PAGBASA I 

Ef 2:19-22

Pagbasa tikang han Surat ni San Pablo ngadto han mga taga Efeso.

Mga kabugtoan: Diri na mga lumalangyaw o mga dumuruong kamo nga mga Hentil; mga igkasi mga tuminungnong na kamo han mga tawo han Dyos, ngan mga kaapi na han panimalay han Dyos. Gintukod na liwat kamo ha patukoranan nga iginpahimutang han mga apostoles ngan mga manaragna, nga hi Cristo Jesus ngahaw amo an puno nga patukoranan. Amo hiya an nahawid han bug-os nga balay, ngan nagpapadako ngadto hin usa nga templo nga baraan han Ginoo. Ha pakig-usa ha iya, kaupod an ngatanan nga mga magtinuohon, gintitindog liwat kamo nga usa nga balay diin nag-uokoy an Dyos pinaagi han iya Espiritu.

An Pulong han Ginoo.

SALMO RESPONSORIO

Sal 117:1bc, 2

(b) Pakadto ha bug-os nga kalibutan igpasangyaw an Maupay nga Sumat.

1. Dayawa an Ginoo, tanan kanasoran!

Pagdayawa hiya, tanan nga katawhan! (b)

2. Iya gugma ha aton kadako gudman!

Pagkamatinumanon n'ya kadayonan! (b)

EBANGHELYO

Jn 20:24-29

Pagbasa tikang han santos nga ebanghelyo sumala kan Juan.

Diri kaupod nira hi Tomas, (an gintatawag nga karuha) nga usa han dose nga mga tinun-an, han pagpakita ni Jesus ha ira. Sanglit ginsumatan hiya han iba nga mga tinun-an, “Hinkit-an namon an Ginoo!” Nagsiring hi Tomas ha ira, “Diri ako matuod kon diri ko hikit-an an mga ulat han ginlahosan han mga raysang dida han iya mga kamot ngan mahibutang ko an akon tudlo dida hini nga mga ulat ngan mahiram han akon kamot an iya kagiliran.” Paglabay hin usa ka semana, nagkaurosa na liwat an mga tinun-an ha sulod hin balay, ngan upod na nira hi Tomas. Trangkado an mga porta, kundi inabot hi Jesus ngan tinukdaw ha butnga nira ngan nagsiring, “An kalinaw maada ha iyo.” Ngan nagsiring hiya kan Tomas, “Ibutang didi an imo tudlo, ngan kitaa an akon mga kamot; ngan ikadi an imo kamot ngan hirama an akon kagiliran. Ayaw na pagruhaduha, tuo na!” Nagbaton hi Tomas ha iya, “Ginoo ko ngan Dyos ko!” Nagsiring hi Jesus ha iya, “Natoo ka na ba kay nakakita ka ha akon? Palaran adton natoo bisan waray makakita ha akon!”

An Ebanghelyo han Ginoo.