Kinaadlaw nga Pagbasa
PAGBASA I
2 Cor 3:4-11
Pagbasa tikang han Ikaduha nga Surat ni San Pablo ngadto han mga taga Corinto.
Mga kabugtoan: Nasiring kami hini kay natapod kami han Dyos pinaagi kan Cristo. Kon ha amon la kalugaringon waray kami sadang ipakita nga makakahimo kami hini nga buruhaton; natikang la han Dyos an amon pagkatakos hin pagbuhat. Hiya an naghimo ha amon nga takos makag-alagad han bag-o nga ginsaaran nga diri aada hin sinurat nga balaod, kundi aada han Espiritu. Nakakamatay an sinurat nga balaod, kundi nahatag hin kinabuhi an Espiritu.
Iginuhit an mga letra han Balaod dida han mga papan nga bato, ngan pinmakita an himaya han Dyos han paghatagan hini. Bisan kon naibanan na an kamasilaw dida han bayhon ni Moises, malamrag la gihapon an bayhon ni Moises nga makuri makabuslong an mga tawo ha iya. Kon an Balaod nga nagdadara hin kamatayon kon ipinapagtuman, ihinahatag in sugad nga himaya, ano daw nga himaya an makikita ha pag-alagad han Espiritu! Kon an paghatag han sirot inupdan hin kalamrag, labi na hin kamalamrag an buruhaton nga nagdadara hin katalwasan! Makakasiring kita nga kon itanding ini nga kalamrag, labaw pa hin kamalamrag ini yana, ngan an kalamrag hadto nagpapas na. Kay kon may kalamrag hadton lumalabay la, labi na hin kalamrag hadton himaya nga waray pagkatapos!
An Pulong han Ginoo.
SALMO RESPONSORIO
Sal 99:5, 6, 7, 8, 9
(b) Baraan an Ginoo nga Dyos naton.
1. An Ginoo aton gud nga pagdayawon,
amo hiya an Ginoo nga Dyos naton,
didto han iyo trono aton singbahon,
pagkabaraan niya, aton pagdaygon! (b)
2. Moises ug Aaron iya kapadian,
ngan hi Samuel usa liwat han kadam-an
nga nag-ampo, nagsangpit han iya ngaran,
nagsangpit han Ginoo ngan ginbaton man. (b)
3. An iya paagi ha ira pagyakan,
harigi nga dampog an gintitikangan;
mga balaod niya ira gintuman,
an ginhatag niya nga kasugoanan. (b)
4. At’ Ginoo nga Dyos ha ira nagbaton,
ikaw nga Dyos, ha ira mapasayloon;
kundi ikaw an nakastigo gihapon
hadton ira mga pagkamasal-anon. (b)
5. An Ginoo nga aton Dyos pagdayawon,
didto han iya baraan gud nga pungtod
ngan angay gud hiya naton pagsingbahon,
kay baraan an Ginoo nga Dyos naton. (b)
PAGBASA II
Mt 5:17-19
Pagbasa tikang han santos nga ebanghelyo sumala kan Mateo.
Nagsiring hi Jesus ha iya mga tinun-an, “Ayaw kamo paghunahuna nga kinanhi ako pagpara han Balaod ni Moises ngan han mga igintutdo han mga manaragna. Waray ako kumanhi hin pagpara hini, kundi hin pagtuman. Tigamni niyo ini: samtang aada pa an langit ngan an tuna waray bisan usa nga tulbok ug usa nga bagis in paparaon dida han Balaod, ngada han katuman han ngatanan. Sanglit, an magpasibaya bisan han gigugutiayi han mga sugo, ngan magtutdo han iba hin diri pagtuman, giuubosi hiya paghunahunaon didto ha langit. Kundi an nasugot han Balaod ngan magtutdo han iba hin pagtuman hini, magigin dako hiya didto han Ginhadian han langit.”
An Ebanghelyo han Ginoo.
_____________________
Pagdumdum kan San Bernabe
PAGBASA I
Buh 11:21b-26; 13:1-3
Pagbasa tikang han mga Buhat han mga Apostoles.
