Misa ha Bihilya | Misa ha Kaadlawan

___________________________

MISA HA KAADLAWAN

PAGBASA I 

Buh 12:1-11

Pagbasa tikang han mga  Buhat han mga Apostoles.

Hini nga panahon nagtikang hi Hadi Herodes hin pagpakurii in pira nga mga kaapi han singbahan. Iginpapatay niya pinaagi hin espada hi Santiago nga bugto ni Juan. Han pakakita niya nga nakalipay ini han mga Judiyo, nagpadayon hiya ngan iginpadakop liwat hi Pedro. (Nahinabo ini ha panahon han Pyesta han Tinapay nga Waray Patubo.) Kahuman pagdakpa ha iya, ginpriso hi Pedro ngan ginpabantayan hin upat ka hugpo nga mga gwardya, nga tag-upat nga mga sondalo an kada hugpo. Naglarang hi Herodes nga pagbibistahon hiya ha atubangan han mga tawo kahuman han Pyesta han Paglabay. Sanglit ginsulod hi Pedro ha bilanggoan kundi an mga tawo han singbahan nagpadayon han ira mainiton nga pag-ampo ngadto ha Dyos tungod ha iya.

Dida han gab-i nga pagdadad-on na hiya ni Herodes han pagkabuwas ngadto han mga tawo, nakaturog hi Pedro ha butnga hin duha nga mga gwardya. Ginapos hiya hin duha nga kadena, ngan may mga gwardya nga nagbabantay han portahan han bilanggoan. Tigda la nga inabot didto in usa nga anghel han Ginoo, ngan nagmalamrag an sulod han prisohan. Ginbantad han anghel an sugbong ni Pedro, ginpukaw hiya ngan ginsiring, “Dagmit! Buhat!” ngan natangtang dayon an mga kadena ha iya mga kamot. Ngan nagsiring an anghel, “Hugta an imo bakos ngan isul-ot an imo mga sandalyas.” Gintuman ini ni Pedro ngan nagsiring pa an anghel, “Pagkurugpos ngan sunod ha akon.” Sinunod ha iya hi Pedro hin paggawas han bilanggoan. Kundi diri hiya maaram kon tinuod ba an ginbubuhat han anghel; hunahuna niya nga usa la adto nga panan-awon. Inagian nira an syahan ngan an ikaduha nga mga gwardyahan ngan inabot hira han portahan nga puthaw nga ginagawsan ngadto han syudad. Naglugaring la pag-abre an portahan para ha ira ngan nagkagawas hira. Inagi hira hin usa nga kalsada ngan binayaan dayon hi Pedro han anghel. Niyan nakasabot hi Pedro han nahinabo ha iya ngan nagsiring, “Yana maaram na ako nga matuod gud an ngatanan. Ginsugso han Ginoo an iya anghel ngan gintalwas ako niya tikang han gahom ni Herodes ngan tikang han ngatanan nga karuyag han mga Judiyo nga mahinabo ha akon.”

An Pulong han Ginoo.

SALMO RESPONSORIO

Sal 34:2-3, 4-5, 6-7, 8-9

(b) Gintalwasa ko han Ginoo ha tanan ko nga kahadlok.

1. Pasalamatan ko pirme an Ginoo,

pagdayaw ha iya di’ maundang ako.

Tungod han iya buhat ak’ dadayawon,

an ginsakit mamati, magmalipayon! (b)

2. An pagkaharangdon han aton Ginoo,

upod ha akon isangyaw na gud niyo;

pagdayaw ha iya mag-urusa kita,

aton pagbayawon adton ngaran niya.

Nag-ampo ak’ ngan ginbaton han Ginoo,

gintalwas niya han tanan kahadlok ko. (b)

3. Tan-aw ha iya ngan magmalipayon man;

Di’ na mahiawod, di’ na maalohan.

Nasangpit an kabos ngan nabaton hiya,

natalwas han tanan kakurian nira. (b)

4. Anghel han Ginoo bantay, panalipod,

an ha Ginoo nahadlok ngan natahod.

Ha imo ngahaw, Ginoo, usisaha,

makikita mo nga maupay gud hiya;

palaran an tawo, waray kabaraka,

kon iya katalwasan tikang ha iya. (b)

PAGBASA II

2 Tim 4:6-8, 17-18

Pagbasa tikang han Ikaduha nga Surat ni San Pablo ngadto kan Timoteo.

