PAGBASA I 

Gen 19:15-29

Pagbasa tikang han Basahan han Genesis.

Han maagahon pa, gintinguha han mga anghel hin pagpadagmit kan Lot. “Dali!” nagsiring hira. “Dad-a an imo asawa ngan an duha mo nga mga anak nga kababayen-an ngan gawas kamo, basi diri kamo mamatay kon pagbungkagon an syudad.” Baga nag-alang pa hi Lot. Kundi nalooy ha iya an Ginoo; sanglit kinaptan han duha nga kalalaken-an hiya, an iya asawa, ngan an iya duha nga mga anak nga kababayen-an ngan ginpagawas hira han syudad. Ngan nagsiring an usa han mga anghel, “Dalagan kamo basi diri kamo magkamatay! Ayaw kamo paglingi ngan ayaw paghunong didto han kahamub-an. Dalagan kamo ngadto han kapungtoran basi diri kamo magkamatay!” Kundi binaton hi Lot, “Kon mahimo, diri gad kami makadto hito nga dapit. Ginbuhat mo na ha akon in dako nga pagkalooy ngan gintalwas mo pa an akon kinabuhi. Kundi hirayo hin duro an kapungtoran; bangin hiabotan ako han karat-an, ngan mapatay ako ha diri pa ako maabot didto. Nakita ka ba ito nga gutiay nga bungto? Hirani la ito. Tugoti ako hin pagkadto—nakita ka man nga gutiay la ito nga dapit—ngan magagawas ako han kataragman.” Binaton hiya, “Sigi, kadto na. Diri ko pagbubungkagon ito nga bungto. Dali! Dalagan! Waray ko mahihimo hin pagbungkag tubtob han imo pag-abot didto.” Tungod nga gintawag ini ni Lot nga gutiay, ginngaranan an bungto nga Zoar.

Nasirang na an adlaw han pag-abot ni Lot ngadto ha Zoar. Ha gilayon ginpauranan han Ginoo an mga syudad han Sodoma ug Gomora hin nagkakalayo nga asufre, ngan ginbungkag ini ngan an bug-os nga kahamub-an, upod an ngatanan nga mga tawo didto, ngan an ngatanan nga naturok dida han tuna. Kundi liningi an asawa ni Lot ngan nahimo hiya nga harigi nga asin. Timprano pa han pagkaaga nagdagmit hi Abraham ngadto han dapit nga iya gintukdawan ha atubangan han Ginoo. Ginlantaw niya an Sodoma ug Gomora ngan an bug-os nga kahamub-an, ngan hinkit-an niya in aso nga nag-usbok tikang han tuna, nga sugad hin aso nga tikang hin usa nga dako hin duro nga hudno. Kundi han pagbungkaga han Dyos han mga syudad han kahamub-an nga gin-ukyan ni Lot, waray hingalimot an Dyos kan Abraham, ngan gintalwas niya hi Lot han makalilisang nga kataragman.

An Pulong han Ginoo.

SALMO RESPONSORIO

Sal 26:2-3, 9-10, 11-12

(b) An imo gugma, Ginoo, diri mawawara ha akon mga mata.

1. Usisaha, O Ginoo, ngan pruybahi ako,

paghukmi an akon mga ungara ngan panhunahuna.

Nagmamando ha akon an imo dayon nga paghigugma;

nag-uuna pirme ha akon an imo kamatinumanon. (b)

2. Ayaw ako paglaglaga upod han mga makasasala;

talwasa ako tikang han kapalaran

han mga parapamatay hin tawo—

nga nagbubuhat hin maraot ha ngatanan nga panahon

ngan andam pirme paghukip. (b)

3. An para ha akon, nagbubuhat ako hin matadong;

kalooyi ako ngan talwasa ako!

Talwas ako tikang han ngatanan nga kataragman;

gindadayaw ko an Ginoo dida hin pagsingba ha kadam-an! (b)

PAGBASA II          

Mt 8:23-27

Pagbasa tikang han santos nga ebanghelyo sumala kan Mateo.

Sinakay hi Jesus han sakayan ngan inupod ha iya an iya mga tinun-an. Han nakaturog hi Jesus, tigda la nga inabot in makusog nga alipuros ha lanaw, sanglit ginsasakayan na hira han mga balod, ngan haros na malunod an sakayan, kundi nakaturog hi Jesus. Gindaop hiya han mga tinun-an ngan ginsiring hin pagpukaw ha iya, “Talwasa kami, Ginoo! Malulunod kita!” Ginsiring hira ni Jesus, “Kay ano nga nahadlok man kamo? Kagutiay han iyo pagtoo!” Niyan binuhat hiya ngan ginsaway an hangin ngan an balod, ngan nagmalinaw an dagat. Nahipausa hira ngatanan ngan may hinsiring, “Hin-o ini nga tawo? Nasugot ha iya bisan an hangin ug balod!”

An Ebanghelyo han Ginoo.