PAGBASA I 

2 Cor 1:18-22

Pagbasa tikang han Ikaduha nga Surat ni San Pablo ngadto han mga taga Corinto.

Mga kabugtoan: Sugad nga tinuod gud nga an Dyos diri buwaon, an akon saad ha iyo diri man liwat pagruruhaduhaan. Kay diri nagbabarobalhin an hunahuna ni Jesu-Cristo nga iginwali ha iyo nira Silas, Timoteo, ngan nakon kundi kasasarigan hiya nga Anak han Dyos. Kay amo hiya an katumanan han ngatanan nga mga saad han Dyos. Amo ini an hinungdan nga nasiring kita, “Amen” (Matuman kunta) pinaagi kan Jesu-Cristo, basi pagdayawon an Dyos. An Dyos ngahaw an naghatag han karig-onan han amon kinabuhi upod ha iyo dida kan Cristo. An Dyos ngahaw an nagpili ha aton, ngan naghatag hin tigaman ha aton nga iya na kita, ngan ihinatag dinhe ha aton mga kasingkasing an Espiritu Santo nga amo an kasasarigan han ngatanan nga gin-andam para ha aton.

An Pulong han Ginoo.

SALMO RESPONSORIO

Sal 119:129, 130, 131, 132, 133, 135

(b) Magmasinaw an imo nawong, Ginoo,

dida han imo suruguoon.

1. An imo mga pagturon-an urosahon,

hin kinasingkasing ginsusugot nakon. (b)

2. Nahatag hin kapawa an dayag nga pagturon-an,

an mga tapang natatagan hin kinaadman. (b)

3. Naghahangos ako ha akon pagnganga,

han imo mga sugo ha akon pag-ungara. (b)

4. Lingia ngan kalooyi ako yana,

sugad han ginbuhat mo han ha imo nahigugma. (b)

5. Sugad han imo saad, ayaw ako ipapukan,

ayaw ako ipadaog han mga karat-an. (b)

6. Ha imo atubangan ako pagpakaupaya,

ngan itutdo ha akon an imo mga lagda. (b)

PAGBASA II          

Mt 5:13-16

Pagbasa tikang han santos nga ebanghelyo sumala kan Mateo.

Nagsering hi Jesus ha iya mga tinun-an, “Kamo amo an asin para han ngatanan nga katawhan ha tuna. Kundi kon tumab-ang an asin, waray na iba nga paagi hin pagpabalik han iya kapag-ad. Waray na ito gamit, sanglit ilalabog nala basi pagtamaktamakan han mga tawo. “Kamo amo an kapawa han bug-os nga kalibutan. Diri matatago in bungto nga gintindog ha bawbaw hin bukid. Waray nadagkot hin suga ngan takloban. Lugod, ibinubutang ha burutangan hin suga basi makalamrag han ngatanan nga aada ha balay. Ha sugad nga paagi, kinahanglan an iyo suga magmapawa ha atubangan han mga tawo, basi hikit-an nira an iyo maupay nga buhat, ngan pagdayawon nira an Amay niyo ha langit.

An Ebanghelyo han Ginoo.