An para ha akon, inabot na an takna hin paghalad han akon kalugaringon, aanhi na an panahon nga mabaya ako hini nga kinabuhi. Ginbuhat ko tubtob han akon maabot dida han paisan-isan, ngan natapos ko gud ini, gintipigan ko an pagtoo. Ngan yana igin-andam para ha akon an primyo han pagdarag-an, an pudong-pudong han pagkamatadong, nga hito nga Adlaw, ihahatag ha akon han Ginoo, an matadong nga Maghurukom—ngan diri la ha akon, kundi ha ngatanan nga naghuhulat nga mahigugmaon han iya pagpadayag.

Kundi gin-updan ako han Ginoo ngan gintagan ako hin kusog, sanglit nakagsangyaw ako han bug-os nga mensahe basi makabati an ngatanan nga mga Hentil; ngan nahigawas ako han paghukom ha kamatayon. Ngan tatalwason ako han Ginoo tikang han ngatanan nga karat-an, ngan dadad-on ako niya ngadto han iya langitnon nga Ginhadian. Ha iya an himaya ha kadayonan! Amen.

An Pulong han Ginoo.

EBANGHELYO

Mt 16:13-19

Pagbasa tikang han santos nga ebanghelyo sumala kan Mateo.

Niyan kinadto hi Jesus ha katunaan hirani han bungto han Cesarea Filipo, ngan didto ginpakianhan niya an iya mga tinun-an, “Sumala han siring han mga tawo, hin-o man kono an Anak han Tawo?” Nagbaton hira, “May nasiring nga hiya amo hi Juan nga Parabunyag; nasiring an iba nga hiya amo hi Elias; ngan nasiring na man liwat an iba nga hiya amo hi Jeremias o usa han mga manaragna.” Nagpakiana hi Jesus ha ira, “An ha iyo, hin-o man ako?”

Binaton hi Simon Pedro, “Ikaw amo an Mesiyas, an Anak han Dyos nga buhi.” Ginsiring hiya ni Jesus, “Palaran ka, Simon nga anak ni Juan, kay waray umabot ha imo ini nga kamatuoran tikang hin bisan hin-o nga tawo, kundi iginhatag ini ha imo han akon Amay ha langit. Sanglit nasiring ako ha imo: ikaw hi Pedro ngan ha bawbaw hini nga bato titindogon ko an akon singbahan, ngan diri makakadaog hini an gahom han kamatayon. Ihahatag ko ha imo an mga yawi han Ginhadian han Langit; an imo diri hubaran dinhe ha tuna diri man liwat huhubaran dinhe ha langit; ngan an imo hubaran dinhe ha tuna huhubaran man liwat didto ha langit.”

An Ebanghelyo han Ginoo.

___________________________

MISA HA BIHILYA

PAGBASA I 

Buh 3:1-10

Pagbasa tikang han mga  Buhat han mga Apostoles.

Usa ka adlaw kinadto ha Templo hira Pedro ug Juan alas tres ha kulop, an takna han pag-ampo. May didto usa ka tawo nga lulid tikang han iya katawo nga nakada han ginngangaranan nga “Matahom nga Aragian.” Gindadara hiya kada adlaw ngada hini nga aragian basi makilimos han mga tawo nga napakadto ha Templo. Han pakakita niya kanda Pedro ug Juan nga nasulod, nakilimos hiya ha ira. Tinutokan hiya nira ngan nagsiring hi Pedro, “Siplat ha amon!” Sanglit siniplat hiya ha ira nga naglalaom nga lilimosan hiya. Kundi nagsiring hi Pedro ha iya, “Waray gud ako kwarta, kundi ihahatag ko ha imo an aadi ha akon: ha ngaran ni Jesu-Cristo nga taga-Nazaret, ginsusugo ko ikaw, buhat ngan lakat!” Ngan kinaptan ni Pedro an tuo nga kamot han lulid ngan binuligan niya hin pagtukdaw. Nagmakusog dayon an mga tiil ngan mga mukobuko han lulid; linukso hiya, tinindog, ngan nagtikang hin paglakat. Niyan inupod hiya ha ira ngadto ha Templo nga naglalakat ngan nagluluksolukso ngan nagdadayaw han Dyos. An ngatanan nakakita ha iya nga naglalakat ngan nagdadayaw han Dyos; ngan han pakakilala nira nga amo ini hiya an makililimos nga paralingkod didto han “Matahom nga Aragian” han Templo, nahipausa gud hira ngatanan han nahinabo ha iya.

An Pulong han Ginoo.

SALMO RESPONSORIO

Sal 19:2-3, 4-5

(b) An ira sumat nalurab ha bug-os nga kalibutan.