Tinoo in damo kaupay nga mga tawo, ngan nakabig hira ngadto ha Ginoo. Inabot ha singbahan ha Jerusalem an sumat mahitungod hini, sanglit ginsugo nira hi Bernabe ngadto ha Antioquia. Han pag-abot niya didto ngan han pakakita niya nga ginpakaupay han Dyos an mga tawo, nalipay hiya ngan gin-aghat niya hira ngatanan nga magmatinumanon ngan magmatinuohon hira han Ginoo ha bug-os nira nga mga kasingkasing. Buotan nga tawo hi Bernabe, nga puno han Espiritu Santo ngan hin pagtoo. Sanglit damo nga mga tawo in nakabig ngadto ha Ginoo. Niyan kinadto hi Bernabe ha Tarso hin pagbiling kan Saulo. Han paghiagii niya kan Saulo, igin-upod niya ngadto ha Antioquia. Sulod hin usa ka tuig nakig-urosa hira nga duha han mga tawo han singbahan, ngan nagtutdo hin kadam-an nga mga tawo. Didto ha Antioquia an syahan nga pagtawga nga Cristianos an mga magtinuohon.
Didto ha singbahan han Antioquia may-ada mga manaragna ngan mga magturutdo nga amo hira Bernabe, Simeon (nga gin-agnayan hin Negro), Lucio (nga taga-Cirene), Manaen (nga nagtubo upod kan Gobernador Herodes), ug Saulo. Samtang nag-aalagad hira han Ginoo ngan nagpupuasa, nagsiring ha ira an Espiritu Santo, “Laina para ha akon hira Bernabe ug Saulo para hin pagtuman han buruhaton nga iginhatag ko ha ira, nga amo an hinungdan han pagtawga ko ha ira.” Nagpuasa ngan nag-ampo hira, iginpandong an ira mga kamot kanda Bernabe ug Saulo, ngan ginpagikan hira.
An Pulong han Ginoo.
SALMO RESPONSORIO
Sal 98:1, 2-3ab, 3cd-4, 5-6
(b) Ginpasabot han Ginoo ha kanasuran
an iya matalwason nga gahum.
1. Bag-o nga kanta ha Ginoo kantahon,
kay ginbuhat niya mga urosahon!
Han iya baraan nga kusog ug gahom
an pagdarag-an iya na gud naangkon. (b)
2. An Ginoo amo’n nagpahibaro na
han iya pagdarag-an, iya victorya;
ha mga nasod ginpahibaro niya
adton iya gahom nga nagtatalwas pa.
Saad ha Israel gintuman gud niya
upod dayuday pag-unong, paghigugma. (b)
3. Pagdarag-an han aton Dyos an nakita
han mga katawhan ha tanan nga tuna.
Magrugyaw ha Ginoo, tanan nga tuna,
pagrayhak hin kanta, pagdayawa hiya. (b)
4. Ngadto ha Ginoo hin dayaw pagkanta!
Ngan pagtokar dida hadton mga arpa.
Upod hadton tunog han mga trompeta,
pati adton mga budyong pagpatungga;
ngan gogliat tungod hin kalipay kita
ngadto ha Ginoo nga amo’n hadi ta. (b)
PAGBASA II
Mt 10:7-13
Pagbasa tikang han santos nga ebanghelyo sumala kan Mateo.
Nagsiring hi Jesus ha iya dose nga mga tinun-an, “Lakat kamo ngan ipasangyaw nga hirani na an Ginhadian han langit. Tambala an mga magsakit, banhawa an mga minatay, linisi an mga sanlahon, ngan pagawsa an mga yawa. Kinarawat kamo nga waray pabaydi ha iyo, sanglit hatag man kamo nga diri kamo magpapabayad. Ayaw kamo pagdara hin bulawan, salapi, o bronse nga kwarta ha iyo mga bulsa; ayaw liwat kamo pagdara hin kanan makililimos supot ha iyo paglalaktan, o iba nga liliwanan o sandalyas labot han iyo sinusulot o tungkod. Angay tagan an nagkakabudlay han iya mga kinahanglanon. Pag-abot niyo hin bungto o baryo, pamiling kamo hin mapasaka ha iyo, ngan pabilin kamo dida ha iya ngada han pagbaya niyo hito nga dapit. Pagsaka niyo hin balay siring kamo, ‘Maada unta ha iyo an kamurayaw.’ Kon karawaton kamo han tagbalay mapabilin an kamurayaw dida hito nga balay; kundi kon diri, bawia an igpapabilin nga kamurayaw.”
An Ebanghelyo han Ginoo.