PAGBASA I 

Gen 23:1-4, 19; 24:1-8, 62-67

Pagbasa tikang han Basahan han Genesis.

Nakaabot hi Sara hin panuigon nga usa kagatos karuhaan kagpito (127). Namatay hiya didto ha Hebron ha tuna han Canaan, ngan nagmasulob-on hi Abraham tungod han iya kamatay. Binayaan ni Abraham an dapit nga hinahayaran han lawas han iya asawa, kinmadto hiya han mga Hiteohanon, ngan nagsiring, “Usa ako nga lumalangyaw nga nag-uokoy dinhe ha iyo; papalita ako hin tuna, basi didto ko iglubngan an akon asawa.”

Niyan iginlubong ni Abraham hi Sara nga iya asawa didto hito nga lungib ha tuna han Canaan.

Yana lagas na hin duro hi Abraham, ngan ginpakaupay hiya han Ginoo ha ngatanan nga iya ginbuhat. Nagsiring hiya ha iya gimamagurangi nga surugoon, nga tinaporan han ngatanan niya nga manggad, “Igbutang an imo kamot ha butnga han akon mga paa ngan pagsumpa. Karuyag ko nga magsumpa ka ha ngaran han Ginoo nga Dyos han langit ug tuna, nga diri ka magpipili hin asawa para han akon anak nga lalake tikang han mga tawo dinhe ha Canaan. Kinahanglan bumalik ka ngadto han nasod nga akon natawhan, ngan kuha hin asawa tikang han akon kauropdan para kan Isaac nga akon anak.” Kundi pinakiana an surugoon, “Ano man kon diri umalagad an babaye hin pagbaya han iya urukyan hin pag-upod ha akon nganhi hini nga tuna? Dadad-on ko ba an imo anak ngadto han tuna nga imo hadto gin-ukyan?” Binaton hi Abraham, “Ayaw gud pagdad-a ngadto an akon anak! Gindara ako han Ginoo nga Dyos han langit, tikang han panimalay han akon amay ngan tikang han tuna han akon kauropdan, ngan iginsumpa niya ha akon nga iya ighahatag ini nga tuna ngadto han akon mga tulin. Susugoon niya hin pag-una ha imo an iya anghel basi makakuha ka didto hin asawa para han akon anak. Kon diri maruyag an babaye hin pag-upod ha imo, mahigagawas ka hini nga saad. Kundi kinahanglan diri mo gud pagdad-on ngadto an akon anak bisan ano an mahinabo.”

Kinadto hi Isaac ha kamingawan han “An-Atabay-han Buhi-nga-Uusa-nga-Nakita-ha-Akon,” ngan nag-ukoy hiya didto han timogan nga dapit han Canaan. Ginawas hiya dida han kulopay na hin pagsudoy han kaumhan, ngan hinkit-an niya in tiabot nga mga kamelyo. Han pakakita ni Rebecca kan Isaac, hinawas hiya han iya kamelyo, ngan ginpakianhan niya an surugoon ni Abraham, “Hin-o ito nga tawo nga naglalakat tipakanhi ha aton dida han kaumhan?” Binaton an surugoon, “Amo hiya an akon agaron.” Sanglit kinuha ni Rebecca an iya bilo ngan tinahonan an iya bayhon.

Ginsumatan han surugoon hi Isaac han ngatanan nga iya ginbuhat. Niyan gindara ni Isaac hi Rebecca ngadto han tulda nga gin-ukyan anay ni Sara nga iroy niya, ngan iya gin-asawa hi Rebecca. Ginhigugma ni Isaac hi Rebecca sanglit naliaw gud hiya tungod han pagkamatay han iroy niya.

An Pulong han Ginoo.

SALMO RESPONSORIO

Sal 106:1b-2, 3-4a, 4b-5

(b) Pasalamati an Ginoo kay maupay hiya.

1. Pagpasalamati liwat hiya niyo;

kay tugob hiya hin kamaupay,

kay dayon an iya gugma ug dayuday.

Hin-o gud ha aton in makakagsumat,

hadton iya gamhanan nga mga buhat?

Hin-o gud ha aton in makakagpakita,

hin igo, angay nga pagdayaw ha iya? (b)

2. Pagkapalaran han mga nagsusugot,

hin pagtuman hadton iya mga balaod;

ngan nagbubuhat hadton katadongan,

ha gihapon ug ha takna gud ngatanan.

Hinumdomi gad man ako, Ginoo,

kon natabang ka han imo mga tawo. (b)

3. Ha imo mga pagbulig sakopa gad ako,

kon an imo katawhan gintatalwas nimo.

Pakitaa ako han pag-uswag han imo katawhan,

ipaangbit ha akon kanan nasod kalipayan;

basi magmalipay ngan magrayhak ako,

kaupod han mga ginsakopan nimo. (b)

PAGBASA II          

Mt 9:9-13

Pagbasa tikang han santos nga ebanghelyo sumala kan Mateo.

Binaya hi Jesus hadto nga dapit. Han naglalakat hiya ha dalan, hinkit-an niya in tawo nga parasukot hin buhis nga ginngaranan kan Mateo nga nalingkod didto han iya buhatan. Ginsiring hiya ni Jesus, “Sunod ha akon.” Ngan binuhat hi Mateo ngan sinunod ha iya. Han nangangaon na hira Jesus ngan an iya mga tinun-an didto han balay ni Mateo, inabot in damo nga mga parasukot hin buhis ngan mga tinamay, ngan tinangka upod ha ira. Hinkit-an ini hin mga Parisiyo ngan nagpakiana hira han iya mga tinun-an, “Kay ano nga nakikigsaro an iyo magturutdo han mga parasukot hin buhis ngan mga tinamay?” Hinbatian hira ni Jesus ngan ginbaton hira, “Diri nagkikinahanglan hin magtarambal an waray sakit nga mga tawo, kundi an mga magsakit la. Lakat ngan panginanoa kon ano an kahulogan hini nga kasuratan nga nasiring, ‘Naungara ako hin kalooy, diri hin halad nga mga hayop.’ Kay kinanhi ako pagtawag han mga makasasala, diri han mga magtadong.”

An Ebanghelyo han Ginoo.