Dyos an nagsusugot han ira lawasnon nga kinaiya. Kundi diri na kamo nabubuhi sumala han mando han iyo lawasnon nga kinaiya, kundi han espirituhanon—kon ha tinuod nag-uokoy dida ha iyo an Espiritu han Dyos. Adton waray Espiritu ni Cristo, diri sakop ni Cristo. Kundi kon nag-uukoy hi Cristo dida ha iyo, an Espiritu amo an iyo kinabuhi bisan kon an iyo mga lawas mamatay tungod han sala, kay ginpakamatadong na kamo han Dyos. Kon nag-uukoy dida ha iyo an Espiritu han Dyos nga nagbanhaw kan Jesus, hiya nga nagbanhaw kan Cristo mahatag hin kinabuhi ha iyo mga lawas nga may kamatayon pinaagi han iya Espiritu nga aada ha iyo. Sanglit, kabugtoan ko, may-ada naton katungdanan nga mabuhi kita diri ha pagsunod han karuyag han aton lawasnon nga kinaiya. Kay kon mabuhi kamo sumala han iyo lawasnon nga kinaiya, mapatay kamo, kundi mabubuhi kamo kon patayon niyo an iyo salaan nga mga binuhatan pinaagi han Espiritu.

Mga anak han Dyos an ginmamandoan han Espiritu han Dyos. Kay an Espiritu nga iginhatag han Dyos ha iyo diri mag-ooripon ha iyo ngan diri maghahadlok ha iyo; lugod hihimoon kamo han Espiritu nga mga anak han Dyos, ngan pinaagi han gahom han Espiritu matawag kita han Dyos, “Amay ko!” An Espiritu han Dyos nakikig-usa han aton espiritu hin pagpamatuod nga mga anak kita han Dyos. Kay mga anak man kita niya, makakaangkon kita han mga kaupayan nga iginggahin para han iya mga tawo, ngan makakaangkon man liwat kita upod kan Cristo, han iginggahin han Dyos para ha iya; kay kon naangbit kita han mga pag-antos ni Cristo, maangbit man liwat kita han iya himaya.

An Pulong han Ginoo.

EBANGHELYO

Jn 20:19-23

Pagbasa tikang han santos nga ebanghelyo sumala kan Juan.

Han pagkagab-i na hadto ngahaw nga Domingo, nagtirok an mga tinun-an ha sulod hin balay nga trinangkahan an mga porta, kay nahadlok hira han mga punoan nga Judiyo. Ngan inabot hi Jesus ngan tinukdaw ha butnga nira ngan nagsiring, “An kalinaw maada ha iyo.” Katapos niya pagsiring hini, iginpakita niya ha ira an iya mga kamot ngan an iya kagiliran. Nalipay an mga tinun-an han pakakita nira han Ginoo. Ngan nagsiring liwat hi Jesus ha ira, “An kalinaw maada ha iyo. Sugad nga ginsugo ako han Amay, sinusugo ko man kamo.” Ginhuypan hira niya nga sidngon, “Karawata niyo an Espiritu Santo. Kon pasayloon niyo an mga sala han mga tawo, pasasayloon hira; ngan kon diri niyo pasayloon hira, diri man hira pasasayloon.”

An Ebanghelyo han Ginoo.

Kon di’ man,  ini nga ebanghelyo:

Jn 14:15-16, 23b-26

Pagbasa tikang han santos nga ebanghelyo sumala kan Juan.

“Kon nahigugma kamo ha akon, magtutuman kamo han akon mga sugo. Pangangaroon ko han Amay, ngan tatagan kamo niya hin lain nga Parabulig, an Espiritu han kamatuoran, nga magpapabilin ha iyo ha kadayonan.

“Magtutuman han akon mensahe an bisan hin-o nga nahigugma ha akon. Hihigugmaon hiya han akon Amay, ngan makada kami ha iya, ngan mag-uokoy kami dida ha iya. Diri nagtutuman han akon mga pulong an bisan hin-o nga diri nahigugma ha akon. Diri akon an mensahe nga hinbatian niyo, kundi natikang han Amay nga nagsugo ha akon.

“Iginsumat ko ini ha iyo samtang upod pa ako niyo. Kundi an Parabulig, an Espiritu Santo, nga susugoon han Amay ha akon ngaran, amo an magtututdo ha iyo han ngatanan nga mga butang, ngan magpapahinumdom ha iyo han ngatanan nga akon iginsumat ha iyo.

An Ebanghelyo han Ginoo.

PAG-AMPO HAN BUNGTO

Yana nga nagsasaurog kita han kaadlawan han Singbahan, dangop kita ha Makagarahum nga Amay naton, ngan ha gahum han Espiritu Santo, mapinaubsanon ngan tim-os kita nga mag-ampo ha pagsiring:

Pamatii ngan dungga kami, Ginoo.

 1) Tungod han mga nadudumara han Singbahan, an Santo Papa, ngan an kaobispohan, kapadian ug lain pa nga mga ministro, basi kanunay hira nga dasigon ha ira paningkamot, ngan mahimo nga mabinungahon an ira mga paniguro. Mag-ampo kita ha Ginoo.

2) Tungod han nga punoan ha gobyerno, basi diri magpapas an ira kinasingkasing nga pag-ataman han molopyo ngan an ira madinasigon nga panginano han mga nanginginahanglan. Mag-ampo kita ha Ginoo.

 3) Tungod han mga kablas ug mga nag-aantos hin magkadirodilain nga kakurian, basi an paglaum magpa bilin dida ha ira ngan an bulig han kataw’han ira hiaguman ha ikina adlaw. Mag-ampo kita ha Ginoo.

4) Tungod han mga kabataan dinhi ha aton dapit, basi magmatim-0s an ira paghingyap han mga hatag nga gasa han Espiritu Santo ngan magmadinasigon hira ha mga Cristohanon nga mga buruhaton. Mag-ampo kita ha Ginoo.

5) Tungod ha aton ngatanan: basi dayuday makatuman kita han mga pagturon-an ni Jesucristo ngan magpadayon hin pag-ukoy han ginpadayag niya nga kinabuhi dida ha gahum han Baraan nga Espiritu. Mag-ampo kita ha Gino0.

Makagarahum ug maloloy-on nga Amay, pamati-a an amon mga pag ampo ngan ipadayon an pagdasig ha amon ha gahum han Espiritu Santo. Pinaagi kan Jesucristo, amon Ginoo. Amen.