PAGBASA I 

Gen 15:1-12, 17-18

Pagbasa tikang han Basahan han Genesis.

Nagkamay-ada panan-awon hi Abram, ngan hinbatian niya an Ginoo nga nagyayakan ha iya, “Ayaw kahadlok, Abram. Pananalipdan ko ikaw ha kataragman, ngan dako kaupay an balos nga ihahatag ko ha imo.”

Kundi binaton hi Abram, “O Ginoo nga Dyos, ano man nga kaupayan an akon makukuha han imo balos, kay waray ko man mga anak? Amo la hi Eliezer nga taga-Damasco an akon manurunod. Waray mo ako tagi hin mga anak, ngan usa han akon mga oripon an manununod han akon hiagi.” Niyan hinbatian na liwat niya an Ginoo, “Diri manununod han imo mga hiagi ini hi Eliezer nga oripon; an imo kalugaringon nga anak nga lalake amo an imo magigin manurunod.” Gindara hiya han Ginoo ngadto ha gawas ngan ginsiring, “Tan-awa daw an langit ngan ihapa an mga bitoon; magkakamay-ada ka sugad hito ka damo nga mga tulin.” Tinapod hi Abram han Ginoo ngan tungod hini nalipay ha iya an Ginoo ngan ginkarawat hiya.

Niyan nagsiring ha iya an Ginoo, “Amo ako an Ginoo nga nagdara ha imo tikang ha Ur didto ha Babilonia, ngan ihahatag ko ha imo ini nga tuna sugad nga imo na kalugaringon.” Kundi pinakiana hi Abram, “Ginoo nga Dyos, uunanhon ko hin paghibaro nga ako an magtatag-iya hini?” Binaton hiya, “Dad-i ako hin usa nga baka, usa nga kanding, ngan hin usa nga lalaki nga karnero, nga tulo ka tuig an panuigon han kada usa, ngan hin usa nga sarapati ngan hin usa nga tukmo.” Gindara ni Abram an mga mananap ngadto ha Dyos, ginpamikas ini, ngan ginturutugbang an mga pinikas ha duha ka rumbay; kundi waray niya pagpikasa an mga tamsi. Kon nahugdon an mga manaol ngada han mga patay nga lawas, gintatabog ini ni Abram. Han tikaturunod na an adlaw, nangaturog ngan nahimuok hi Abram. Inalpan hiya hin dako nga kahadlok nga nalisang hiya.

Han katunod na han adlaw ngan masirom na, tigda la nga pinakita in usa nga nag-aaraso nga daba ngan hin usa nga naglalahinggab nga sulo ngan linabay ini ha butnga han mga pinikas nga mga mananap. Ngan dida ngahaw naghimo an Ginoo hin ginsaaran kan Abram. Nagsiring hiya, “Nagsasaad ako hin paghatag ha imo mga tulin hini ngatanan nga tuna tikang ha pag-ultan han Ehipto ngadto ha Salog han Eufrates.”

An Pulong han Ginoo.

SALMO RESPONSORIO

Sal 105:1-2, 3-4, 6-7, 8-9

(b) Nanunumdum ha kadayonan an Ginoo han iya Ginsaaran.

1. Pagpasalamati niyo an Ginoo

ngan igpasangyaw an iya pagkadako;

igpahayag an iya mga nahimo,

dida han kanasoran igsumat niyo!

Pagkantahi hin pagdayaw an Ginoo,

sumat nga ur'sahon iya nahimo. (b)

2. Pagkalipay kamo kay iya na kita

tanan nga nasingba ha iya magrakya.

Dangop ha Ginoo nga kamo buligan,

ngan magsingba ha iya hin kadayonan. (b)

3. Tulin ni Abraham nga iya ginsugo,

ngan tulin ni Jacob pinili nga tawo.

Amo hiya an aton Dyos nga Ginoo,

para han ngatanan iya mga sugo. (b)

4. Gintutuman niya iya ginsaaran,

mga saad 'ya yukot nga katulinan.

Tutumanon iya sabot kan Abraham,

ngan an iya saad ngadto kan Isaac. (b)

PAGBASA II          

Mt 7: 15-20

Pagbasa tikang han santos nga ebanghelyo sumala kan Mateo.

Nagsiring hi Jesus ha iya mga tinun-an, “Pag-ikmat kamo han buwaon nga mga manaragna; napahirani hira ha iyo sugad hin mga karnero pagkit-on, kundi balitaw, ha sulod, sugad gud hira hin magbangis nga mga lubo. Makikilala niyo hira pinaagi han ira mga panggawi. Binuburo ba in ubas tikang hin kasapinitan, o in igos tikang hin niyutiyo? Nabunga hin maupay an maupay nga kahoy, kundi nabunga hin maraot an maraot man nga kahoy. Diri makakabunga hin maraot an maupay nga kahoy, diri man liwat makakabunga hin maupay an maraot nga kahoy. Pupudlon ngan susunogon an kahoy nga diri nahatag hin maupay nga bunga. Sanglit, makikilala niyo an buwaon nga mga manaragna pinaagi han ira mga panggawi.”

An Ebanghelyo han Ginoo.