PAGBASA I 

Gen 12:1-9

Pagbasa tikang han Basahan han Genesis.

Nagsiring an Ginoo kan Abram, “Bayai an imo nasod, an imo kaurupdan, ngan an panimalay han imo amay, ngan pakadto hin usa nga tuna nga igtututdo ko ha imo.

Tatagan ko ikaw hin damo nga mga tulin, ngan mahihimo hira nga usa nga dako nga nasod. Pagbebendisyonan ko ikaw ngan hihimoon ko nga bantogan an imo ngaran, basi mahimo ka nga usa nga bendisyon para han iba.  Pagpapakaupayon ko adton mga magpapakaupay ha imo, kundi pagtutunglohon ko adton mga magpapanhimaraot ha imo. Ngan pinaagi ha imo pagpapakaupayon ko an ngatanan nga mga nasod.”

Han kapitoan kaglima (75) na an panuigon ni Abram, ginikan hiya tikang ha Haran, sumala han iginsiring ha iya han Ginoo ngan inupod ha iya hi Lot. Gindara ni Abram hi Sarai nga iya asawa, hi Lot nga iya umangkon nga lalake, ngan an ngatanan nga manggad ngan ngatanan nga mga oripon nga ira naangkon didto ha Haran, ngan ginikang hira ngadto ha tuna han Canaan. Han pag-abot nira didto ha Canaan, ginlatas ni Abram an tuna tubtob nga inabot hiya ngadto han baraan nga kahoy han More, an baraan nga dapit didto ha Siquem. (Hito nga panahon nag-uokoy pa didto han tuna an mga Canaanhon.)

Pinakita an Ginoo kan Abram ngan nagsiring ha iya, “Amo ini an tuna nga ighahatag ko ngadto han imo mga tulin.” Niyan nagtindog didto hi Abram hin usa nga altar ngadto han Ginoo nga pinakita ha iya. Katapos hito nagpadayon hiya tipatimogan ngadto han sagkahon nga tuna nga sinirangan han syudad han Betel, ngan nagkampo hiya ha butnga han Betel didto ha katundan ngan han Hai didto ha sinirangan. Nagtindog liwat hiya didto hin usa nga altar ngan nagsingba hiya han Ginoo. Niyan nagpadayon hiya tikang ha usa ngadto han sunod nga dapit, tipakadto han timogan nga bahin han Canaan.

An Pulong han Ginoo.

SALMO RESPONSORIO

Sal 33:12-13, 18-19, 20 & 22

(b) Malipayon adton mga tawo nga ginpili han Ginoo nga iya bungto.

1. Palaran an nasod nga Dyos an Ginoo,

sugad man an pinili nga mga tawo.

Tikang ha langit tinmamod an Ginoo,

ngan kinita niya an ngatanan nga mga tawo. (b)

2. An mga ginbabantayan han Ginoo,

An natahod ha iya nga mga tawo.

An may paglaom natoo ha iya,

an nasarig han iya dayon nga gugma.

Ira mga kalag iya tatalwason,

tikang han kaoripon han kamatayon;

ngan iya ini hira pagbubuhion,

ha mga panahon nga may-ada katgutom. (b)

3. An Ginoo an amon ginlalaoman,

amon panalipod ngan amon katabang.

Sanglit, O Ginoo, hinaot pa unta,

nga maamon an dayuday mo nga gugma;

samtang ibinubutang namon an paglaom,

dida ha imo, Ginoo nga Dyos namon. (b)

PAGBASA II          

Mt 7:1-5

Pagbasa tikang han santos nga ebanghelyo sumala kan Mateo.

Nagsiring hi Jesus ha iya mga tinun-an, “Ayaw kamo paghukom han iba basi diri kamo paghukman han Dyos. Kay paghuhukman kamo han Dyos sumala han paghukom niyo han iba, ngan an iyo igsusukol han iba amo man an gagamiton ha iyo. Kay ano nga nakita man kamo han poling ha mata han iyo bugto, kundi diri kamo nanginginano han nabalabag han iyo kalugaringon nga mata? Uunanhon niyo hin pagsiring ha imo bugto, ‘Kadi, kukuhaon ta an poling ha imo mata,’ kon aada pa in nabalabag ha iyo kalugaringon nga mata? Kamalabyaw niyo! Kuhaa anay an nabalabag ha iyo mata, ngan unina, makakakita kamo hin maupay, ngan makakakuha kamo han poling han iyo bugto.”

An Ebanghelyo han Ginoo.