1. Dayag ha langit kanan Dyos kagamhanan!

Klaro nakikita iya binuhatan!

Adlaw-adlaw nagpapahibaro ini,

ngan ginbabalik pagsumat gab-i-gab-i. (b)

2. Waray nira pulong o waray mga yakan,

waray nira tingog nga hinbabatian.

Kundi ira mensahe han tuna ginmuop,

nga ha bug-os nga kalibutan nakalukop. (b)

PAGBASA II

Gal 1:11-20

Pagbasa tikang han Surat ni San Pablo ngadto han mga taga Galacia.

Kabugtoan ko, tugoti ako pagsumat ha iyo nga diri kanan tawo la an Maupay nga Sumat nga akon iginwawali. Waray ko ito karawata tikang hin bisan hin-o nga tawo, o waray tawo nga nagtutdo hini ha akon. Lugod hi Jesu-Cristo ngahaw an nagpadayag hini ha akon.

Hinbatian na niyo an akon kinabuhi hadto han matinumanon pa ako han tuluohan han mga Judiyo, kon gin-unan-o ko hin pagpakurii hin waray kalooy han singbahan han Dyos, ngan an akon paniguro hin pagpuo han singbahan. Lupig ko an kadam-an nga katubo ko nga igkasi Judiyo hin pagtuman han tuluohan han mga Judiyo ug han mga nababatasan nga mga ginpapasunod tikang han amon mga kaapoy-apoyan. Kundi daan na ako ginpili han Dyos tungod han iya grasya, bisan han waray pa ako katatawo, ngan gintawag ako hin pag-alagad ha iya. Ngan han iya na paglarang nga ipadayag ha akon an iya Anak, basi magwali ako han Maupay nga Sumat mahitungod ha iya ngadto han katawhan han mga nasod nga Hentil, waray ako pangaro hin sagdon bisan kan kanay, o waray ako kumadto ha Jerusalem pakigkita han mga apostoles nga una ha akon. Lugod kinadto ako dayon ha Arabia, ngan katapos binalik ako ha Damasco.

Tulo ka tuig anay an linabay tikang han kakabig ko san-o ako kumadto ha Jerusalem hin pagduaw kan Pedro, ngan nagpabilin ako upod ha iya sulod hin duha ka semana. Waray ako iginkakita nga mga apostoles labot kan Santiago nga bugto han Ginoo. Matuod an akon ginsusurat. Diri ako nagbubuwa, sayod man hini an Dyos!

An Pulong han Ginoo.

EBANGHELYO

Jn 21:15-19

Pagbasa tikang han santos nga ebanghelyo sumala kan Juan.

Katapos nira pamahaw, nagsiring hi Jesus kan Simon Pedro, “Simon Pedro, anak ni Juan, nahigugma ka ba ha akon labaw han ira paghigugma ha akon?” Nagbaton hiya, “Oo, Ginoo, sayod ka nga nahigugma ako ha imo.” Nagsiring ha iya hi Jesus, “Mangnoi an akon nati nga mga karnero.” Nagsiring hi Jesus ha iya hin ikaduha, “Simon, anak ni Juan, nahigugma ka ba ha akon?” Nagbaton hiya, “Oo, Ginoo, sayod ka nga nahigugma ako ha imo.” Nagsiring ha iya hi Jesus, “Mangnoi an akon mga karnero.” Nagsiring gihapon hi Jesus hin ikatulo, “Simon, anak ni Juan, nahigugma ka ba ha akon?” Nabido hi Pedro kay ikatulo na ini nga iya pakianhi, “Nahigugma ka ba ha akon!” Ngan nagsiring hiya kan Jesus, “Ginoo, sayod ka han ngatanan nga mga butang. Sayod ka nga nahigugma ako ha imo!” Nagsiring na liwat hi Jesus ha iya, “Mangnoi an akon mga karnero. Susumatan ko ikaw hin tinuod: han batan-on ka pa, ikaw la an nagbabakos ha imo ngahaw, ngan napasingadto ka bisan diin nga karuyag mo kadtoan, kundi kon malagas ka na, uunaton mo na la an imo mga kamot, ngan iba na an magbabakos ha imo, ngan dadad-on ka ngadto hin dapit nga diri mo karuyag kadtoan.” (Iginyakan ini ni Jesus ha pagpasabot kon ano nga paagi an pagkamatay ni Pedro ngan an iya paghimaya han Dyos.) Ngan nagsiring ha iya hi Jesus, “Sunod ha akon!”

An Ebanghelyo han Ginoo.