Viernes kahuman han ikaduha nga Domingo katima han Pentecostes

PAGBASA I 

Ezeq 34:11-16

Pagbasa tikang han Basahan ni Ezequiel nga manaragna.

Nagsiring an Ginoo nga Dyos, “Nagsusumat ako nga Ginoo nga Dyos nga ako ngahaw an mamimiling han akon mga karnero ngan magmamangno ako ha ira, ha amo ngahaw nga paagi nga nagmamangno in usa nga magmarangno han iya mga karnero nga nahisalaag ngan nahibalik na liwat. Ibabalik ko hira tikang han ngatanan nga mga dapit diin hira nahisalaag ha usa ka adlaw nga masirom ngan makaharadlok. Kukuhaon ko hira tikang han langyaw nga kanasoran, titirokon ko hira, ngan ibabalik ko ngadto han ira kalugaringon nga tuna. Pag-uunhan ko hira hin pagbalik ngadto han kabukiran ngan kasapaan han Israel, ngan pasasabsabon ko hira didto han maglangbo nga mga kabanwaan. Pasasabsabon ko hira hin waray kahadlok didto hin mga panabsaban ha bukid ngan ha mga kahamub-an, ngan ha ngatanan nga maglangbo nga mga panabsaban ha tuna han Israel. Ako ngahaw an magmamangno han akon mga karnero, ngan igbibiling ko hira hin usa nga dapit nga papahuwayan. Ako nga Ginoo nga Dyos an nagyakan. Pamimilngon ko adton mga nagkawawara, ibabalik adton mga nanhisalaag, bubutkon adton ira mga samad, ngan bubulngon adton mga magsakit; ngan pagbabantayan ko adton mga magtambok ngan an magkusog, kay magmarangno ako nga nagbubuhat han matadong.”

An Pulong han Ginoo.

SALMO RESPONSORIO

Sal 23:1-3a, 3b-4, 5, 6

(b) An Ginoo an akon magmarangno, dida ha iya waray ko iiliwon.

1. An Ginoo an magmarangno ha akon,

dida ha iya waray ko iiliwon.

Gindara ako ngadto hin kabanwaan,

ngadto hin pahuwayan nga kapatagan.

Gindara ako niya ngadto han linaw,

tubig nga bulong hin kapaso ug kauhaw.

Hin bag-o nga kusog hi ako tinagan. (b)

2. Ha matadong nga dalan ako gin-unhan;

pagtuman niya han iya ginsaaran.

Bisan kon magtarap ako han kasisidman,

Ginoo, waray ko sadang kahadlokan;

kay ikaw man an akon inuupdan,

imo tungkod ug tabog an akon abayan. (b)

3. Hin sasaro para ha akon ikaw naghikay,

ha atubangan han akon mga kaaway.

Kinarawat ako, imo ginpasidunggan,

ginpalapwas nimo an akon irimnan. (b)

4. Magpapabilin an imo paghigugma,

samtang nga aanhi pa ako ha tuna.

Ngan an imo balay akon puroy-anan,

nga buhi pa ako ha mga katuigan. (b)

PAGBASA II

Rom 5:5b-11

Pagbasa tikang han Surat ni San Pablo ngadto han mga taga Roma.

Mga kabugtoan: Ginbubo han Dyos an iya gugma ha aton mga kasingkasing pinaagi han Espiritu Santo nga hatag han Dyos ha aton. Kay han waray pa naton sadang mahimo, nagpakamatay hi Cristo para han mga magpakasasala, ha amo nga panahon nga gintalaan han Dyos. Makuri an pagpakamatay para hin tawo nga matadong. Bangin may umilob pagpakamatay para hin maupay nga tawo. Kundi iginpakita han Dyos an iya dako nga paghigugma ha aton nga dida han magpakasasala pa kita, nagpakamatay hi Cristo para ha aton. Pinaagi han iya kamatayon nagmatadong kita; sanglit tatalwason pa gud kita niya tikang han kapungot han Dyos. Hadto anay mga kaaway kita han Dyos, kundi ginhimo kita niya nga iya mga sangkay pinaagi han kamatayon han iya Anak. Yana nga mga sangkay na kita han Dyos, tatalwason pa gud kita niya pinaagi han kinabuhi ni Cristo! Kundi diri amo la ini; nalilipay kita tungod han ginbuhat han Dyos pinaagi han aton Ginoo Jesu-Cristo nga naghimo na ha aton yana nga mga sangkay han Dyos.

An Pulong han Ginoo.

EBANGHELYO

Lc 15:3-7

Pagbasa tikang han santos nga ebanghelyo sumala kan Lucas.

Ginsumatan hira ni Jesus hini nga pananglitan: “Pananglit usa ha iyo may usa ka gatos nga karnero, ngan mawara in usa ha ira—ano man an iya bubuhaton? Binabayaan niya an kasiyaman kagsiyam (99) didto han panibsiban, ngan nalakat hiya hin pamiling han nawara, tubtob nga iya ini hiagian. Kon hiagian na ini niya, malipayon na hiya, ngan papas-anon ini niya, ngan dadad-on hin pag-oli ngadto ha ira. Niyan, iya dadapiton an iya kasangkayan ngan mga kahigrani, ngan sisidngon niya, ‘Pagsaurog kita! Malipayon ako hin duro nga hinagian ko an akon nawara nga karnero!’ Ha amo nga paagi, susumatan ko kamo, mas dako an kalipay ha langit tungod hin usa nga nagbabasol nga makasasala kay hin nobentay nuybe nga magtadong nga diri nagkikinahanglan hin pagbasol.

An Ebanghelyo han Ginoo.